അഭിനേത്രി, മോഡൽ എന്നീ നിലകളിൽ ശ്രദ്ധിക്കപ്പെട്ട താരമാണ് ജ്യോതിർമയി. അഭിനയത്തിൽ തിളങ്ങി നിൽക്കുന്ന സമയത്താണ് താരം വെള്ളിത്തിരയിൽ നിന്നും ഇടവേളയെടുത്തത്.
ഇപ്പോഴിതാ ഭർത്താവും സംവിധായകനുമായ അമല് നീരദിന്റെ പുതിയ സിനിമയിലൂടെ 11 വർഷങ്ങൾക്ക് ശേഷം അഭിനയത്തിലേക്ക് തിരിച്ചെത്തുകയാണ് ജ്യോതിർമയി.
ചിത്രത്തിന്റെ ക്യാരക്ടർ പോസ്റ്റർ ഷെയർ ചെയ്തിരിക്കുന്നത് കുഞ്ചാക്കോ ബോബനാണ്. തോക്കേന്തിയ ജ്യോതിർമയിയെ ആണ് ചിത്രത്തില് കാണുന്നത്. "വെല്ക്കം ബാക്ക് ജോ," എന്നു ആശംസിച്ചുകൊണ്ടാണ് ചാക്കോച്ചൻ ചിത്രം പങ്കിട്ടിരിക്കുന്നത്. ചാക്കോച്ചന്റെ പോസ്റ്റിനു താഴെ സഹതാരങ്ങളും ആരാധകരുമടക്കം നിരവധി പേരാണ് ജ്യോതിർമയിക്ക് ആശംസകൾ അറിയിക്കുന്നത്.
2013 ല് റിലീസ് ചെയ്ത സ്ഥലം എന്ന സിനിമയിലാണ് ജ്യോതിർമയി അവസാനം പ്രത്യക്ഷപ്പെട്ടത്.
മമ്മൂട്ടി നായകനായി എത്തിയ ഭീഷ്മപര്വ്വത്തിന് ശേഷം അമല് നീരദ് സംവിധാനം ചെയ്യുന്ന ചിത്രത്തിൽ കുഞ്ചാക്കോ ബോബൻ ഫഹദ് ഫാസില് ജ്യോതിർമയി എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
ഇവരുടെയും ക്യാരക്ടർ പോസ്റ്ററുകളും പുറത്തുവന്നിട്ടുണ്ട്.
അമല് നീരദ് പ്രൊഡക്ഷൻസും ഉദയ പിക്ചേഴ്സും ചേർന്നാണ് ചിത്രം നിർമ്മിക്കുന്നത്. സിനിമയുടെ പേരോ മറ്റ് വിവരങ്ങളോ ഇതുവരെ അനൗണ്സ് ചെയ്തിട്ടില്ല. കുഞ്ചാക്കോ ബോബൻ ആദ്യമായി അമല് നീരദ് ചിത്രത്തില് അഭിനയിക്കുന്നു എന്ന പ്രത്യേകതയുമുണ്ട്. വരത്തനു ശേഷം അമല് നീരദും ഫഹദും ഒന്നിക്കുന്ന ചിത്രമാണിത്.
2015 ഏപ്രിലില് ആയിരുന്നു അമല്നീരദും ജ്യോതിർമയിയും തമ്മിലുള്ള വിവാഹം. വീട്ടുകാരുടെയും അടുത്ത സുഹൃത്തുക്കളുടെയും സാന്നിധ്യത്തില് ലളിതമായ ചടങ്ങുകളോടെയായിരുന്നു ഇരുവരുടെയും വിവാഹം.
