ന്യൂഡല്ഹി: പ്രധാനമന്ത്രി നരേന്ദ്രമോദി നാളെ സത്യപ്രതിജ്ഞ നടത്താനിരിക്കെ കാബിനറ്റ് മന്ത്രിമാരുടെ പട്ടികയ്ക്ക് അന്തിമരൂപം എന്ഡിഎ നേതാക്കള് ഇന്ന് യോഗം ചേരും. നാളെ സത്യപ്രതിജ്ഞ ചെയ്ത് അധികാരമേല്ക്കുന്നതോടെ തുടര്ച്ചയായി മൂന്നാം തവണയാണ് മോദി ഇന്ത്യയുടെ പ്രധാനമന്ത്രിയാകുന്നത്. ലോക്സഭാ തെരഞ്ഞെടുപ്പില് ബിജെപി 240 സീറ്റുകള് നേടിയെങ്കിലും ഭൂരിപക്ഷത്തിന് 32 സീറ്റുകള് കുറവാണ്.
ടിഡിപി അധ്യക്ഷന് ചന്ദ്രബാബു നായിഡുവും ജെഡിയുവിന്റെ നിതീഷ് കുമാറും മോദിയെ സഖ്യത്തിന്റെ പ്രധാനമന്ത്രി സ്ഥാനാര്ത്ഥിയായി തിരഞ്ഞെടുക്കാനുള്ള നിര്ദ്ദേശം ഇന്നലെ പരസ്യമായി അംഗീകരിച്ചു. 16 സീറ്റുകള് നേടിയ എന് ചന്ദ്രബാബു നായിഡുവിന്റെ ടിഡിപി, നിതീഷ് കുമാറിന്റെ ജെഡിയു (12), ഏകനാഥ് ഷിന്ഡെയുടെ ശിവസേന (7), ചിരാഗ് പാസ്വാന്റെ ലോക് ജനശക്തി പാര്ട്ടി-രാം വിലാസ് (7) എന്നിവയാണ് ബിജെപിക്ക് ഭൂരിപക്ഷത്തിലെത്താന് പിന്തുണ നല്കുന്ന നാല് സഖ്യകക്ഷികള്.
ബിജെപിയും അതിന്റെ രണ്ട് പ്രധാന സഖ്യകക്ഷികളായ ടിഡിപിയും ജെഡിയുവും തമ്മിലുള്ള ചര്ച്ചകളിലാണ് ഇപ്പോള് ശ്രദ്ധ കേന്ദ്രീകരിക്കുന്നത്. മഹാരാഷ്ട്ര മുഖ്യമന്ത്രി ഏകനാഥ് ഷിന്ഡെയുടെ ശിവസേന വിഭാഗവും ചിരാഗ് പാസ്വാന്റെ എല്ജെപിയും പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള പുതിയ മന്ത്രിസഭയില് പ്രധാന വകുപ്പുകള് തേടുന്നു. പ്രധാനമന്ത്രി മോദി നാളെ വൈകുന്നേരം നടക്കുന്ന ചടങ്ങില് സത്യപ്രതിജ്ഞ ചെയ്യും. കോണ്ഗ്രസ് നേതാവായ ജവഹര്ലാല് നെഹ്റുവിന് ശേഷം മൂന്ന് തവണ പ്രധാനമന്ത്രിയാകുന്ന ആളായിട്ടാകും ഇതോടെ മോദി മാറുക.
