വീടുകളിലും ഷോപ്പിംഗ് മാളുകളിലുമെല്ലാം മോഷ്ടിക്കാന് കയറി ഒടുവില് എട്ടിന്റെ പണി വാരിക്കൂട്ടുന്ന കള്ളന്മാരെ സംബന്ധിക്കുന്ന ഒട്ടനവധി സംഭവങ്ങള് സോഷ്യല് മീഡിയയിലൂടെ നാം കണ്ടിട്ടുണ്ട്. എന്നാല് ഇതില് നിന്നെല്ലം വ്യത്യസ്തമായ ഒരു സംഭവമാണ് ഇപ്പോള് ശ്രദ്ധ നേടുന്നത്.
ജിമ്മില് മോഷ്ടിക്കാന് കയറിയ കള്ളനെ കൈയോടെ പിടിച്ച് എട്ടിന്റെ പണി കൊടുത്തിരിക്കുകയാണ് ഉടമ. മധ്യപ്രദേശിലെ ഒരു ജിമ്മില് മോഷ്ടിക്കാന് കയറിയ കള്ളനാണ് ഉടമയുടെ കൈയില് പെട്ടത്.
മോഷ്ടിക്കാനുള്ള വസ്തുക്കള് തിരയുന്നതിനിടയില് കൗതുകം തോന്നിയ കള്ളന് ചുമ്മാതൊന്ന് ട്രെഡ് മില്ലില് കയറി. തന്നെ ആരും കാണുന്നില്ല എന്നായിരുന്നു കള്ളന് വിചാരിച്ചത്. പക്ഷേ, എല്ലാം കണ്ടുകൊണ്ട് രണ്ട് ക്യാമറ കണ്ണുകള് തന്റെ തലയ്ക്ക് മുകളില് ഉണ്ടെന്ന് പാവം കള്ളന് അറിഞ്ഞില്ല. പിന്നെ പറയേണ്ടല്ലോ കാര്യങ്ങള്. കള്ളന്റെ കസറുത്തുകള് തല്സമയം കണ്ട ഉടമ ഉടനെ തന്നെ ജിമ്മിലെത്തി കള്ളനെ കൈയോടെ പിടികൂടി.
ഉടമ ജിമ്മില് എത്തുമ്പോഴും കള്ളന് ട്രെഡ്മില്ലില് തന്നെയായിരുന്നുവെന്ന് റിപ്പോര്ട്ടുകള് പറയുന്നു. ഉടമയെ കണ്ടതും അമ്പരന്ന് പോയ കള്ളനെ പക്ഷേ, ഉടമ പോലീസില് ഏല്പ്പിച്ചില്ല. മറിച്ച് കള്ളന്റെ കൊതി തീരുവോളം ട്രെഡ് മില്ലില് ഓടിച്ചു. എന്നുവെച്ചാല് കള്ളന് തളര്ന്ന് വീഴുവോളം ഓടിച്ചു. ഒടുവില് ക്ഷീണിതനായ കള്ളന് താഴെ വീണപ്പോള്, ജിമ്മിന്റെ ഉടമ പതിയെ പോലീസിനെ വിളിച്ച് കള്ളനെ കൈമാറി. ഏതായാലും കള്ളന്റെ ട്രെഡ് മില്ലിലെ അഭ്യാസ പ്രകടനം ഇപ്പോള് സമൂഹ മാധ്യമങ്ങളില് വൈറലാണ്.
