വ്യത്യസ്തമായ കഥാപാത്രങ്ങളിലൂടെ തുടങ്ങി ദേശീയ അവാര്ഡ് വരെ നേടിയ താരമാണ് വിനായകന്. പലപ്പോഴും വിനായകന്റെ വാചകങ്ങളും അഭിപ്രായങ്ങളും വിവാദങ്ങള്ക്ക് വഴിവയ്ക്കാറുണ്ട്. അതില് പ്രശസ്തരായവരും ആളുകള്ക്ക് ഏറെയിഷ്ടമുള്ളവരും പെടാറുണ്ട്. അക്കൂട്ടത്തില് ഒരാള് കൂടി വരുകയാണ്, സന്തോഷ് ജോര്ജ് കുളങ്ങര. മലയാളികളെ ലോകം കാണാൻ പ്രേരിപ്പിച്ച വ്യക്തിയാണ് സന്തോഷ് ജോർജ് കുളങ്ങര. താൻ കണ്ട കാഴ്ചകള് ജനങ്ങളുടെ കണ്ണുകളിലേക്കും ഹൃദയങ്ങളിലേക്കും എത്തിച്ച സന്തോഷ് ജോർജ് കുളങ്ങരയ്ക്ക് ആരാധകരേറെയാണ്.
കഴിഞ്ഞ കുറച്ച് വർഷങ്ങള് കൊണ്ട് ഭാരതത്തിലുണ്ടായ മാറ്റങ്ങളെയും വികസനങ്ങളെയും ഗുജറാത്തിലെ സ്റ്റാച്യു ഓഫ് യൂണിറ്റിയെ ഉള്പ്പടെ സന്തോഷ് ജോര്ജ് കുളങ്ങര അഭിനന്ദിച്ചിരുന്നു. ഇതിന് പിന്നാലെ സമൂഹമാദ്ധ്യമങ്ങളില് സന്തോഷ് ജോർജ് കുളങ്ങരയ്ക്കെതിരെ ഒരുകൂട്ടർ അധിക്ഷേപവും കുറിച്ചിരുന്നു.
ഇപ്പോഴിതാ സന്തോഷ് ജോർജ് കുളങ്ങരയെ അധിക്ഷേപിച്ച് രംഗത്തു വന്നിരിക്കുകയാണ് നടൻ വിനായകൻ. സന്തോഷ് ജോർജ് കുളങ്ങരയെ നമ്പരുത് എന്നാണ് വിനായകൻ പറയുന്നത്. സന്തോഷ് ജോർജ് കുളങ്ങര ഇന്ത്യയെ മോശമായി ചിത്രീകരിക്കുന്നു എന്ന വാദവും വിനായകന് കുറിക്കുന്നുണ്ട്.
‘‘**ഇദ്ദേഹത്തെ നമ്പരുത്*
യുവതീ..യുവാക്കളോട് .....
ലോകത്തിന്റെ സ്വകാര്യതയിലേക്ക് ക്യാമറ കൊണ്ട് ഒളിഞ്ഞു നോക്കുന്ന ഇദ്ദേഹത്തെ നമ്പരുത്. സ്വന്തം വ്യവസായം വലുതാക്കാൻ ചാനലുകളിൽ വന്നിരുന്ന് ഇന്ത്യയെന്ന മഹാരാജ്യത്തെ മോശമായി കാണിച്ച് ആ കാശു കൊണ്ട് കുടുംബം പോറ്റുന്ന ഇദ്ദേഹത്തെ പോലെ (ലോകം അറിയാമെന്ന് സ്വയം നടിക്കുന്ന ) ആളുകളെ നമ്പരുത്.... യുവതീ യുവാക്കളേ...നിങ്ങൾ നിങ്ങളുടെ സന്തോഷത്തിന്റെ ലോകത്തേക്ക് പറന്നു പോകു.... ഇദ്ദേഹത്തെ നമ്പരുത്....’’ എന്നാണ് വിനായകന് ഫെയ്സ്ബുക്കിലൂടെ കുറിച്ചത്. താരത്തിന്റെ ഫേസ്ബുക്ക് പോസ്റ്റിനെ വിമർശിച്ച് പലരും കമന്റുകള് കുറിക്കുന്നുണ്ട്.
