മനോജ് കെ. ജയന്റെയും ഉർവശിയുടെയും മകള് കുഞ്ഞാറ്റ എന്ന തേജലക്ഷ്മി പ്രേക്ഷകര്ക്ക് സുപരിചിതയാണ്. വെള്ളിത്തിരയില് ഇതുവരെ തുടക്കം കുറിച്ചിട്ടില്ലെങ്കിലും സോഷ്യല് മീഡിയയിലൂടെ തന്റെ എല്ലാ അപ്ഡേറ്റുകളും താരപുത്രി പങ്കിടാറുണ്ട്. എല്ലാ വിശേഷങ്ങളും ഫോട്ടോഷൂട്ടുകളും താരപുത്രി ആരാധകരുമായി പങ്കിടാന് സമയം കണ്ടെത്താറുണ്ട്.
ഇപ്പോഴിതാ ഉർവശിയും പാർവതി തിരുവോത്തും പ്രധാന കഥാപാത്രങ്ങളാവുന്ന ഉള്ളൊഴുക്ക് സിനിമയുടെ പ്രിവ്യുന് എത്തിയ കുഞ്ഞാറ്റയുടെ വീഡിയോയാണ് സോഷ്യല് മീഡിയയില് ശ്രദ്ധിക്കപ്പെടുന്നത്. ദൈവം അനുഗ്രഹിച്ചാല് നായികയാകുമെന്നും സിനിമയാണ് ആഗ്രഹമെന്നും താരപുത്രി പറയുന്നുണ്ട്. നായികയായി ഉടൻ പ്രതീക്ഷിക്കുമോ എന്ന ചോദ്യത്തിനായിരുന്നു കുഞ്ഞാറ്റയുടെ മറുപടി.
സിനിമ എങ്ങനെയുണ്ടായിരുന്നു എന്ന ചോദ്യത്തിന് തേജാലക്ഷ്മി ‘പൊളി’ എന്നാണ് മറുപടി നല്കിയത്. ‘‘നല്ല സിനിമയാണ്,എനിക്കിഷ്ടപ്പെട്ടു. ഞാനവരുടെ പെര്ഫോമന്സിന് കമന്റ് ചെയ്യാന് ആളല്ല. അവരത്രയും ബ്രില്ല്യന്റായി ചെയ്തിരിക്കുന്ന മൂവിയാണ്. നാട്ടുകാര് എല്ലാവരും കാണണം, സിനിമയെ പ്രോത്സാഹിപ്പിക്കണം. എല്ലാവരും കണ്ടിട്ട് റിവ്യൂ പറയണം. ഒരുപാട് സന്തോഷമുണ്ട് സിനിമ കാണാന് പറ്റിയതില്. കണ്ണു നിറയ്ക്കുന്ന ഒരുപാട് സീനുകളുണ്ട് സിനിമയില്....’’ തേജലക്ഷ്മി പറയുന്നു.
സിനിമയിലേക്കുള്ള എന്ട്രിയെക്കുറിച്ചും തേജ മറുപടി പറയുന്നുണ്ട്. ‘‘വരുമായിരിക്കും. അറിയില്ല. തീര്ച്ചയായിട്ടും വരും. ദൈവം അനുഗ്രഹിച്ചാല് നായികയാകും. അമ്മയുടെ കൂടെയോ ? അതു കുറച്ച് അത്യാഗ്രഹമല്ലേ. ഏതെങ്കിലും നല്ല സംവിധായകര് മനസ്സു തോന്നി നമ്മളെ വിളിക്കുകയാണെങ്കില് തീര്ച്ചയായിട്ടും വരും...’’ തേജ പറയുന്നു.
സിനിമ കണ്ടിട്ട് അമ്മയോട് എന്താണ് പറയാനുള്ളത് എന്നും മാധ്യമപ്രവര്ത്തകര് ചോദിക്കുന്നുണ്ട്. ‘‘കെട്ടിപ്പിടിച്ച് ഒരുമ്മ കൊടുക്കും. അത്രേയുള്ളൂ. എല്ലാവരും പോയി സിനിമ കാണുക...’’ തേജലക്ഷ്മി പറയുന്നു.
2008 ല് ആണ് ഉർവശിയും മനോജ് കെ. ജയനും വേർപിരിയുന്നത്. 2013 ല് ചെന്നൈയില് ബില്ഡറായ ശിവപ്രസാദിനെ ഉർവശി വിവാഹം കഴിച്ചു. ഈ ബന്ധത്തില് ഇഷാൻ എന്നൊരു മകനും ഉര്വ്വശിക്കുണ്ട്. ശിവപ്രസാദ് ആദ്യമായി സംവിധാനം ചെയ്യുന്ന എല്. ജഗദമ്മ ഏഴാം ക്ളാസ് ബി സ്റ്റേറ്റ് ഫസ്റ്റ് ക്ളാസ് എന്ന ചിത്രത്തില് ഉർവശിയാണ് ടൈറ്റില് കഥാപാത്രത്തെ അവതരിപ്പിക്കുന്നത്. കുഞ്ഞാറ്റയും ഇഷാനും ഈ ചിത്രത്തിന്റെ ലൊക്കേഷനില് ഉർവശിയെ നേരിട്ടുകാണാൻ എത്തിയിരുന്നു. ഇതിന്റെ ചിത്രങ്ങള് ‘എന്റെ കുട്ടികള്ക്കൊപ്പം’ എന്ന ക്യാപ്ഷനില് ഉര്വ്വശി പങ്കുവയ്ക്കുകയും ചെയ്തിട്ടുണ്ട്.
