ട്വിസ്റ്റുകളും ടേര്ണുകളും ഏറെ നിറഞ്ഞാണ് ബിഗ് ബോസ് മലയാളം സീസണ് 6 ന്റെ ഓരോ എപ്പിസോഡും പ്രേക്ഷകര്ക്ക് മുന്നിലെത്തുന്നത്. പലപ്പോഴും മത്സരാര്ത്ഥികള് തമ്മിലുള്ള സംസാരവും ഇടപെടലുമൊന്നും പ്രേക്ഷകര്ക്ക് മനസ്സിലാകാത്ത രീതിയിലേക്കാണ് പോകുന്നത്. വിവാദങ്ങളും പരിഹാസങ്ങളും നിറച്ചാണ് ഓരോ എപ്പിസോഡുകള്ക്ക് താഴെയും പ്രേക്ഷകര് കമന്റുകളിടുന്നത്. അക്കൂട്ടത്തില് ഏറെ ചര്ച്ചച്ചെയ്യപ്പെട്ട രണ്ടു പേരുകളാണ് ജാസ്മിനും ഗബ്രിയും. 50 ദിവസങ്ങളിലേക്ക് ഷോ അടുക്കുമ്പോള് ഈ സീസണില് ഏറെ ചര്ച്ചയായ മത്സരാര്ത്ഥികളാണ് ഇവര്. രണ്ടുപേരും തമ്മിലുള്ളത് പ്രണയമാണോ അതോ മറ്റെന്തിങ്കിലുമാണോ എന്നു തോന്നിപ്പിക്കുന്ന തരത്തിലാണ് ഓരോ തവണയും ഇവര് രണ്ടാളും പെരുമാറുന്നത്.
ഇപ്പോഴിതാ ഗബ്രിയോട് നേരിട്ട് തന്നോടുള്ള അടുപ്പം എന്താണെന്ന് ചോദിക്കുകയാണ് ജാസ്മിന്. ഗബ്രി അതിനു പറയുന്ന മറുപടിയും ജാസ്മിനെ അമ്പരപ്പിക്കുന്നുണ്ട്. ഇതോടെ ജാസ്മിന്, ഗബ്രി കൂട്ട് പിരിയുകയാണോ എന്ന ചോദ്യമാണ് ഉയരുന്നത്. പുതിയ ബിഗ് ബോസ് പ്രമോ പുറത്തു വന്നിട്ടുണ്ട്. റെസ്മിന്, ജാസ്മിന്, ഗബ്രി എന്നിവരാണ് പ്രമോയില് ഉള്ളത്.
‘‘എനിക്ക് ഇതിന് അടിവര ഇടണം...ഫ്രണ്ട്ഷിപ്പിന് മുകളിലാണ് എന്ന് പറഞ്ഞിട്ട് പ്രണയിതാക്കളുടെ പ്രവര്ത്തികള് കാണിക്കുമ്പോള് ബന്ധം കിട്ടുന്നില്ല...’’ ജാസ്മിന് പറയുന്നു. ‘‘ഒന്നുകില് ഞാന് ഈ വീട്ടില് നിന്നു പോകണം. അല്ലെങ്കില് ഇവള് ഈ വീട്ടില് നിന്നും പോകണം. അങ്ങനെ ആണെങ്കില് ഇതിലൊരു ക്ലാരിറ്റി വരും...’’മറുപടിയായി ഗബ്രി പറയുന്നു. ‘‘പക്ഷേ എത്രനാള് നീ ഒരു സത്യത്തെ കള്ളമാക്കി പറഞ്ഞുകൊണ്ടിരിക്കും...’’ എന്നായി ജാസ്മിന്. ‘‘എന്ത് സത്യത്തെയാണ് ഞാന് കള്ളമാക്കി പറയണേ..’’ എന്ന് ഗബ്രി ചോദിക്കുന്നുണ്ട്. ‘‘എനിക്ക് ഇവനെ ഭയങ്കര ഇഷ്ടമാണ്...’’ എന്നായിരുന്നു ജാസ്മിന്റെ മറുപടി.
‘‘എനിക്ക് ഇവളെ ഇഷ്ടമാണ്. എന്നുവച്ച് ഇവളുമായി റിലേഷന്ഷിപ്പില് ആകാനോ ഇവളെ കല്യാണം കഴിക്കാനോ എനിക്ക് പറ്റില്ല...’’ എന്നുകൂടി ഗബ്രി പറയുന്നു. ‘‘ഇതോടെ എന്റെ ചോദ്യത്തിനുള്ള ഉത്തരം എനിക്ക് കിട്ടി..’’ എന്ന് ജാസ്മിന് റെസ്മിനോട് പറയുന്നു. ഇങ്ങനെയാണ് പ്രമോ അവസാനിക്കുന്നത്.
