നടനും സംവിധായകനുമായ ബേസിൽ ജോസഫിന്റെ ജന്മദിനമാണ് ഏപ്രിൽ 28. ആരാധകരും സിനിമ താരങ്ങളും അടക്കം നിരവധി ആളുകളാണ് ബേസിലിന് ജന്മദിനാശംസകൾ നേരുന്നത്. ബേസിലിന്റെ അടുത്ത സുഹൃത്തും നടനുമായ ടൊവിനോ തോമസ് സോഷ്യൽ മീഡിയയിൽ പങ്കുവച്ച ഒരു വീഡിയോയാണ് ഇപ്പോൾ ശ്രദ്ധനേടുന്നത്.
വള്ളം തുഴയുന്ന രംഗങ്ങളിൽ അഭിനയിക്കുന്ന ബേസിലിന്റെ വീഡിയോയാണ് ടൊവിനോ പങ്കുവച്ചത്. മുടി ഒരുവശത്തേക്ക് ചീവിയൊതുക്കി, കണ്ണാടിവച്ച് വിന്റേജ് ലുക്കിലുള്ള ബേസിലിനെയാണ് വീഡിയോയിൽ കാണുന്നത്. വള്ളം തുഴയുന്നതിനൊപ്പം 'അഴകിയ രാവണൻ' എന്ന സിനിമയിലെ "വെണ്ണിലാ ചന്ദനക്കിണ്ണം പുന്നമടക്കായലിൽ വീണേ..." എന്നു തുടങ്ങുന്ന ഗാനവും ബേസിൽ ആലപിക്കുന്നുണ്ട്.
ജന്മദിനാശംസ നേർന്നുകൊണ്ടു പങ്കുവച്ച വീഡിയോയിൽ നിരവധി ചലച്ചിത്ര താരങ്ങളും ആരാധകരുമാണ് രസകരമായ കമന്റുകൾ പങ്കുവയ്ക്കുന്നത്. "ഷിബുവിന് മിന്നലടിച്ചപ്പോ സംവിധായകൻ കൂടെയുണ്ടാരുന്നോ" എന്നാണ് നടൻ സഞ്ചു ശിവരാം കമന്റു ചെയ്തത്. "നട്ടുച്ചയ്ക്ക് പാടാൻ പറ്റിയ പാട്ട്" എന്നാണ് മറ്റൊരു കമന്റ്.
വിനീത് ശ്രീനിവാസൻ സംവിധാനം ചെയ്ത 'വർഷങ്ങൾക്ക് ശേഷം' എന്ന ചിത്രത്തിന് വിജയത്തിന് ശേഷം, വിനു രാമചന്ദ്രൻ സംവിധാനം ചെയ്യുന്ന ഗുരുവായൂർ അമ്പലനടയിൽ എന്ന ചിത്രത്തിൽ അഭിനയിക്കുകയാണ് ബേസിൽ. പൃഥ്വിരാജ്, യോഗി ബാബു, നിഖില വിമൽ, അനശ്വര രാജൻ തുടങ്ങി വൻ താരനിരയാണ് ചിത്രത്തിൽ അണിനിരക്കുന്നത്. ടൊവിനോയ്ക്കൊപ്പം ബേസിൽ അഭിനയിക്കുന്ന 'അജയന്റെ രണ്ടാം മോഷണം' എന്ന ചിത്രവും അണിയറയിൽ ഒരുങ്ങുകയാണ്.
