നസ്ലിൻ, മമിത ബൈജു എന്നിവരെ കേന്ദ്ര കഥാപാത്രങ്ങളാക്കി ഗിരീഷ് എ ഡി സംവിധാനം ചെയ്ത ‘പ്രേമലു’ അടുത്തിടെ ഇറങ്ങിയ മലയാള സിനിമകളില് തരംഗമായി മാറിയ ഒരു സിനിമയാണ്. മലയാളത്തില് മാത്രമല്ല തെന്നിന്ത്യൻ സിനിമ ലോകത്തും ഏറ്റവും ജനപ്രീതി നേടിയ ചിത്രങ്ങളിലൊന്നായി പ്രേമലു മാറി. ഗിരീഷ് എ.ഡിയും കിരണ് ജോസിയും ചേർന്ന് തിരക്കഥയൊരുക്കിയ ചിത്രം ഹൈദരാബാദിന്റെ പശ്ചാത്തലത്തില് ഒരുങ്ങിയതാണ്. ഭാവന സ്റ്റുഡിയോസിന്റെ ബാനറില് ദിലീഷ് പോത്തൻ, ശ്യാം പുഷ്കരൻ, ഫഹദ് ഫാസില് എന്നിവർ ചേർന്നാണ് നിർമ്മാണം.
ശ്യാം മോഹൻ, അഖില ഭാർഗവൻ, അല്ത്താഫ് സലിം,സംഗീത് പ്രതാപ്, മീനാക്ഷി രവീന്ദ്രൻ, മാത്യു തോമസ് എന്നിവരായിരുന്നു മറ്റ് താരങ്ങള്. യുവാക്കളുടെ ഹരമായി മാറിയ ഈ ചിത്രത്തിന് തിയേറ്റില് നിന്ന് ആവേശകരമായ പ്രതികരണമാണ് ലഭിച്ചത്. മറുഭാഷാ പ്രേക്ഷകര്ക്കിടയിലും ശ്രദ്ധ നേടിയ ചിത്രമാണ് പ്രേമലു. മലയാളം പതിപ്പ് തന്നെ മറ്റ് തെന്നിന്ത്യന് സംസ്ഥാനങ്ങളില് ശ്രദ്ധ നേടിയിരുന്നു. ചിത്രം വന് വിജയമായതിന് പിന്നാലെ ആദ്യം തെലുങ്ക് പതിപ്പും പിന്നീട് തമിഴ് പതിപ്പും അതത് സംസ്ഥാനങ്ങളില് എത്തി. അവയും മികച്ച കളക്ഷന് നേടി.
ഇപ്പോഴിതാ സിനിമയുടെ മേക്കിംഗ് വീഡിയോ പുറത്തുവിട്ടിരിക്കുകയാണ് നിര്മ്മാതാക്കളായ ഭാവന സ്റ്റുഡിയോസ്. നസ്ലിൻ ഉള്പ്പെടെയുള്ള താരങ്ങള് സിനിമയില് അഭിനയിച്ച രംഗങ്ങളുടെ ചിത്രീകരണ ദൃശ്യങ്ങള് വീഡിയോയില് കാണാം. ഷൂട്ടിനിടയിലെ രസകരമായ സംഭവങ്ങളും പൊട്ടിച്ചിരികളും ആഘോഷനിമിഷങ്ങളും സീനുകള് ഷൂട്ട് ചെയ്യുമ്പോഴുള്ള എഫര്ട്ടുകളുമെല്ലാം വീഡിയോയിലുണ്ട്. ലൊക്കേഷനിലെ ഓരോ നിമിഷങ്ങളും ആസ്വദിക്കുന്ന താരങ്ങളെയും അണിയറപ്രവര്ത്തകരെയും വീഡിയോയില് കാണാം. സിനിമ പോലെ തന്നെ മേക്കിംഗ് വീഡിയോയും തരംഗമാക്കുകയാണ് ആരാധകര്.
