കോണ്ഗ്രസ് സ്ഥാനാര്ത്ഥി കനയ്യാകുമാര് ഡല്ഹിയിലെ ഏറ്റവും ദരിദ്രരായ സ്ഥാനാര്ത്ഥികളുടെ പട്ടികയില്. നോര്ത്തീസ്റ്റ് ഡല്ഹിയില് നിന്നും മത്സരിക്കാന് നാമനിര്ദേശ പത്രിക സമര്പ്പിച്ച പ്രമുഖ സ്ഥാനാര്ത്ഥികളുടെ പട്ടികയിലാണ് കനയ്യാകുമാര്. മെയ് 25 ന് നടക്കുന്ന വോട്ടെടുപ്പ് നടക്കുന്ന ഡല്ഹിയിലെ ഏഴു ലോക്സഭാ മണ്ഡലങ്ങളിലേക്ക് തിങ്കളാഴ്ച 268 സ്ഥാനാര്ത്ഥികളാണ് പത്രിക സമര്പ്പിച്ചത്.
കഴിഞ്ഞ ഏപ്രിലില് മന്ത്രിസ്ഥാനം രാജിവെച്ച് ലോക്സഭയിലേക്ക് മത്സരിക്കാന് പത്രിക സമര്പ്പിച്ച രാജ്കുമാര് ആനന്ദാണ് ഏറ്റവും സമ്പന്നനായ സ്ഥാനാര്ത്ഥി. ഡല്ഹി മുഖ്യമന്ത്രി അരവിന്ദ് കെജ്രിവാള് തടവിലായിരിക്കുന്ന സാഹചര്യത്തില് രാജ്കുമാര് ആനന്ദിന്റെ രാജി ഇതുവരെ സ്വീകരിച്ചിട്ടില്ല. ന്യൂഡല്ഹി സീറ്റില് ബിഎസ്പിയുടെ ടിക്കറ്റില് മത്സരിക്കുന്ന രാജ്കുമാര് ആനന്ദ് തെരഞ്ഞെടുപ്പ് കമ്മീഷന് മുമ്പാകെ നല്കിയിരിക്കുന്ന രേഖകളില് കാണിച്ചിരിക്കുന്നത് 84 കോടിയുടെ സ്വത്താണ്.
കനയ്യാകുമാറിന് ചലിക്കുന്നതും അല്ലാത്തതുമായ സ്വത്ത് 11 ലക്ഷത്തില് താഴെയാണ്. 50 പേര് മത്സരിക്കാന് പത്രിക സമര്പ്പിച്ച വടക്കുകിഴക്കന് ഡല്ഹിയിലാണ് ഏറ്റവും കൂടുതല് സ്ഥാനാര്ത്ഥികളുള്ളത്. കിഴക്കന് ഡല്ഹിയില് 39 പേരും പടിഞ്ഞാറന്, ന്യൂ ഡല്ഹികളില് 38 പേരും ചാന്ദ്നി ചൗക്കില് 37 പേരുമാണ് മത്സരിക്കുന്നത്. ഏറ്റവും കുറവ് സ്ഥാനാര്ത്ഥികള് ഉള്ളത് ദക്ഷിണ ഡല്ഹിയിലാണ്.
