കുഞ്ചാക്കോ ബോബന് നായകനായി എത്തിയ ജമ്നാപ്യാരി എന്ന ചിത്രത്തിലൂടെ മലയാള സിനിമയിലെത്തിയ താരമാണ് ഗായത്രി സുരേഷ്. പിന്നീട് ചുരുക്കം ചില സിനിമകളില് അഭിനയിച്ചെങ്കിലും അഭിമുഖങ്ങളിലെ തുറന്നു പറച്ചിലുകളിലൂടെയാണ് താരം പലപ്പോഴും സോഷ്യല് മീഡിയയില് വൈറലാകാറുള്ളത്. സോഷ്യല് മീഡിയയില് എന്ത് പറഞ്ഞാലും ട്രോള് ചെയ്യപ്പെടുന്ന ഒരു താരമായി ഗായത്രി മാറി. താരത്തിന്റെ റിലീസ് കാത്തിരിക്കുന്ന ചിത്രം അഭിരാമിയാണ്. മുഷ്താഖ് റഹ്മാന് കാര്യാടന് സംവിധാനം ചെയ്യുന്ന ചിത്രം സോഷ്യല് മീഡിയയില് താരമാകുന്ന ദുബായില് നഴ്സായി ജോലി ചെയ്യുന്ന ഒരു യുവതിയുടെ കഥയാണ് പറയുന്നത്. ഗായത്രി സുരേഷിന് പുറമേ അമേയ മാത്യു, ഹരികൃഷ്ണന് എന്നിവരാണ് പ്രധാന കഥാപാത്രത്തെ അവതരിപ്പിക്കുന്നത്. സിനിമയുമായി ബന്ധപ്പെട്ടുള്ള പ്രൊമോഷന് അഭിമുഖങ്ങളുടെ തിരക്കിലാണ് താരം.
ഇപ്പോഴിതാ തന്റെ ബ്രൈഡല് ഷവര് ഉടന് ഉണ്ടാവുമെന്നാണ് അവതാരകയുടെ ചോദ്യത്തിന് മറുപടിയായി ഗായത്രി പറയുന്ന മറുപടിയാണ് വൈറലാകുന്നത്. ബ്രൈഡല് ഷവറിന് വരണം എന്ന് ആഗ്രഹിക്കുന്ന സെലിബ്രിറ്റികളുടെ പേരുകളും ഗായത്രി പറയുന്നുണ്ട്. കരിയറിനെക്കുറിച്ചും താരം മനസു തുറക്കുന്നുണ്ട്.
‘‘ഇതുവരെ എന്റെ സ്വഭാവത്തോട് സാമ്യമുള്ള കാരക്ടറുകള് തന്നെയാണ് ചെയ്തിരുന്നത്. എന്നാല് ഇനി മുതല് അതില് നിന്ന് വ്യത്യസ്തമായ കാരക്ടറുകള് ചെയ്യണമെന്നാണ് ആഗ്രഹം. ഇപ്പോള് കരിയര് ആണ് കൂടുതലും ശ്രദ്ധിക്കുന്നത്. അത് ഞാന് അത്രയും ഇഷ്ടപ്പെടുന്നുണ്ട്. ഒന്നും നേരത്തെ പ്ലേസ് ചെയ്ത് ഒരു കാര്യം പറയാന് ഒന്നും എനിക്കറിയില്ല.
ഇത് പറഞ്ഞാല് ഇവിടെ ഈ തമാശ പറയാം എന്നൊന്നും ഞാന് ചിന്തിക്കാറില്ല. അതുകൊണ്ട് തന്നെ പറയുന്നതില് ഒരു സത്യസന്ധത ഉണ്ടാകും. ഒന്നും മനസില് വെക്കാതെ വെക്കുക എന്ന് പറയുന്നത് സുഹൃത്തുക്കളെ മാത്രമല്ല, ശത്രുക്കളെയും ഉണ്ടാക്കിയിട്ടുണ്ട്. ഒന്നും മനസില് വെക്കില്ല എന്ന് പറയുന്നതിന് അര്ത്ഥം ഒരു രഹസ്യവും സൂക്ഷിക്കില്ല എന്നല്ല.
