എന്ത് കാര്യം ചെയ്താലും അതെല്ലാം വിമര്ശിക്കപ്പെടുന്ന കാലഘട്ടത്തിലാണ് നാം ജീവിക്കുന്നത്. അതുപോലെ തന്റെ വസ്ത്രധാരണത്തെ വിമര്ശിച്ച ഒരു പ്രേക്ഷകന് തക്കതായ മറുപടി നല്കിയിരിക്കുകയാണ് ഒരു ഓസ്ട്രേലിയന് മാധ്യമപ്രവര്ത്തക. നരേല്ഡ ജേക്കബ്സ് എന്ന വാര്ത്താ അവതാരികയാണ് പ്രേക്ഷകന്റെ ഈമെയില് പങ്കുവച്ചത്.
നരേല്ഡയുടെ വസ്ത്രധാരണത്തെ വിമര്ശിച്ചായിരുന്നു ഈമെയില്. തന്റെ ഇന്സ്റ്റഗ്രാം അക്കൗണ്ടിലാണ് നരേല്ഡാ മെയിലിന്റെ സ്ക്രീന്ഷോട്ട് പങ്കുവച്ചിരിക്കുന്നത്. അതോടൊപ്പം വാര്ത്ത വായിക്കുന്ന തന്റെ ഒരു ചിത്രവും അവര് പോസ്റ്റ് ചെയ്തതിലുണ്ട്. വിമര്ശനത്തിന് കാരണമായ വസ്ത്രമാണ് അവര് അതില് ധരിച്ചിരിക്കുന്നത്. വാര്ത്ത വായിക്കുമ്പോള് ഇത്തരം വസ്ത്രം അനുചിതമാണ് എന്നും ക്ലീവേജ് കാണിച്ചുകൊണ്ട് വസ്ത്രം ധരിക്കുന്നത് നിശാക്ലബ്ബിന് ചേര്ന്നതാണ് എന്നുമായിരുന്നു പ്രേക്ഷകന്റെ പ്രതികരണം.
'അതേ, ഞങ്ങള്ക്ക് ഇപ്പോഴും ഇതുപോലുള്ള ഇമെയിലുകള് ലഭിക്കാറുണ്ട്. അതേ, അത് മുഴുവന് ന്യൂസ് റൂമിലേക്കും പോയിട്ടുണ്ട്. അതേ, ആ സമയത്ത് ഞാന് എയറില് ആയിരുന്നു. ഇത് എന്നെ അപമാനിക്കാനും ലജ്ജിപ്പിക്കാനും ഉദ്ദേശിച്ചുള്ളതാണ്. ഞാനെന്താണ് ധരിക്കുന്നത് എന്നതല്ല അനുചിതം. നിങ്ങളുടെ ഇത്തരം മെയിലുകളാണ് അനുചിതം' എന്നാണ് അവര് കാപ്ഷനില് കുറിച്ചിരിക്കുന്നത്. വളരെ പെട്ടെന്നാണ് നരേല്ഡയുടെ പോസ്റ്റ് വൈറലായിത്തീര്ന്നത്. നിരവധിപ്പേരാണ് വാര്ത്താ അവതാരികയ്ക്ക് പിന്തുണയുമായി കമന്റുകളിട്ടത്. ഈ ലോകത്തിന് ഒരു മാറ്റവുമില്ല എന്നാണ് പലരുടേയും അഭിപ്രായം. മാധ്യമപ്രവര്ത്തകരായ സ്ത്രീകള് ഇതുപോലെയുള്ള മെയിലുകള് തങ്ങള്ക്കും കിട്ടാറുണ്ട് എന്നും അംഗീകരിച്ചു.
