കാര്യസ്ഥന് എന്ന മലയാള ചിത്രത്തിലൂടെ ചലച്ചിത്രരംഗത്തേക്ക് കടന്നുവന്ന താരമാണ് മഹിമ നമ്പ്യാര്. ചിത്രത്തില് ദിലീപന്റെ സഹോദരിയുടെ കഥാപാത്രത്തെയാണ് മഹിമ അവതരിപ്പിച്ചത്. പിന്നീട് താരം തമിഴിലാണ് തിളങ്ങിയത്. ആര്ഡിഎക്സ് എന്ന 2023ലെ വമ്പന് ഹിറ്റ് ചിത്രത്തിലൂടെയാണ് മലയാളികള്ക്ക് ഏറെ പ്രിയങ്കരിയായി താരം മാറിയത്. ആര്ഡിഎക്സ് തീര്ത്ത ഓളം മഹിമ നമ്പ്യാര്ക്കും വലിയ ഫാന് ബേസാണ് യൂത്തിനിടയില് സൃഷ്ടിച്ചത്.
ഇപ്പോഴിതാ കാര്യസ്ഥനില് അഭിനയിക്കുന്ന സമയത്തു നിന്ന് ഒരുപാട് മാറ്റം വന്നിട്ടില്ലേ എന്ന ചോദ്യത്തിനാണ് മഹിമ മറുപടി പറഞ്ഞത്. കാര്യസ്ഥനില് അഭിനയിക്കുമ്പോള് കുറച്ചു ഗുണ്ടുമണിയായിരുന്നില്ലേ എന്നായിരുന്നു അവതാരകന്റെ ചോദ്യം. അതിനാണ് താരം വിശദമായി മറുപടി പറഞ്ഞത്.
‘‘ഒരു ഡ്രാസ്റ്റിക് ചെയ്ഞ്ചു തന്നെയാണ് വന്നത്. കാര്യസ്ഥന് ചെയ്തു കഴിഞ്ഞ് തമിഴിലേക്ക് പോയപ്പോഴും ഇങ്ങനെയൊരു മാറ്റം വന്നിരുന്നില്ല. കഴിഞ്ഞ ഒരു മൂന്നു വര്ഷത്തിനിടയിലാണ് എനിക്കു തന്നെ ഈ തിരിച്ചറിവു വന്നത്. സെല്ഫ് ഇപ്രൂവ്മെന്റ് എന്നൊരു പ്രോസസ്സിലേക്ക് പോകുന്നത് ഒരു അഞ്ചു വര്ഷത്തിനിടയിലാണ്. സിനിമ നോക്കിക്കാണുമ്പോള് അതില് അഭിനയം എന്ന കാര്യം മാത്രമല്ല ഉള്ളത്. അതൊരു വലിയ ടാസ്കാണ്. നല്ല സിനിമ മാത്രം വന്നാല് പോരാ. പിആറുണ്ട്, എങ്ങനെ നമ്മളെ പ്രെമോട്ട് ചെയ്യുന്നു എന്നതുണ്ട്,എങ്ങനെ പ്രെസന്റ് ചെയ്യുന്നു എന്നതുണ്ട്, ചെയ്യുന്ന കഥാപാത്രങ്ങളില് എങ്ങനെ വെറൈറ്റി കൊണ്ടുവരാമെന്നുള്ളതുണ്ട്. ഞാനത് പഠിച്ചു വരാന് കുറച്ചു സമയമെടുത്തു....മുഴുവനായി എന്നെ മാറ്റിയെടുക്കാനും തിരിച്ചറിയാനും സമയമെടുത്തു. അത് തിരിച്ചറിയുന്നതു വരെ ഞാന് വളരെ നാണക്കാരിയായിരുന്നു. സെല്ഫ് കോണ്ഷ്യസുണ്ടായിരുന്നു. കോംപ്ലെക്സുള്ള ഒരു വ്യക്തിയായിരുന്നു. എന്നെ മനസ്സിലാക്കാനും തിരിച്ചറിയാനും തുടങ്ങിയപ്പോള് ആത്മവിശ്വാസം വന്നു. ധരിക്കുന്ന വസ്ത്രവും മേക്കപ്പും ശരീരസൗന്ദര്യവുമൊക്കെ ശ്രദ്ധിക്കാന് തുടങ്ങി. അങ്ങനെ എല്ലാത്തിലും ഞാന് ശ്രദ്ധിച്ചു തുടങ്ങി. പത്തുവര്ഷത്തിനു മുമ്പുള്ള ഞാനും ഇന്നത്തെ ഞാനും തമ്മില് ഒരുപാട് അന്തരമുണ്ട്....’’ മഹിമ പറയുന്നു. ഒരു യുട്യൂബ് ചാനലിന് നല്കിയ അഭിമുഖത്തിലാണ് മഹിമ ഇത് തുറന്നു പറഞ്ഞത്.
എന്തുകൊണ്ടാണ് മലയാള സിനിമകള് അധികം ചെയ്യാതിരുതെന്ന ചോദ്യത്തിനും മഹിമ മറുപടി പറയുന്നുണ്ട്. എന്തുകൊണ്ട് ഈ നായികയെ മലയാളികള് തിരിച്ചറിഞ്ഞില്ല എന്നായിരുന്നു അവതാരകന്റെ ചോദ്യം.
‘‘ഞാനും പലതവണയിത് പലരോടും ചോദിച്ചിട്ടുണ്ട്. പക്ഷേ ആര്ഡിഎക്സ് ചെയ്തു കഴിഞ്ഞപ്പോള് മനസ്സിലായ ഒരു കാര്യമുണ്ട്. പലര്ക്കും അറിയില്ലായിരുന്നു ഞാന് മലയാളിയാണെന്നുള്ള കാര്യം. കാരണം ഞാന് മലയാളത്തിലാണ് തുടങ്ങിയതെങ്കിലും പിന്നീട് തമിഴിലാണ് ഞാന് സജീവമായി നായികവേഷം ചെയ്തു കൊണ്ടിരിക്കുകയായിരുന്നു. അതിന്റെയിടയില് ചെറിയൊരു ഗ്യാപ്പില് വന്നിട്ടാണ് ഞാന് മാസ്റ്റര്പീസും, മധുരരാജയും, വാലാട്ടിയുമൊക്കെ ചെയ്തത്. ഈ സിനിമകളിലൊന്നിലും ഞാന് മുഴുനീള നായികയായിരുന്നില്ല. അധികം നോട്ടീസ് ചെയ്യുന്ന കഥാപാത്രമായിരുന്നില്ല. കൂടുതല് സിനിമ ചെയ്യുന്നത് തമിഴിലായിരുന്നത് കൊണ്ട് ഞാനൊരു മലയാളിയാണെന്ന് പലര്ക്കുമറിയില്ലായിരുന്നു. ആര്ഡിഎക്സിന്റെ സെറ്റിലുള്ള പലര്ക്കും ഞാനൊരു മലയാളിയാണെന്ന് അറിഞ്ഞിരുന്നില്ല. മലയാള സിനിമയില് കോണ്ടാക്ടുകള് കുറവായിരുന്നതാകാം അതിന്റെയൊരു ഡ്രോബാക്ക്....’’ മഹിമ പറയുന്നു.
