മലയാളസിനിമാപ്രേക്ഷകര്ക്ക് ഏറെയിഷ്ടമുള്ള താരമാണ് ഉണ്ണിമുകുന്ദന്. മല്ലുസിംഗായി മലയാള മനസ്സില് ചേക്കേറിയ താരം പിന്നീട് മികച്ച കഥാപാത്രങ്ങളിലൂടെ പ്രേക്ഷകമനസ്സിലിടം പിടിക്കുകയായിരുന്നു. വലിയൊരു ആരാധകവൃന്ദം തന്നെയുണ്ട് ഉണ്ണിക്ക്. അതുകൊണ്ടു തന്നെ താരത്തിനെക്കുറിച്ച് ആരെങ്കിലും മോശമായി പറഞ്ഞാല് അത് ആരാധകര്ക്ക് അത്ര പിടിക്കാറില്ല.
ഇപ്പോഴിതാ വിവാദങ്ങളുടെ പേരില് എപ്പോഴും മുന്പന്തിയിലുള്ള ഷെയ്ന് നിഗം ഉണ്ണി മുകുന്ദനെയും താരത്തിന്റെ പ്രൊഡക്ഷൻ കമ്പനിയേയും ഇകഴ്ത്തി സംസാരിച്ച് പുതിയ വിവാദങ്ങള്ക്കും വിമർശനങ്ങള്ക്കും തുടക്കം കുറിച്ചിരിക്കുകയാണ്. നടി മഹിമാ നമ്പ്യാരെ പരിഹസിക്കാൻ വേണ്ടിയാണ് ഷെയിൻ ഉണ്ണിമുകുന്ദനെ ഇകഴ്ത്തി സംസാരിച്ചു. ഉണ്ണി മുകുന്ദൻ-മഹിമാ നമ്പ്യാർ കോംമ്പോയെ പരിഹസിച്ചു കൊണ്ടായിരുന്നു ഷെയിൻ മോശം പരാമർശം നടത്തിയത്. ഉണ്ണി മുകുന്ദന്റെ പ്രൊഡക്ഷൻ കമ്പനിയായ UMF-നെ അശ്ലീല ഭാഷയില് പ്രയോഗിച്ചാണ് മഹിമാ നമ്പ്യാരെ ഷെയിൻ പരിഹസിച്ചത്. ഈ സമയത്ത് അവതാരകയും മഹിമാ നമ്പ്യാരും അസ്വസ്ഥത പ്രകടിപ്പിക്കുന്നത് വീഡിയോയില് കാണാം. ലിറ്റില് ഹാർട്സ് എന്ന പുതിയ ചിത്രത്തിന്റെ പ്രമോഷന്റെ ഭാഗമായി ഒരു ഓണ്ലൈൻ മാദ്ധ്യമത്തിന് നല്കിയ അഭിമുഖത്തിലായിരുന്നു ഷെയ്നിന്റെ പരാമര്ശം.
അസഭ്യം കലർന്ന തരത്തില് സഹപ്രവർത്തകനായ നടനെ പരിഹസിക്കുകയാണ് ഷെയിൻ ചെയ്തതെന്നാണ് പലരും വീഡിയോയ്ക്ക് താഴെ കുറിക്കുന്നത്. ‘ഷെയിൻ പ്രയോഗിച്ചത് വളരെ മോശം പദ പ്രയോഗമാണ്, ലഹരി ഉപയോഗിച്ചാണോ അഭിമുഖങ്ങളില് പങ്കെടുക്കുന്നത്, അച്ഛന്റെ പേരിന് കളങ്കം വരുത്തുന്നു’ എന്നിങ്ങനെ നീളുന്നു വിമര്ശന കമന്റുകള്.
ഷൂട്ടിംഗ് ലൊക്കേഷനുകളിലെ അച്ചടക്കമില്ലായ്മയും ഷെയ്ന് നടത്തിയ അഭിപ്രായ പ്രകടനങ്ങളുമെല്ലാം വലിയ വിവാദമായിരുന്നു. അമ്മ സംഘടനയില് നിന്നുവരെ ഷെയിനിന് നടപടികള് നേരിടേണ്ടി വന്നിട്ടുണ്ട്. വാക്കും പ്രവൃത്തിയും ശ്രദ്ധിച്ച് വേണമെന്ന് ജനങ്ങളും വിമർശിച്ചിരുന്നു. ഷെയ്നിന്റെ പുതിയ വാചകങ്ങളും സോഷ്യല് മീഡിയയില് വീണ്ടും വിമർശനങ്ങള് ഉയര്ത്തുകയാണ്.
സംഘപരിവാറിന്റെ സൈബർ ആക്രമണവും ഉയര്ന്ന തലത്തില് ഉയരുന്നുണ്ട്. നിരവധി പേർ താരത്തെ മതപരമായും മറ്റും സോഷ്യല് മീഡിയയില് ആക്രമിക്കുന്നുണ്ട്. നിരവധി മോശം കമന്റുകളും ഭീഷണിയുമാണ് ഷെയ്ൻ നിഗത്തിനെതിരെ സംഘപരിവാർ പ്രൊഫൈലുകളില് നിന്നും വന്നുകൊണ്ടിരിക്കുന്നത്. കൃത്യമായ വർഗീയതയാണ് സംഘപരിവാർ പ്രൊഫൈലുകള് പടച്ചുവിടുന്നതെന്നും ആരോപണമുണ്ട്.
