പത്തനംതിട്ട: പെണ്കുട്ടിക്ക് പിറന്നാള് കേക്കുമായി എത്തിയ യുവാവിനെ പെണ്കുട്ടിയുടെ ബന്ധുക്കള് തേങ്ങയ്ക്ക് ഇടിച്ചെന്ന് പരാതി. പത്തനംതിട്ട കുമ്മണ്ണൂര് സ്വദേശി മുഹമ്മദ് നിഹാസിനാണ് ക്രൂര മര്ദ്ദനമേറ്റത്. പെണ്കുട്ടിയെ കാണാന് ബന്ധുവീട്ടില് എത്തിയതായിരുന്നു യുവാവ്. പെണ്കുട്ടിയുടെ ബന്ധുക്കള് നല്കിയ പരാതിയില് യുവാവിനെതിരേ പോലീസ് പോക്സോ കേസ് എടുത്തിട്ടുണ്ട്.
കൊല്ലം സിറ്റി പോലീസാണ് കേസെടുത്തത്. 16 കാരിയുടെ കൊല്ലത്തെ ബന്ധുവീട്ടിലെത്തിയാണ് യുവാവ് കാണാനെത്തിയത്. യുവാവിനെ വീട്ടുകാര് തേങ്ങ തുണിയില് പൊതിഞ്ഞ് മര്ദ്ദിച്ചെന്നും ക്രൂരമായ മര്ദ്ദനത്തിന് ഇരയായെന്നുമാണ് യുവാവ് നല്കിയിരിക്കുന്ന മൊഴി. കെട്ടിത്തൂക്കിയിട്ട് മര്ദ്ദിച്ചെന്നും യുവാവ് പറഞ്ഞിട്ടുണ്ട്. മെഡിക്കല് റിപ്പോര്ട്ടും യുവാവ് ക്രൂര മര്ദ്ദനത്തിന് ഇരയായ വിവരം ശരി വെച്ചിട്ടുണ്ട്.
കൊല്ലം തേവലക്കരയിലാണ് പെണ്കുട്ടിയുടെ ബന്ധുവീട്. തന്നെ മര്ദ്ദിച്ചെന്ന് പരാതി നല്കിയിട്ടുള്ളതായി യുവാവ് പറയുന്നുണ്ടെങ്കിലും പരാതി കിട്ടിയിട്ടില്ലെന്നാണ് പോലീസ് പറയുന്നത്. പത്തനംതിട്ട സ്വദേശിയായ പെണ്കുട്ടി ബന്ധുവീട്ടില് എത്തിയതായിരുന്നെന്നാണ് വിവരം. 20 കാരനായ യുവാവ് ഇപ്പോള് ദേഹമാസകലം മര്ദ്ദനമേറ്റ പരിക്കുകളുമായി ചികിത്സയില് കഴിയുകയാണ്.
