ഗുരുവായൂര് ക്ഷേത്രനടയില് പാമ്പിനെ തോളിലിട്ട് സാഹസികം കാണിച്ച വ്യക്തിക്ക് പാമ്പിന്റെ കടിയേറ്റു. കൊല്ലം സ്വദേശിയായ സുനില്കുമാറിനാണ് പാമ്പുകടിയേറ്റത്. പുലര്ച്ചെ ഒരു മണിയോടെയായിരുന്നു സംഭവം. വടക്കേ നടയിലെ ഗേറ്റിന് സമീപത്തെ സെക്യൂരിറ്റി ക്യാബിന് സമീപം തിങ്കളാഴ്ച രാത്രി 11 മണിയോടെയാണ് പാമ്പിനെ കണ്ടെത്തിയത്.
സെക്യൂരിറ്റി ജീവനക്കാരും പൊലീസും ചേര്ന്ന് പാമ്പിനെ ആളൊഴിഞ്ഞ ഭാഗത്തേക്ക് ഓടിച്ചു വിടുകയായിരുന്നു. ഇന്നര് റോഡില്നിന്ന് നാരായണാലയം ഭാഗത്തേക്ക് പോയ പാമ്പിനെ അനില്കുമാര് പിടികൂടി സെക്യൂരിറ്റി ജീവനക്കാരുടെ സമീപത്തേക്ക് കൊണ്ടുവന്നു. പോലീസും സെക്യൂരിറ്റി ജീവനക്കാരും ചേര്ന്ന് പാമ്പിനെ ഒഴിവാക്കാന് ആവശ്യപ്പെട്ടെങ്കിലും ഇയാള് തയ്യാറായില്ല. അരമണിക്കൂറോളം പാമ്പുമായി സാഹസം കാണിക്കുന്നതിനിടെ കടിയേല്ക്കുകയായിരുന്നു. കടിയേറ്റ ഉടനെ ഇയാള് പാമ്പിനെ സെക്യൂരിറ്റി ക്യാബിന് നേരെ വലിച്ചെറിഞ്ഞു.
പിന്നാലെ തളര്ന്നുവീണ അനില്കുമാറിനെ ദേവസ്വം ജീവനക്കാരും ഭക്തരും ചേര്ന്ന് ദേവസ്വം മെഡിക്കല് സെന്ററില് എത്തിച്ചു. പ്രാഥമിക ശുശ്രുഷയ്ക്ക് ശേഷം ഇയാളെ തൃശ്ശൂര് മെഡിക്കല് കോളേജിലേക്ക് മാറ്റി. രാവിലെ ആറുമണിയോടെ പാമ്പുപിടുത്തക്കാരെത്തി പാമ്പിനെ പിടികൂടി കൊണ്ടുപോയി. ആറടിയോളം നീളമുള്ള മൂര്ഖനെയാണ് പിടികൂടിയത്. പാമ്പിനെ പിന്നീട് എരുമപ്പെട്ടി ഫോറസ്റ്റിന് കൈമാറി.
