കായിക താരങ്ങളും സെലിബ്രിറ്റികളും തമ്മിലുള്ള പ്രണയബന്ധങ്ങള് മിക്കപ്പോഴും ഗോസിപ്പ് കോളങ്ങളില് ഇടം പിടിച്ചിട്ടുണ്ട്. അവയില് ചിലതൊക്കെ വിവാഹം വരെയെത്തിയിട്ടുണ്ട്, മറ്റ് ചിലതാകട്ടെ അഭ്യൂഹങ്ങളും ചര്ച്ചകളുമായി മാത്രം നിറഞ്ഞിട്ടുമുണ്ട്. അതില് എക്കാലത്തെയും മികച്ച ക്രിക്കറ്റ് ക്യാപ്റ്റന്മാരിൽ ഒരാളായി കണക്കാക്കപ്പെടുന്ന മഹേന്ദ്ര സിംഗ് ധോണിയും തന്റെ പ്രണയബന്ധങ്ങളുടെ പേരിൽ വാർത്തകളിൽ ഇടം പിടിച്ച കായിക താരമാണ്. ക്രിക്കറ്റ് കളിയിലെ മികച്ച റെക്കോർഡുകൾ സ്വന്തമാക്കിയ താരം കഴിഞ്ഞ വർഷം അന്താരാഷ്ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചിരുന്നു. മുൻ ഇന്ത്യൻ നായകൻ ഇപ്പോൾ കുടുംബത്തോടൊപ്പം മികച്ച സമയം ചെലവഴിക്കുകയാണ്. ഒരു ദശാബ്ദത്തിലേറെയായി ഭാര്യ സാക്ഷി സിംഗ് ധോണിയെ വിവാഹം കഴിച്ച് സന്തോഷത്തിലാണ് ധോണി. ദമ്പതികൾക്ക് സിവ എന്ന മകളും ഉണ്ട്.
എന്നാല് വിവാഹത്തിനു മുമ്പ്, റായ് ലക്ഷ്മി എന്നറിയപ്പെടുന്ന നടിയും മുൻ സൗന്ദര്യ റാണിയുമായ ലക്ഷ്മി റായിയുമായി സ്റ്റാർ ക്രിക്കറ്റ് താരം ഡേറ്റിംഗ് നടത്തുന്നുവെന്ന് ഒരിക്കൽ അഭ്യൂഹമുണ്ടായിരുന്നു. പല തവണ വാര്ത്തകളില് ഇടം നേടിയ ഇവരുടെ ബന്ധത്തെക്കുറിച്ച് മുന്പ് ധോണിയും റായ് ലക്ഷ്മിയും പരസ്യമായി പല വേദികളിലും പറഞ്ഞിട്ടുണ്ട്.
ഇപ്പോഴിതാ വേർപിരിഞ്ഞ് അഞ്ച് വർഷത്തിന് ശേഷവും ആളുകൾ അതിനെക്കുറിച്ച് സംസാരിക്കുന്നത് തുടരുന്നതിനെക്കുറിച്ച് തുറന്നു സംസാരിക്കുകയാണ് റായ് ലക്ഷ്മി. ‘‘ഇപ്പോഴും ആളുകള് എന്നെ മാഹിയുമായി, എം.എസ്.ധോണിയുമായി ടാഗ് ചെയ്ത് സംസാരിക്കും. ആ ബന്ധമൊക്കെ കഴിഞ്ഞിട്ട് വര്ഷങ്ങളായി. ധോണി വളരെ മുന്നോട്ട് പോവുകയും വിവാഹം കഴിക്കുകയും ചെയ്തു, കുട്ടിയുമായി. ഞാനുമെന്റെ ലൈഫില് ഒരുപാട് മുന്നോട്ടു പോയി. എന്റെ ജീവിതത്തില് ഞാന് ഇന്ന് വളരെ സന്തുഷ്ടയാണ്. എങ്കിലും ഇപ്പോഴും പലരും എന്റെ പേര് പലയിടത്തും എം.എസ്.ധോണിയുമായി ചേര്ത്തു വായിക്കാറുണ്ട്. അടുത്തിടെ അദ്ദേഹത്തിന്റെ ഒരു ബയോപിക് ഇറങ്ങിയപ്പോള് പലരും ഇതാണ് ലക്ഷ്മി റായ് യുടെ കഥാപാത്രം, അല്ലെങ്കില് സിനിമയില് ഏതാണ് റായ് ലക്ഷ്മി എന്ന തരത്തില് ട്രോളുകളും വാര്ത്തകളും വന്നിരുന്നു. പഴയ വിവാദങ്ങൾ പോലും ആളുകൾ പുതിയ വിവാദമാക്കുമ്പോൾ അത് എന്നെ ഞെട്ടിക്കാറുണ്ട്.
