ചെറിയ അസുഖങ്ങള് വന്നാല് വൈദ്യസഹായം തേടണമെങ്കിലും കൂടുതല് ആളുകളും സ്വയം ചികിത്സരീതികള് അവലംബിക്കുകയാണ് ചെയ്യുന്നത്. എന്നാല് മാരക രോഗങ്ങള് വന്നാല് ആളുകള് ആശുപത്രിയില് പോയി ഡോക്ടറെ കാണുകയും അദ്ദേഹം നിര്ദ്ദേശിക്കുന്ന കാര്യങ്ങള് പിന്തുടരുകയും ചെയ്യും. എന്നാല്, ഇന്ന് ചിലര് സോഷ്യല് മീഡിയയില് കാണുന്ന കാര്യങ്ങള് പരീക്ഷിക്കാന് നില്ക്കാറുണ്ട്. ചിലപ്പോള് അങ്ങേയറ്റം വലിയ അപകടങ്ങളിലേക്കാണ് ഇത് ചെന്നെത്തുക. അതുപോലെ ഒരു അപകടമാണ് യുകെയില് നിന്നുള്ള ഈ സ്ത്രീക്കും സംഭവിച്ചത്.
യുകെയില് നിന്നുള്ള 39 -കാരിയായ ഐറീന സ്റ്റോയ്നോവ എന്ന സ്ത്രീ ദീര്ഘകാലമായി കാന്സര് രോഗബാധിതയായിരുന്നുവെന്നാണ് റിപ്പോര്ട്ടുകള് പറയുന്നത്. 2021 -ലാണ് ഇവര്ക്ക് കാന്സറാണെന്ന് കണ്ടെത്തിയത്. ക്യാരറ്റ് ജ്യൂസ് കാന്സറിനെ സുഖപ്പെടുത്തുമെന്ന് ഒരു വൈറല് വീഡിയോയില് ഇവര് കാണുകയായിരുന്നു. അവര് ഉടന് തന്നെ ഒരു ജ്യൂസര് വാങ്ങുകയും ജ്യൂസ് ഡയറ്റ് ആരംഭിക്കുകയും ചെയ്തു. പലതരം പഴങ്ങളും പച്ചക്കറികളും അവര് ജ്യൂസടിച്ചു കുടിച്ചെങ്കിലും പ്രധാനമായും അവര് കാരറ്റ് ജ്യൂസാണ് കുടിച്ചിരുന്നത്. എന്നാല്, ഇത് വളരെ വലിയ അപകടത്തിലേക്കാണ് ചെന്നെത്തിയത്.
ഹാംഷെയറിലെ ക്രോന്ഡാലില് നിന്നുള്ള ഐറിന വൈറല് വീഡിയോയില് കണ്ടതനുസരിച്ച് ഒരു ദിവസം 13 കപ്പ് കാരറ്റ് ജ്യൂസാണ് കുടിച്ചിരുന്നതത്രെ. കീമോതെറാപ്പി വരെ അവഗണിച്ച ശേഷം അവര് പൂര്ണമായും കാരറ്റ് ജ്യൂസ് ഡയറ്റില് ശ്രദ്ധ കേന്ദ്രീകരിക്കുകയും അത് തന്നെ പൂര്ണമായും സുഖപ്പെടുത്തും എന്ന് വിശ്വസിക്കുകയും ആയിരുന്നു. എന്നാല്, കുറച്ച് ദിവസങ്ങള് കഴിഞ്ഞപ്പോള് അവരുടെ അവസ്ഥ വഷളായി. ആരോഗ്യസ്ഥിതി മോശമായതിനെ തുടര്ന്ന് അവരെ ആശുപത്രിയില് പ്രവേശിപ്പിച്ചു.
അപ്പോഴേക്കും അവളുടെ അടിവയറ്റിലും കാലുകളിലും ശ്വാസകോശത്തിലും ഫ്ലൂയിഡ് നിറഞ്ഞിരുന്നു, ശരീരത്തിലുടനീളം വീക്കവുമുണ്ടായിരുന്നു. തന്റെ അനുഭവത്തെ കുറിച്ച് ഐറീന പറയുന്നത്, തനിക്ക് ഫ്ലൂയിഡ് നിറഞ്ഞ് ശരിക്കും ശ്വസിക്കാന് പോലും പറ്റാത്ത അവസ്ഥയില് കാര്യങ്ങള് എത്തിച്ചേര്ന്നിരുന്നു എന്നാണ്. എന്തായാലും, ഇത്തരം സ്വയം ചികിത്സയുടെ അപകടത്തെ കുറിച്ച് തനിക്ക് ബോധ്യപ്പെട്ടു എന്നും അവര് പറഞ്ഞു.
