മലയാള സിനിമയുടെ പ്രിയപ്പെട്ട മുത്തശ്ശി, പല്ലില്ലാത്ത വായകാട്ടി നിഷ്കളങ്കമായി ചിരിച്ച് പ്രേക്ഷകരുടെ മനംകവർന്ന സുബ്ബലക്ഷ്മി ഓർമ്മയായിട്ട് നാലു മാസങ്ങൾ പിന്നിടുന്നു. പോയവർഷം ഡിസംബർ മാസം ഒന്നാം തിയതിയാണ് സുബ്ബലക്ഷ്മി വിടവാങ്ങിയത്. സിനിമാ, സീരിയൽ മേഖലകളിൽ സുബ്ബലക്ഷ്മി വർഷങ്ങളായി നിറസാന്നിദ്ധമാണ്. മകൾ താരാ കല്യാണും അഭിനയ രംഗത്തെ പരിചിതമുഖം തന്നെ.
സുബ്ബലക്ഷ്മി മുത്തശ്ശി വിടവാങ്ങിയെങ്കിലും, അവരുടെ ഓർമ്മകൾ ഇനിയും ബാക്കിയുണ്ട്. അമ്മയുടെ മരണശേഷം തിരുവനന്തപുരത്തെ ഫ്ലാറ്റിൽ മകൾ താരാ കല്യാണും കൊച്ചുമകൾ സൗഭാഗ്യ വെങ്കിടേഷും സന്ദർശനം നടത്തി ഒരു വ്ലോഗ് പോസ്റ്റ് ചെയ്തിരുന്നു.
അവിടെ സുബ്ബലക്ഷ്മി ബാക്കിയായ നിരവധി വസ്തുക്കളുണ്ട്. അമ്മയുടെ പൂജാമുറി അതിവിശേഷമാണ്. അതുപോലെ അലമാരിയിൽ അടുത്ത തലമുറയ്ക്കായി അവർ കാത്തുസൂക്ഷിച്ച മറ്റുചിലതുമുണ്ട്. ആ ഓർമകളെ ചേർത്തുപിടിച്ച് മകൾ താരാ കല്യാൺ ലൊക്കേഷനിലെത്തുന്നു.
അമ്മക്കിളി എന്ന് അന്നും ഇന്നും എന്നും സ്നേഹത്തോടെ വിശേഷിപ്പിക്കുന്ന അമ്മയുടെ മനോഹരമായ സാരികൾ ഇപ്പോൾ താരയുടെ പക്കലുണ്ട്. ആ സാരികൾ ഷൂട്ടിങ്ങിൽ പലപ്പോഴായി താര അണിയുന്നുമുണ്ട്. ആ ചിത്രങ്ങൾ ചേർത്തൊരു കൊളാഷ് ആക്കി താരാ കല്യാൺ ഇൻസ്റ്റഗ്രാമിൽ പോസ്റ്റ് ചെയ്തു.
മലയാള സീരിയൽ രംഗത്തെ നിറസാന്നിധ്യമാണ് താരാ കല്യാൺ. ഇപ്പോൾ ജോലിക്ക് പോകുമ്പോൾ അണിയാൻ അമ്മയുടെ സാരികൾ ഒപ്പമുള്ളതിന്റെ സന്തോഷം താരാ കല്യാണിന്റെ പോസ്റ്റിൽ കാണാം. സാരികൾ മനോഹരമായിരിക്കുന്നു എന്ന് അവരുടെ ആരാധകർ കമന്റ്റ് ചെയ്യുന്നു.
കുറച്ചു നാളുകൾക്ക് മുൻപ് താരാ കല്യാണിന് തൊണ്ടയിലെ ശസ്ത്രക്രിയ നടന്നിരുന്നു. ദീർഘനാൾ ശബ്ദം പുറത്തുവരാത്ത സാഹചര്യവും ഉണ്ടായിരുന്നു. അപ്പോഴും സോഷ്യൽ മീഡിയയിൽ താരാ കല്യാൺ സജീവമാകാൻ ശ്രദ്ധിച്ചു.
