ജനിക്കാനിരിക്കുന്ന കുഞ്ഞുങ്ങള്ക്ക് വേണ്ടി പല മാതാപിതാക്കളും മനോഹരമായ പേരുകള് കണ്ടെത്താറുണ്ട്. തങ്ങള്ക്ക് ഏറെ പ്രിയപ്പെട്ട പേരുകളായിരിക്കും മാതാപിതാക്കള് ഈ സന്ദര്ഭങ്ങളില് തിരഞ്ഞെടുക്കുന്നത്. എന്നാല് അതേസമയം ഒരു പേരിലൊക്കെ എന്തിരിക്കും കുഞ്ഞിന് ഏതെങ്കിലും ഒരു പേരിട്ടാല്പ്പോരെ എന്ന് ചിന്തിക്കുന്നവരും നിരവധിയാണ്. എന്നാല് കഴിഞ്ഞ ദിവസം സോഷ്യല് മീഡിയ പ്ലാറ്റ്ഫോമായ റെഡ്ഡിറ്റില് ഒരു പേരിനെ ചൊല്ലി വലിയൊരു തര്ക്കം നടക്കുകയാണ്. യുഎസ് സ്വദേശികളും സഹോദരികളുമായ രണ്ട് പേരാണ് തര്ക്കത്തിന്റെ കേന്ദ്രബിന്ദുക്കള്.
ഇനി സംഭവം എന്താണന്നല്ലേ? മൂത്ത സഹോദരി തന്റെ മകള്ക്കായി കണ്ടെത്തിയ, പേര് തന്റെ ഇളയ സഹോദരിയോട് പറയുന്നു. ഇരുവരും ഏതാണ്ട് ഒരേ സമയം ഗര്ഭിണികളായിരുന്നപ്പോഴാണ് ഈ സംഭവം. എന്നാല്, രണ്ടാമത്തെ സഹോദരി തന്റെ കുട്ടി ജനിച്ച ഉടനെ തന്നെ ചേച്ചി പറഞ്ഞ പേര് തന്റെ കുട്ടിക്ക് ഇട്ടു. ഇത് കുടുംബത്തില് ചെറിയ അസ്വാരസ്യങ്ങള് സൃഷ്ടിച്ചു. അനിയത്തി തന്നോട് വിശ്വാസ വഞ്ചന കാണിച്ചു എന്നാരോപിച്ച ചേച്ചിയും അതേ പേര് തന്റെ കുട്ടിക്കും വിളിച്ചു. പ്രശ്നങ്ങളുടെ തുടക്കം ഇവിടെ നിന്നുമാണ് എന്നാണ് യുവതി പറയുന്നത്.
താന് കണ്ടെത്തിയ പേര് തട്ടിയെടുത്ത അനിയത്തി സ്വന്തമാക്കുകയായിരുന്നെന്ന് ചേച്ചി എഴുതി. താന് വഞ്ചിക്കപ്പെട്ടതായും അവര് കുറിച്ചു. എന്നാല്, പ്രശ്നങ്ങള് അവിടെ കഴിഞ്ഞില്ല. നാലഞ്ച് വര്ഷം കഴിഞ്ഞപ്പോള് ഒരേ പേരില് സഹോദരിമാരുടെ കുട്ടികള് വളര്ന്നു. വീട്ടിലുള്ളവരുടെ പ്രശ്നങ്ങളറിയാതെ കുട്ടികള് തങ്ങളുടെ പേര് ആര് വിളിച്ചാലും ഒരുമിച്ച് ഓടിയെത്തി. ഇത് കുടുംബത്തില് വീണ്ടും പ്രശ്നങ്ങള് സൃഷ്ടിച്ചു. താന് കുടുംബത്തില് അപമാനിക്കപ്പെടുന്നതായി ചേച്ചിക്ക് തോന്നി. അവര് ന്റെ മനപ്രയാസം സാമൂഹിക മാധ്യമമായ റെഡ്ഡിറ്റിലൂടെ പങ്കുവച്ചു. മകളുടെ പേര് ആദ്യം കണ്ടെത്തി, അത് സഹോദരിയെ അറിയിച്ചത് താനാണ്. എന്നാല് അവള് ആ പേര് സ്വന്തം കുട്ടിക്ക് നല്കി. ഇത് തന്നെ അപമാനിച്ചതിന് തുല്യമാണെന്നായിരുന്നു സഹോദരി കുറിച്ചത്.
എന്നാല് ചേച്ചി പങ്കുവച്ച കുറിപ്പിനടയില് അനിയത്തി തന്റെ ഭാഗം ന്യായീകരിച്ച് എത്തി. ആ പേരിനോട് തനിക്ക് ദീര്ഘമായ ആത്മബന്ധം ഉണ്ടെന്നും അതിനാല് മകളുടെ പേര് മാറ്റില്ലെന്നും അനിയത്തി എഴുതി. മക്കളുടെ പേരിനെ ചൊല്ലിയുള്ള കുടുംബവഴക്ക് വളരെ പെട്ടെന്ന് റെഡ്ഡിറ്റില് വ്യാപകമായി പ്രചരിക്കപ്പെട്ടു. നിരവധി ആളുകള് അഭിപ്രായങ്ങളുമായി രംഗത്തെത്തി. ചിലര്, പേരില് തനിപ്പകര്പ്പവകാശം ആര്കാണെന്ന് കുറിച്ചു. മറ്റ് ചിലര് ചേച്ചിയോട് മകളുടെ പേര് മാറ്റി കുടുംബത്തിലെ സംഘര്ഷം ഒഴിവാക്കാന് നിര്ദ്ദേശിച്ചു. എന്നാല് ഇരുവരും അതിന് തയ്യാറായിരുന്നില്ല. പേര് ചെറിയ പൊല്ലാപ്പല്ലെന്നും അതിന് കുടുംബ ബന്ധങ്ങളെ പോലും തകര്ക്കാന് കഴിയുമെന്ന് ഇപ്പോഴാണ് മനസിലായതെന്നായിരുന്നു മറ്റൊരു കാഴ്ചക്കാരന് പറഞ്ഞത്.