ഞാന് രഹസ്യങ്ങള് സൂക്ഷിക്കുന്ന ആളുമാണ്. പക്ഷെ മുന്നില് ഒരു കാര്യം കണ്ട് കഴിഞ്ഞാല് ഞാന് തുറന്ന് പറയും. അത് ആള്ക്കാര്ക്ക് ട്രിഗര് ആകും. ഞാന് ചിലപ്പോള് അത് തുണിയില്ലാത്ത രാജാവിനെ കണ്ടിട്ട് കുട്ടി പറയുന്ന പോലെയാണ്. അറിയാതെ ചിലപ്പോള് വന്നു പോവുന്നതാണ്. സ്ക്രിപ്റ്റ് സെലക്ഷന് മെച്ചപ്പെടുത്താം എന്നൊന്നും തോന്നിയിട്ടില്ല. സമയം ഇനിയും കിടക്കുകയല്ലേ... ഇത്രയും ആയി. ആളുകള് ഇനിയും വന്നു കൊണ്ടിരിക്കുകയാണ് എന്നൊക്കെ അല്ലാതെ നമുക്ക് പറ്റുന്ന മാക്സിമം നമുക്ക് ചെയ്യുക എന്നതില് തന്നെയാണ് വിശ്വസിക്കുന്നു...’’ ഗായത്രി പറയുന്നു.
ഇതിന് പിന്നാലെയാണ് ഗായത്രിയോട് തന്റെ ബ്രൈഡല് ഷവറിന് വേണം എന്ന് ആഗ്രഹമുള്ള നടിമാരെക്കുറിച്ച് അവതാരക ചോദിക്കുന്നത്. അതിനുള്ള മറുപടിയാണ് വൈറലാകുന്നത്. ഗായത്രി ആദ്യം പറയുന്ന പേര് കരീന കപൂര് എന്നാണ്. ‘‘എനിക്ക് കരീന കപൂറിനെ ഇഷ്ടമാണ്. ആലിയ ഭട്ട്, മീന, ഭാവന, ആഞ്ചലീന ജോളി, പ്രിയങ്ക ചോപ്ര എന്നിവര് ഒക്കെ വരണം എന്ന് ആഗ്രഹമുണ്ട്.
എന്നോട് എപ്പോഴെങ്കിലും ഇഷ്ടമുള്ള നടിമാരെക്കുറിച്ച് ചോദിച്ചാല് പറയാന് എന്റെ മനസില് ഉള്ള പേരുകളാണ് ഇത്....’’ഗായത്രി പറയുന്നു.
ഗായത്രിയുടെ ബ്രൈഡല് ഷവര് പ്രതീക്ഷിക്കാമോ എന്ന ചോദ്യത്തിന്, ‘‘തീര്ച്ചയായും... എന്നാല് എപ്പോഴാണെന്ന് എന്നോട് ചോദിക്കരുത്. ഇപ്പോള് അതിനെക്കുറിച്ചൊന്നും പറയാന് ആഗ്രഹിക്കുന്നില്ല. അതെല്ലാം വളരെ അപ്രതീക്ഷിതമായി സംഭവിക്കുമെന്നാണ് കരുതുന്നത്. അങ്ങനെ ഒന്ന് സംഭവിക്കുമെന്ന ഒരു തോന്നല് എവിടെയോ എനിക്ക് കിട്ടുന്നുണ്ട്. എനിക്ക് സിനിമ ഫീല്ഡില് പെട്ടെന്ന് കണ്ടാല് സംസാരിക്കാന് പറ്റുന്ന ഒരാള് ധ്യാന് ശ്രീനിവാസനാണ്. അഭിരാമി എന്ന പുതിയ ചിത്രത്തില് ഒപ്പം അഭിനയിച്ച ഹരികൃഷ്ണനും എനിക്ക് വളരെ ക്ലോസ് ആയിട്ടുള്ള ആളാണ്....’’ ഗായത്രി പറഞ്ഞു.
