അരങ്ങില് അഭിനയത്തിന്റെ മാറ്റുരച്ച് നന്നായി മിനുക്കിയെടുത്ത് അത് വെള്ളിത്തിരയിലൂടെ തെന്നിന്ത്യന് സിനിമാപ്രേക്ഷകരുടെ മുന്നില് അവതരിപ്പിച്ച് ഇതിഹാസതുല്യനായി മാറിയ താരമാണ് നെടുമുടി വേണു. താരത്തിന്റെ വേര്പാട് മലയാള സിനിമയ്ക്ക് മാത്രമല്ല കലാരംഗത്തു കൂടി തീരാനഷ്ടമാണ്. ഈ അഭിനയപ്രതിഭയെ ആരാധിച്ചും മാതൃകയാക്കുകയും ചെയ്യുന്ന നിരവധി താരങ്ങള് മലയാള സിനിമയിലുണ്ട്. അക്കൂട്ടത്തില് ഒരാളാണ് അജു വര്ഗീസ്. തന്റെ അഭിനയജീവിതത്തില് നെടുമുടി വേണുവിനെ എപ്പോഴും ബഹുമാനിക്കുകയും ആരാധിക്കുകയും ചെയ്തിട്ടുണ്ടെന്ന് അജു പറഞ്ഞിട്ടുണ്ട്.
ഇപ്പോഴിതാ ഇന്ത്യന് 2 വിലൂടെ വെള്ളിത്തിരയില് നെടുമുടി വേണുവിനെ ഒരിക്കല്ക്കൂടി കാണാനായ സന്തോഷം പങ്കിടുകയാണ് അജു വര്ഗീസ്. ഒരു കൂപ്പുകൈ ക്യാപ്ഷനായി നല്കിയാണ് അജു നെടുമുടി വേണവിന്റെ സീനുകള് പങ്കിട്ടിരിക്കുന്നത്.
അജുവിന് മാത്രമല്ല നിരവധി ആരാധകരും നെടുമുടി വേണുവിനെ കണ്നിറയെ കാണുകയാണ് ഇന്ത്യന് 2 വിലൂടെ. ട്രെയ്ലറും യൂട്യൂബില് തരംഗമാകുകയാണ്. നെടുമുടി വേണുവിനായി സംവിധായകന് ശങ്കര് ഇന്ത്യന് 2വില് ഒരു കഥാപാത്രം കരുതി വെച്ചിരുന്നു. എന്നാല് കൃഷ്ണസ്വാമിയായി ക്യാമറയ്ക്ക് മുന്നില് എത്താനായില്ല. അദ്ദേഹത്തിന്റെ വേര്പാടില് മലയാളത്തിലെ ഒരു നടന്റെ കൈകളിലേക്ക് ആ വേഷം കൈമാറുകയായിരുന്നു സംവിധായകന് ശങ്കര്. ആ കഥാപാത്രത്തെ പുന സൃഷ്ടിക്കുവാനായി എഐ സാങ്കേതിക വിദ്യയുടെ സഹായവും അദ്ദേഹം തേടി. നന്ദു പൊതുവാള് ആണ് നെടുമുടി വേണുവിന് പറഞ്ഞുവെച്ച കഥാപാത്രമായി ക്യാമറയ്ക്ക് മുന്നില് അഭിനയിച്ചത്.
നന്ദു പൊതുവാളിന്റെ മുഖത്തിന് നെടുമുടിയുമായി രൂപ സാദൃശ്യമുള്ളതാണ് സിനിമയിലേക്ക് ക്ഷണിക്കാനുള്ള ഒരു പ്രധാന കാരണം. നിരവധി ചെറുതും വലുതുമായ വേഷങ്ങളിലൂടെ മലയാള സിനിമയില് സജീവമായ നന്ദുവിന്റെ കരിയറിലെ മികച്ച ഒരു ചിത്രം കൂടിയായിരിക്കും ഇന്ത്യന് 2.
ഇന്ത്യന്റെ ആദ്യ ഭാഗത്ത് നെടുമുടി വേണു അവതരിപ്പിച്ച കൃഷ്ണസ്വാമി എന്ന കഥാപാത്രം ഏറെ ശ്രദ്ധ നേടിയിരുന്നു. അതുകൊണ്ടാകാം അരേ രൂപസാദൃശ്യമുള്ള ഒരു താരത്തെ കൊണ്ടുവരാന് ശങ്കര് തീരുമാനിച്ചത്. സിനിമയുടെ പ്രധാനപ്പെട്ട ഭാഗങ്ങളില് എല്ലാം നെടുമുടിയുടെ കഥാപാത്രം ഉണ്ടായിരുന്നു. ഇന്ത്യന് രണ്ടാം ഭാഗത്തിന്റെ ചിത്രീകരണം തുടങ്ങിയപ്പോഴേക്കും നെടുമുടി വേണു വേര്പെട്ടു പോയി. അദ്ദേഹത്തിന്റെ വേര്പാടില് നന്ദുവിലേക്ക് ആ കഥാപാത്രം എത്തുകയായിരുന്നു. ഇക്കഴിഞ്ഞ ദിവസം പുറത്തുവന്ന സിനിമയുടെ ടീസറും ശ്രദ്ധ നേടി.
