ജിത്തു മാധവന് സംവിധാനം ചെയ്ത് ഫഹദ് ഫാസില് കേന്ദ്രകഥാപാത്രമായി എത്തിയ ‘ആവേശം’ തിയേറ്ററുകളില് തരംഗം സൃഷ്ടിക്കുകയാണ്. സിനിമയിലെ ഡയലോഗുകളും സീനുകളും പാട്ടുകളുമടക്കം എല്ലാം സോഷ്യല് മീഡിയയില് ആവേശം സൃഷ്ടിക്കുകയാണ്. ഫഹദിന്റെ ആരാധകര് ഒന്നടങ്കം സിനിമ ആഘോഷമാക്കുകയാണ്.
ഇപ്പോഴിതാ ‘ആവേശം’ കണ്ടതിന്റെ ത്രില്ലിലാണ് തെന്നിന്ത്യൻ താരം സാമന്ത. ‘‘എല്ലാവരും എത്രയും വേഗം സിനിമ കാണൂ... ഇപ്പോഴും ചിത്രത്തിന്റെ ഹാംഗ് ഓവറിലാണ്...’’ താരം ഇൻസ്റ്റ സ്റ്റോറിയിലൂടെ കുറിച്ചു. ‘‘ആവേശം ശരിക്കുമൊരു ഭ്രാന്തായിരുന്നു, ഞാൻ ഇഷ്ടപ്പെടുന്ന തരത്തിലുള്ള ഭ്രാന്ത്!
ചട്ടങ്ങൾ തെറ്റിക്കാൻ വേണ്ടി ഉണ്ടാക്കിയതാണത്... സീനിൽ നിന്ന് സീനുകളിലേക്ക് ശരിക്കുമൊരു തരം മാറ്റം... പേടിച്ചു, ചിരിച്ചു, പേടിച്ചു ചിരിച്ചു... ചില സിനിമകൾ തീയേറ്ററിൽ അനുഭവിച്ചറിയണം.. അത്തരത്തിലുള്ള ഒരു സിനിമയാണിത്.
(എനിക്കു വേണ്ടിയുള്ള ഒരു നോട്ട്... ഞാൻ എവിടെയോ വായിച്ച സ്റ്റിറോയിഡുകളെക്കുറിച്ചുള്ള ഫഫ ഫിലിം ...ഫഫ ഒരിക്കലും നഷ്ടപ്പെടുത്തരുത്...ഫഫ മുന്നോട്ടു പോകൂ...)ഈ അവിശ്വസനീയമായ ടീമിന് അഭിനന്ദനങ്ങൾ നിങ്ങൾ ഒരു സമ്പൂർണ്ണ പ്രചോദനമാണ്...’’ സാമന്ത കുറിച്ചു.
മാത്രവുമല്ല സുഷിൻ ശ്യാമിന്റെ സംഗീതത്തെയും സാമന്ത പ്രശംസിച്ചിട്ടുണ്ട്. സുഷിനെ ജീനിയസ് എന്നാണ് താരം വിശേഷിപ്പിച്ചത്. ചിത്രത്തിലെ ഗാനത്തിനൊപ്പമാണ് സാമന്തയുടെ പോസ്റ്റ്. മുന്പൊരിക്കല് താന് ഫഹദ് ഫാസിലിന്റെ ഫാനാണെന്ന് സാമന്ത പറഞ്ഞിട്ടുണ്ട്. സൂപ്പര് ഡിലക്സ് എന്ന ഫഹദ് ഫാസിൽ അഭിനയിക്കുന്ന തമിഴ് ചിത്രത്തില് വിജയ് സേതുപതിയും സാമന്തയും ചിത്രത്തില് പ്രധാന വേഷത്തില് എത്തുന്നുണ്ട്.
ബോക്സോഫീസിൽ മികച്ച പ്രതികരണമാണ് സിനിമ നേടിക്കൊണ്ടിരിക്കുന്നത്. ഫഹദിന് പുറമെ മൻസൂർ അലി ഖാൻ, ആശിഷ് വിദ്യാർത്ഥി, സജിൻ ഗോപു, പ്രമുഖ മലയാളി ഗെയിമറും യൂട്യൂബറുമായ ഹിപ്സ്റ്റർ, മിഥുൻ ജെഎസ്, റോഷൻ ഷാനവാസ്, പൂജ മോഹൻരാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ തുടങ്ങി നിരവധി പേർ ചിത്രത്തിലുണ്ട്. സമീർ താഹിർ ആണ് ചിത്രത്തിന്റെ ഛായാഗ്രഹണം. രോമാഞ്ചത്തിലെ ഹിറ്റ് കൂട്ടുകെട്ട് ആവർത്തിച്ചുകൊണ്ട് വിനായക് ശശികുമാറിന്റെ വരികൾക്ക് സുഷിൻ ശ്യാമാണ് സംഗീതം പകർന്നിരിക്കുന്നത്.
ആവേശം എന്ന സിനിമ ആഗോളതലത്തില് 100 കോടി ക്ലബിലേക്ക് അതിവേഗം കുതിക്കും എന്നുമാണ് റിപ്പോര്ട്ട്. ഫഹദിന്റെ എക്കാലത്തെയും വൻ ഹിറ്റായി മാറിയിരിക്കുകയാണ് സിനിമ. ഫഹദിന്റെ മികച്ച പ്രകടനം തന്നെയാണ് ആവേശത്തിന്റെ പ്രധാന ഒരു ആകര്ഷണം. രംഗ എന്ന വേറിട്ട ഒരു കഥാപാത്രമായിട്ടാണ് നായകൻ ഫഹദ് ആവേശത്തില് എത്തിയിരിക്കുന്നത്. ചിത്രത്തില് ഉടനീളം നിറഞ്ഞാടുകയാണ് ഫഹദ്.
ആവേശം അന്വര് റഷീദ് എന്റര്ടൈന്മെന്റ്സിന്റെ ബാനറില് അന്വര് റഷീദ് നിര്മാണം നിര്വഹിക്കുന്നത്. നിര്മാണത്തില് നസ്രിയ നസീമും പങ്കാളിയാണ്.
