മട്ടന് എന്ന പേരില് ലാഭം കൂട്ടാന് ബീഫ് സമൂസ വില്പന നടത്തിയതിന് ഗുജറാത്തില് ഏഴ് പേർ അറസ്റ്റിൽ. ഗോവധ നിരോധന നിയമപ്രകാരമാണ് ഇവരെ അറസ്റ്റ് ചെയ്തത്. ലാഭം നേടുന്നതിനായി കടയിൽ വിൽക്കുന്ന മട്ടൺ സമൂസയിൽ വിലകുറഞ്ഞ ബീഫ് നിറച്ചെന്നാണ് ആരോപണം.
രഹസ്യ വിവരത്തിന്റെ അടിസ്ഥാനത്തിൽ വഡോദരയിലെ പാനിഗേറ്റ് ഏരിയയിലെ ഹുസൈനി സമൂസ കേന്ദ്രത്തിൽ പോലീസ് നടത്തിയ റെയ്ഡിൽ 113 കിലോ ഇറച്ചിയാണ് പിടികൂടിയത്. തുടർന്ന് ഫോറൻസിക് ലാബിൽ പരിശോധനയ്ക്ക് അയച്ചപ്പോഴാണ് പശുവിന്റെ ഇറച്ചിയാണ് ഇതെന്ന്
സ്ഥിരീകരിച്ചത്. ഉടമകളായ യൂസഫ് ഷെയ്ഖ്, നയീം ഷെയ്ഖ് എന്നിവരെയും അവരുടെ നാല് തൊഴിലാളികളെയും പോലീസ് അറസ്റ്റ് ചെയ്തിട്ടുണ്ട്.
ചോദ്യം ചെയ്യലിൽ ഇമ്രാൻ ഖുറേഷി തങ്ങൾക്ക് ബീഫ് നൽകിയിരുന്നതായി ഉടമകൾ വെളിപ്പെടുത്തി. ഇവരുടെ മൊഴിയുടെ അടിസ്ഥാനത്തിൽ പൊലീസ് ഖുറേഷിയെ അറസ്റ്റ് ചെയ്തു.
ചിലർ പശുവിന്റെ മാംസം ഉപയോഗിച്ച് വീട്ടിൽ നിന്ന് സമൂസ വിൽക്കുന്നതായി വിവരം ലഭിച്ചതായും 61 കിലോ പാകം ചെയ്ത സമൂസ, 113 കിലോ ബീഫ്, 152 കിലോ സമൂസ എന്നിവ പിടിച്ചെടുത്തതായും വഡോദര ഡെപ്യൂട്ടി പോലീസ് കമ്മീഷണർ പന്ന മോമയ പറഞ്ഞു. ഞങ്ങൾ മെറ്റീരിയൽ ഫോറൻസിക് ലാബിലേക്ക് അയച്ചു അത് പശുവിൻ്റെ മാംസമാണെന്ന് സ്ഥിരീകരിച്ചുവെന്നും അദ്ദേഹം പറഞ്ഞു.
