അധികാരത്തിലെത്താൻ സാധിച്ചെങ്കിലും ലോക്സഭ തെരഞ്ഞെടുപ്പില് തോല്വിയേറ്റ് വാങ്ങിയത് മോദി 2.0 മന്ത്രിസഭയിലെ 20 മന്ത്രിമാര്. ഇതിൽ ക്യാബിനറ്റ് മന്ത്രിമാരും സഹമന്ത്രിമാരും ഉൾപ്പെടുന്നു. സ്മൃതി ഇറാനി അടക്കം പ്രമുഖരാണ് ഇത്തവണ പരാജയമറിഞ്ഞത്. രണ്ടാം മോദി സര്ക്കാരില് വനിത ശിശുക്ഷേമ വകുപ്പ് മന്ത്രിയായിരുന്ന സ്മൃതി ഇറാനി, ഗാന്ധി കുടുംബത്തിന്റെ വിശ്വസ്തനായ കിഷോരി ലാൽ ശര്മ്മയോട് 1,67,196 വോട്ടിന്റെ തോല്വിയാണ് ഏറ്റുവാങ്ങിയത്.
ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി, നൈപുണ്യ വികസന മന്ത്രിയായിരുന്ന രാജീവ് ചന്ദ്രശേഖര് പരാജയപ്പെട്ടത് തിരുവനന്തപുരത്താണ്. മറ്റ് മന്ത്രിമാരുടെ പരാജയങ്ങള് നോക്കുമ്പോൾ ശശി തരൂരിനോട് മികച്ച പോരാട്ടം കാഴ്ചവയ്ക്കാൻ രാജീവ് ചന്ദ്രശേഖറിന് സാധിച്ചു. തോറ്റ കേന്ദ്ര മന്ത്രിമാരില് ഏറ്റവും കുറഞ്ഞ മാര്ജിനില് പരാജയമേറ്റ് വാങ്ങിയത് രാജീവ് ചന്ദ്രശേഖറാണ്. ഒരു ലക്ഷത്തിലേറെ വോട്ടിന് 2019ല് വിജയിച്ച ശശി തരൂരിന്റെ ഭൂരിപക്ഷം 16,077 ആക്കി കുറയ്ക്കാൻ രാജീവിന് സാധിച്ചു.
വി മുരളീധരൻ ആറ്റിങ്ങല് മണ്ഡലത്തില് കോണ്ഗ്രസിന്റെ അടൂര് പ്രകാശിനും സിപിഎമ്മിന്റെ വി ജോയിക്കും പിന്നില് മൂന്നാം സ്ഥാനത്തായി. ലഖിംപുര് ഖേരി വിവാദത്തില് അകപ്പെട്ട അജയ് കുമാര് മിശ്ര പരാജയപ്പെട്ടത് എസ്പിയുടെ ഉത്കര്ഷ് വെര്മ്മയോടാണ്.
എല് മുരുകൻ, അര്ജുൻ മുണ്ഡ, സുഭാഷ് സർക്കാർ, നിതീഷ് പ്രമാണിക്, കൈലാശ് ചൗധരി,സഞ്ജീവ് ബല്യാൻ, കപില് പാട്ടീൽ, റാവുസാഹെബ് ദൻവെ, ഭാരതി പവാര്, കൗഷല് കിഷോര്, ഭഗവന്ത് ഖുബ, മഹേന്ദ്രനാഥ് പാണ്ഡെ, സാധ്വി നിരഞ്ജൻ ജ്യോതി, ഭാനുപ്രതാപ് സിംഗ്, രാജ്കുമാര് സിംഗ്, ദേബശ്രീ ചൗധരി എന്നിവരാണ് മറ്റ് തോല്വി ഏറ്റുവാങ്ങിയ കേന്ദ്ര മന്ത്രിമാര്.
