വാഷിങ്ടണ്: ഗൂഗിളിന്റെ എഐ രഹസ്യ വിവരങ്ങള് ചോര്ത്തിയ ചൈനീസ് പൗരനെ അറസ്റ്റ് ചെയ്തതാതയി യുഎസ് നീതിന്യായ വകുപ്പ് അറിയിച്ചു. ഗൂഗിളിന്റെ മുന് ആര്ട്ടിഫിഷ്യല് ഇന്റലിജന്സ്(എഐ) എഞ്ചിനീയറായിരുന്നു ഇയാള്. ചൈനയില് സ്വന്തം കമ്പനി സ്ഥാപിക്കാനാണ് ഗൂഗിളിന്റെ നൂതന സാങ്കേതിക വിദ്യാ വിവരങ്ങള് മോഷ്ടിച്ചത്. സംഭവത്തില് ലിയോണ് ഡിങ്(38) ആണ് അറസ്റ്റിലായത്. നാല് വ്യാപാര രഹസ്യങ്ങള് മോഷ്ടിച്ചെന്ന കുറ്റം ചുമത്തി ഇയാളെ കാലിഫോണ്ണിയയിലെ നെവാര്ക്കില് തടവിലാക്കി.
''രാജ്യത്തിന്റെ ദേശീയ സുരക്ഷയെ അപകടത്തിലാക്കുന്ന ആര്ട്ടിഫിഷ്യല് ഇന്റലിജന്സിന്റെയും മറ്റ് നൂതന സാങ്കേതികവിദ്യകളുടെയും മോഷണം നീതിന്യായ വകുപ്പ് വെച്ചുപൊറുപ്പിക്കില്ല'' യുഎസ് അറ്റോര്ണി ജനറല് മെറിക്ക് ഗാര്ലന്ഡ് പറഞ്ഞു. കുറ്റം തെളിയിക്കപ്പെട്ടാല് ലിയോണ് ഡിങ്ങിന് പരമാവധി 10 വര്ഷം തടവും ഒരു മില്യണ് യുഎസ് ഡോളര് വരെ പിഴയും ലഭിക്കും.
2019 ലാണ് ഗൂഗിള് സോഫ്റ്റ്വെയറ എഞ്ചീനിയറായി ലിയോണ് ഡിങ് നിയമിക്കുകയും കമ്പനിയുടെ സൂപ്പര് കമ്പ്യൂട്ടിംഗ് ഡാറ്റാ സെന്ററുകളില് ജോലി ചെയ്യുകയും ചെയ്തു. 2022 മെയ് ല് ഒരു സ്വകാര്യ ഗൂഗിള് ക്ലൗഡ് അക്കൗണ്ടിലേക്ക് ലിയോണ് ഗൂഗിളിന്റെ രഹസ്യ വിവരങ്ങള് അപ്ലോഡ് ചെയ്യാന് തുടങ്ങിയെന്നും 2023 മെയ് മാസത്തോടെ 500 ഫയലുകള് അപ്ലോഡ് ചെയ്തിട്ടുണ്ടെന്നും പ്രോസിക്യൂട്ടര്മാര് പറഞ്ഞു.
ജനുവരി ആറിന് ഇയാളുടെ വസതിയില് എഫ്ബിഐ നടത്തിയ പരിശോധനയില് ഇയാളുടെ ഇലക്ട്രോണിക് ഉപകരണങ്ങളും മറ്റ് തെളിവുകളും പിടിച്ചെടുത്തതായും വാഷിംഗ്ടണ് പോസ്റ്റ് റിപ്പോര്ട്ട് ചെയ്തു.
