ജീവിതത്തില് പലപ്പോഴും ഞെട്ടിക്കുന്ന വിധത്തിലുള്ള ഏതെങ്കിലുമൊരു അനുഭവത്തിലൂടെ കടന്നുപോയിട്ടുള്ളവരാണ് നമ്മളില് ഭൂരിഭാഗം ആളുകളും. ഇപ്പോഴിതാ തന്റെ ജീവിതത്തിലുണ്ടായ അത്തരം ഒരു അനുഭവം പങ്കുവച്ച് രംഗത്തെത്തിയിരിക്കുകയാണ് ഇവിടെ ഒരു യുവാവ്.
ആറ് വര്ഷം ഒരുമിച്ച് ജീവിച്ചതിന് ശേഷം ഭാര്യ സ്വന്തം സഹോദരിയാണ് എന്ന് തിരിച്ചറിഞ്ഞിരിക്കുകയാണ് ഈ യുവാവ്. ദ മിററാണ് യുവാവിനെ കുറിച്ചുള്ള വാര്ത്ത പ്രസിദ്ധീകരിച്ചത്. റെഡ്ഡിറ്റിലും യുവാവ് തന്റെ അനുഭവം പങ്ക് വച്ചിട്ടുണ്ട് എന്നാണ് പുറത്തുവരുന്ന വാര്ത്ത.
തന്റെ വൃക്കകളില് ഒന്ന് ഭാര്യയ്ക്ക് ദാനം ചെയ്യാന് ശ്രമിക്കുന്നതിനിടയിലാണ് അയാള് ഈ വസ്തുത അറിയുന്നത്. പ്രസവത്തിന് ശേഷമാണ് ഭാര്യയ്ക്ക് അസുഖം ബാധിക്കുന്നത്. മറ്റൊരു വൃക്കയ്ക്ക് വേണ്ടി അന്വേഷണം തുടങ്ങുന്നതും അപ്പോഴാണ്. ബന്ധുക്കളുടെ വൃക്ക പറ്റുമോ എന്നാണ് ആദ്യം തന്നെ പരിശോധിച്ചത്. എന്നാല്, അവരാരും ദാതാക്കളാവാന് യോഗ്യരല്ലായിരുന്നു. അങ്ങനെ തന്റെ വൃക്ക പറ്റുമോ എന്ന് പരിശോധിക്കുകയായിരുന്നു യുവാവ്. യുവാവിനാണെങ്കില് തന്റെ മാതാപിതാക്കളെ കുറിച്ച് യാതൊരു അറിവും ഇല്ലായിരുന്നു. കാരണം ജനിച്ച് രണ്ട് മിനിറ്റിനുള്ളില് അയാളെ ദത്തെടുക്കുകയായിരുന്നു. ക്ലോസ്ഡ് അഡോപ്ഷനായതുകൊണ്ട് തന്നെ വീട്ടുകാരെ കുറിച്ചുള്ള വിവരങ്ങള് രഹസ്യമായിരിക്കും.
''എച്ച്എല്എ (ഹ്യൂമന് ല്യൂക്കോസൈറ്റ് ആന്റിജന്) ടിഷ്യൂ ടെസ്റ്റ് ഫലങ്ങളില് നിന്നാണ് തനിക്ക് ഭാര്യ തന്റെ സഹോദരി തന്നെയാണ് എന്ന് മനസിലായത്. ഡോക്ടറാണ് ചില അധിക ടെസ്റ്റുകള് നടത്താന് നിര്ദ്ദേശിച്ചത്. എച്ച്എല്എ പരിശോധനയില് ഭാര്യയും താനും തമ്മില് വലിയൊരു ശതമാനം മാച്ചാണ് എന്ന് കണ്ടു. സാധാരണ അമ്മയും കുഞ്ഞും പോലും 50 ശതമാനം മാച്ചൊക്കെയാണ് വരുന്നത്. സഹാദരങ്ങള് തമ്മിലാണ് 0-100 ശതമാനം വരെ മാച്ച് വരാന് സാധ്യത. അങ്ങനെയാണ് ഭാര്യ തന്റെ സഹോദരിയായിരിക്കാം എന്ന് മനസിലാവുന്നത്' എന്ന് യുവാവ് പറയുന്നു.
നിമിഷ നേരങ്ങള്ക്കുള്ളില് തന്നെ യുവാവിന്റെ പോസ്റ്റ് വൈറലായി. നിരവധി ആളുകളാണ് പോസ്റ്റിന് കമന്റുമായി രംഗത്തെത്തിയത്. നിങ്ങള്ക്ക് നിങ്ങളുടെ വീട്ടുകാരെ കുറിച്ച് അറിയുമായിരുന്നില്ലല്ലോ. നിങ്ങളുടെ മക്കള്ക്ക് മറ്റ് ആരോഗ്യപ്രശ്നങ്ങള് ഒന്നുമില്ലെങ്കില് സ്നേഹത്തോടെയും സന്തോഷത്തോടെയും ജീവിക്കൂ എന്നാണ് പലരും കമന്റില് കുറിച്ചത്.
