മറ്റുള്ള രാജ്യങ്ങളിലെ സ്ത്രീകളില് നിന്നും വളരെ വ്യത്യസ്തരാണ് ഇന്ത്യന് സ്ത്രീകള്. കാരണം ജനിച്ച അന്ന് മുതല് നാല് ചുവരുകള്ക്കുള്ളിലാണ് അവരുടെ ജീവിതം. പലപ്പോഴും സ്വന്തം ആഗ്രഹങ്ങളും സ്വപ്നങ്ങളും എല്ലാം ത്യജിച്ച് കുടുംബത്തിനും കുട്ടികള്ക്കും ഒക്കെ വേണ്ടി ജീവിക്കുന്നവരായി മാറാറുണ്ട്. ഇത്തരം ദൗര്ഭാഗ്യകരമായ അവസ്ഥയാണെങ്കിലും പലപ്പോഴും അവര് ആരോടും പരാതിപ്പെടാനും പോകാറില്ല. അത് തിരിച്ചറിയാന് പുരുഷന്മാരും ശ്രമിക്കാറില്ല. എന്തായാലും, സമാനമായ ഒരനുഭവമാണ് തന്റെ അമ്മയെ കുറിച്ച് ഒരു യുവാവ് പങ്കുവച്ചിരിക്കുന്നത്.
ബംഗളൂരുവില് നിന്നുള്ള ഒരു യുവാവാണ് തന്റെ അമ്മയുടെ ഹൃദയസ്പര്ശിയായ വീഡിയോയും പോസ്റ്റും പങ്കുവച്ചിരിക്കുന്നത്. നീണ്ട 60 വര്ഷത്തിന് ശേഷം തന്റെ അമ്മ അവരുടെ കടമകളില് നിന്നും ഇടവേളയെടുത്തിരിക്കുന്നു എന്നാണ് യുവാവ് പറയുന്നത്. അതുവരേയും അവര് തന്റെ അച്ഛന്റെ കാര്യം നോക്കിയിരിക്കുകയായിരുന്നു എന്നും പോസ്റ്റില് പറയുന്നു. ഒപ്പം ഇന്ത്യയിലെ പുരുഷന്മാര് ഇന്ത്യന് സ്ത്രീകളെ അര്ഹിക്കുന്നില്ല എന്നും യുവാവ് കുറ്റപ്പെടുത്തുന്നുണ്ട്.
വീഡിയോയില് യുവാവിന്റെ അമ്മ മഞ്ഞുകൊണ്ട് കളിക്കുന്നതും ആ യാത്ര ആസ്വദിക്കുന്നതുമാണ് കാണുന്നത്. അവര് ഏറെക്കാലം കാത്തിരുന്നതാണ് ഈ വെക്കേഷന് എന്ന് ആ വീഡിയോ കാണുമ്പോള് തന്നെ മനസിലാവും. ഇന്ത്യയിലെ മിക്കവാറും സ്ത്രീകളുടെയും അവസ്ഥ ഇത് തന്നെയാണ് എന്നാണ് വീഡിയോയുടെ കമന്റുകളില് നിന്നും മനസിലാവുന്നത്.
നിരവധിപ്പേരാണ് തങ്ങളുടെ അമ്മയുടെ അനുഭവവും സമാനമായിരുന്നു എന്ന് കുറിച്ചിരിക്കുന്നത്. 'തമാശയല്ല, എന്റെ അച്ഛന് മരിച്ചതിന് ശേഷമാണ് എന്റെ അമ്മ നല്ല വിശ്രമജീവിതം നയിക്കുന്നത് എന്ന് എനിക്ക് വ്യക്തിപരമായി തോന്നുന്നു. ഇപ്പോള് അവര് നന്നായി ചിരിക്കുന്നു, ഞാന് എന്റെ അച്ഛന് എതിരല്ല, ഇതെന്റെ പൊതുവായ നിരീക്ഷണം മാത്രമാണ്' എന്നാണ് ഒരാള് പോസ്റ്റിന് കമന്റ് നല്കിയിരിക്കുന്നത്. ശരിക്കും ഇന്ത്യയിലെ പുരുഷന്മാര് ഇന്ത്യയിലെ സ്ത്രീകളെ അര്ഹിക്കുന്നില്ല, തങ്ങളുടെ അമ്മമാരുടെ കഷ്ടപ്പാടും ത്യാ?ഗവും തന്നെയാണ് അതിന് കാരണം എന്ന് കുറിച്ചവരും അനേകമുണ്ട്.