സ്റ്റേഡിയത്തില് പോകുന്നതടക്കം പല കാര്യങ്ങളില് നിന്നും ഞാന് പൂര്ണ്ണമായും ഒഴിഞ്ഞാണ് നില്ക്കുന്നത്. ഇന്ത്യ-പാക് ക്രിക്കറ്റ് മത്സരങ്ങളൊക്കെ വരുമ്പോള് വെറുതെ എന്റെ പേര് അവിടേക്ക് വലിച്ചിഴയ്ക്കുന്നത് ബുദ്ധിമുട്ടുള്ള കാര്യമാണ്. ആ സമയമൊക്കെ ക്രോസ് ചെയ്തു കഴിഞ്ഞു, പക്ഷേ വെറുതെ വിവാദങ്ങള് കൊണ്ടു വരേണ്ട ആവശ്യമില്ലല്ലോ. അന്നൊക്കെ എനിക്ക് ക്രിക്കറ്റ് വളരെയിഷ്ടമായിരുന്നു. അന്ന് ചെന്നൈ സൂപ്പര്കിംഗ്സിന്റെ ബ്രാന്ഡ് അംബാസിഡറായിരുന്നു ഞാന്. മിക്ക മാച്ചുകള് കാണാനും ഞാന് പോകുമായിരുന്നു. അതോടെ വിവാദങ്ങളും വന്നു തുടങ്ങി. അതോടെ ഞാന് ഐപിഎല്ലും നിര്ത്തി....’’ റായ് ലക്ഷ്മി പറയുന്നു.
ഏകദേശം 2008-2009 കാലഘട്ടത്തിലായിരുന്നു, റായിയും ധോണിയും പലപ്പോഴും ഒരുമിച്ച് കാണപ്പെടുന്നതിനാൽ അവർ ഡേറ്റിംഗിലാണെന്ന റിപ്പോർട്ടുകൾ വന്നത്. പരസ്യമായിരുന്നു ഇരുവരുടെയും പ്രണയ ബന്ധം. തങ്ങളുടെ പ്രണയത്തെ കുറിച്ച് ഇരുതാരങ്ങളും പരസ്യമായി പല വേദികളിലും പറഞ്ഞിട്ടുണ്ട്. നിരവധി പരിപാടികളിലും പാര്ട്ടികളിലും ഇരുവരും ഒന്നിച്ച് പങ്കെടുക്കുകയും ചെയ്തു. ഇന്ത്യൻ പ്രീമിയർ ലീഗിന്റെ പാര്ട്ടികള്ക്ക് ശേഷമാണ് വാര്ത്തകളിത് ഇടം പിടിച്ചത്. 2014 ൽ, ഒരു അഭിമുഖത്തിൽ റായ് ലക്ഷ്മി ഈ വേര്പിരിയലിനെക്കുറിച്ച് സംസാരിച്ചിരുന്നു. ‘‘വേർപിരിയൽ സൗഹാർദ്ദപരമായിരുന്നു, ഞങ്ങള്ക്ക് ഇപ്പോഴും പരസ്പരം ബഹുമാനമുണ്ട്. ഞാന് വളരെ സന്തുഷ്ടയായ വ്യക്തിയാണ്. എന്റെ ജോലിയാണ് എന്റെ മുന്ഗണന. അടുത്തെങ്ങും വിട്ടു പോകാത്തൊരു മുറിപ്പാട് ആണ് ധോണിയുമായുള്ള എന്റെ ബന്ധമെന്ന് ഞാന് മനസിലാക്കുന്നു. ധോണിയുടെ ഭൂതകാലത്തെ കുറിച്ച് പറയുമ്പോഴെല്ലാം മാധ്യമങ്ങള് ഞങ്ങളുടെ ബന്ധത്തെ എടുത്തിടും. എനിക്ക് തോന്നുന്നത് ഒരു കാലത്ത് എന്റെ മക്കള് പോലും അത് ടിവിയില് കാണുകയും എന്നോട് അതേകുറിച്ച് ചോദിക്കുകയും ചെയ്യുമെന്ന് തോന്നുന്നു...’’ റായ് ലക്ഷ്മി പറഞ്ഞു.
2010 ജൂലൈ 4ന് ഡെറാഡൂണില് വച്ചായിരുന്നു ധോണിയും സാക്ഷിയും വിവാഹിതരായത്. അടുത്ത കുടുംബാംഗങ്ങളുടെ സാന്നിധ്യത്തില് വളരെ രഹസ്യമായിട്ടായിരുന്നു വിവാഹം. സാക്ഷിയുമായി പ്രണയത്തിലായ ശേഷമാണ് ഇവരുടെ വിവാഹം. ഇരുവരും തങ്ങളുടെ പ്രണയം ആരാധകരില് നിന്നും മാധ്യമങ്ങളില് നിന്നും മറച്ചുവച്ചിരുന്നു. 2015ല് ധോണിക്കും സാക്ഷിക്കും സിവ സിംഗ് ധോണി എന്ന പെണ്കുഞ്ഞ് ജനിച്ചു.
ബിഗ് ബോസ് തെലുങ്ക് സീസൺ 4ൽ പങ്കെടുത്തവരിൽ ഒരാളായിരുന്നു റായ്. സിൻഡ്രെല്ല ആയിരുന്നു റായ് യുടെ അവസാനത്തെ റിലീസ്. ജാൻസി I.P.S, ആനന്ദ ഭൈരവി, ഗ്യാങ്സ്റ്റർ 21 എന്നിവയാണ് വരാനിരിക്കുന്ന റിലീസുകള്. മലയാള സിനിമയില് ആറുവർഷത്തെ ഇടവേളയ്ക്കുശേഷം ഡി.എൻ.എ. എന്ന ചിത്രത്തിലൂടെ താരം മടങ്ങിവരുകയും ചെയ്തു.
