മാഡ്രിഡ്: അമേരിക്കയുടെ പ്രസിഡന്റ് കസേരയില് ഇരിക്കാന് കേവലം ഒരു ദിവസം മാത്രം ബാക്കി നില്ക്കേ ട്രംപിനെതിരേയുള്ള പ്രതിഷേധം അമേരിക്കയ്ക്ക് പുറത്തും. യൂറോപ്പിലേക്ക് ആദ്യമായി എത്തുന്ന ഡൊണാള്ഡ് ട്രംപിന്റെ സാന്നിദ്ധ്യത്തിന് യുവതികളുടെ ടോപ്ലെസ്സായ പ്രതിഷേധമാണ് നേരിടേണ്ടി വന്നിരിക്കുന്നത്.
സ്പെയിന്റെ തലസ്ഥാനമായ മാഡ്രിഡില് കഴിഞ്ഞ ദിവസം എത്തിയ ഡൊണാള്ഡ് ട്രംപിന്റെ പൂര്ണ്ണകായ പ്രതിമയെ ടോപ്ലെസ്സായി നഗ്നമായ ശരീരത്ത് ശക്തമായ പ്രതിഷേധം രേഖപ്പെടുത്തിയാണ് ഫീമന് എന്ന സംഘടനയിലെ യുവതികള് എതിരേറ്റത്. 'പെണ്ണുപിടുത്ത' വുമായി ബന്ധപ്പെട്ട് ട്രംപ് നേരത്തേ നടത്തിയ പ്രസ്താവനകളെ പരിഹസിച്ച് 'പിന് ഭാഗത്ത് തോണ്ടുക' എന്ന് വലിയ അക്ഷരത്തില് കുറിച്ച് പൂര്ണ്ണമായും അനാവൃതമാക്കിയ മാറിടവും പിന്ഭാഗവും പ്രദര്ശിപ്പിച്ച് മെഴുകു പ്രതിമയ്ക്ക് ചുറ്റും ഓടി. മാഡ്രിഡിലെ മ്യൂസോ ഡി സെര മ്യുസിയത്തിലേക്ക് കൊണ്ടുവന്ന പ്രതിമയ്ക്കു നേരെയായിരുന്നു ഈ വ്യത്യസ്ത പ്രതിഷേധം.
സംഭവത്തിന്റെ വീഡിയോ വൈറലായി മാറിയിട്ടുണ്ട്. പ്രതിഷേധത്തിനിടയില് ഒരു യുവാവ് കോട്ട് ഉപയോഗിച്ച് യുവതിയുടെ മാറിടം മറയ്ക്കാന് ശ്രമിക്കുന്നുണ്ട്. മറ്റൊരാള് നിലത്ത് ചിതറിക്കിടക്കുന്ന നീലയും ചുവപ്പും വെള്ളയും ബലൂണ് ഉപയോഗിച്ചും ഇവരെ മറയ്ക്കാന് ശ്രമിക്കുന്നുണ്ട്. എന്നാല് അതെല്ലാം അവഗണിച്ച് തെന്നിമാറിയ യുവതി വീണ്ടും പ്രതിഷേധം തുടരുകയും ചെയ്യുന്നത് വീഡിയോയില് വ്യക്തം. ഫെമന് പിന്നീട് പ്രതിഷേധത്തിന്റെ ഉത്തരവാദിത്വം ട്വിറ്ററിലൂടെ ഏറ്റെടുത്തു.
അതേസമയം ഫീമന് പ്രവര്ത്തകര് അമേരിക്കന് പ്രസിഡന്റ് തെരഞ്ഞെടുപ്പ് നടന്ന നവംബറിലും സമാനമായ പ്രതിഷേധം നടത്തിയിരുന്നു. ടോപ്ലെസ്സായ രണ്ടു യുവതികള് നെഞ്ചില് പ്രതിഷേധവാചകവും എഴുതി മാന്ഹട്ടന് പോളിംഗ് സ്റ്റേഷനില് വോട്ട് രേഖപ്പെടുത്താന് എത്തിയിരുന്നു. പ്രതിഷേധത്തിന്റെ പശ്ചാത്തലത്തില് മാഡ്രിഡിലെ മ്യുസിയത്തില് സുരക്ഷ ശക്തമാക്കിയിട്ടുണ്ട്.
