കൊല്ലം: സ്കൂള് കെട്ടിടത്തിന്റെ ഉദ്ഘാടനത്തിനു വരാമെന്ന് പറഞ്ഞിട്ട് എത്താതിരുന്ന വിദ്യാഭ്യാസ മന്ത്രി വി. ശിവന്കുട്ടിയോട് സങ്കടം പങ്കുവച്ച് ഒന്നാം ക്ലാസുകാരന് എഴുതിയ കത്ത് സാമൂഹിക മാധ്യമങ്ങളില് വൈറലായി. കരുനാഗപ്പള്ളി കുലശേഖരപുരം ഗവ. വെല്ഫെയര് എല്.പി. സ്കൂളിലെ ഒന്നാം ക്ലാസ് വിദ്യാര്ഥി ദേവനാഥ് എഴുതിയ കത്താണ് വൈറലായത്.
എന്റെ പ്രിയപ്പെട്ട വിദ്യാഭ്യാസ മന്ത്രി അപ്പൂപ്പനെന്ന് തുടങ്ങുന്നതാണ് കത്ത്. ''ഞാന് ഒന്നാം ക്ലാസിലെ കുട്ടിയാണ്. ഇന്നലെ ഞങ്ങളുടെ സ്കൂള് കെട്ടിടത്തിന്റെ ഉദ്ഘാടനത്തിന് വരാമെന്ന് പറഞ്ഞിട്ട് വരാഞ്ഞതില് ഞങ്ങള്ക്ക് വിഷമമായി. ഞങ്ങള് മുണ്ടും ജൂബ്ബയുമിട്ട് റോസാപ്പൂവുമായി കുറേ നേരം കാത്തിരുന്നു. ടിവിയില് കാണുന്ന അപ്പൂപ്പന് സ്കൂളില് വരുമെന്ന് ടീച്ചര് പറഞ്ഞപ്പോള് എനിക്ക് സന്തോഷം ഉണ്ടായിരുന്നു. മിനിമോള് നിസാം ആന്റി പ്രസംഗിച്ചപ്പോള് അപ്പൂപ്പന് വരത്തില്ലെന്ന് പറഞ്ഞപ്പോള് എനിക്കും കൂട്ടുകാര്ക്കും ഒത്തിരി സങ്കടമായി. ഞങ്ങളുടെ വീടിനടുത്തുള്ള മാമന്മാര് എന്നെ കളിയാക്കി. അതു കൊണ്ട് ഇനി എന്നെങ്കിലും ഞങ്ങളുടെ സ്കൂളില് വരണേ..'' ഇങ്ങനെയാണ് ആ കത്ത്.
അന്തരിച്ച കരുനാഗപ്പള്ളി മുന് എം.എല്.എ. ആര്. രാമചന്ദ്രന് മുന്കൈയെടുത്ത് റീബില്ഡ് കേരളാ പദ്ധതിയില് ഉള്പ്പെടുത്തി സ്കൂളിനു നിര്മിച്ചുനല്കിയ പുതിയ കെട്ടിടത്തിന്റെ ഉദ്ഘാടനമാണ് ഇക്കഴിഞ്ഞ തിങ്കളാഴ്ച നിശ്ചയിച്ചിരുന്നത്. വിദ്യാഭ്യാസ മന്ത്രി വി. ശിവന്കുട്ടിയായിരുന്നു ഉദ്ഘാടകന്. മന്ത്രിയെ സ്വീകരിക്കാന് കുട്ടികള് മുണ്ടും ജൂബ്ബയുമൊക്കെ അണിഞ്ഞ് കൈകളില് പൂച്ചെണ്ടുമായി കാത്തിരുന്നെങ്കിലും വന്നില്ല. തുടര്ന്നാണ് കഴിഞ്ഞ ദിവസം സ്കൂള് വാട്ട്സാപ്പ് ഗ്രൂപ്പില് ദേവനാഥ് കത്ത് എഴുതിയത്. ഈ കത്ത് സ്കൂളിന്റെ ഫെയ്സ്ബുക്ക് പേജില് അധ്യാപകര് ഷെയര് ചെയ്യുകയായിരുന്നു.
