ടെലിവിഷന് പ്രേക്ഷകര്ക്ക് ഏറെയിഷ്ടമുള്ള ഒരു റിയാലിറ്റി ഷോയാണ് ബിഗ് ബോസ് മലയാളം. ബിഗ് ബോസ് മലയാളം സീസണ് 6 ഏറ്റവും കൂടുതല് വിമർശനങ്ങള് നേരിട്ട ഒരു സീസണായിരുന്നു. എല്ലാ മത്സരാര്ത്ഥികളും രണ്ടു മൂന്നു എപ്പിസോഡുകള് പിന്നിട്ടതോടെ പ്രേക്ഷകരുടെ കണ്ണിലെ കരടുകളായി. അതില് തുടക്കം മുതല് ഒടുക്കം വരെ വലിയ നെഗറ്റീവ് നേരിട്ട, വിമര്ശനങ്ങള് നേരിട്ട താരമാണ് ജാസ്മിൻ ജാഫർ. സീസണിന്റെ തുടക്കത്തില് വലിയ സ്വീകാര്യത ലഭിച്ചെങ്കിലും ഗബ്രിയുമായിട്ട് ചേർന്ന് കോമ്പോ കളിച്ചത് താരത്തിന് തിരിച്ചടിയായി.
ഷോ കഴിഞ്ഞെങ്കിലും ജാസ്മിനെതിരെ ഉയരുന്ന സൈബർ ആക്രമണങ്ങള്ക്ക് യാതൊരു കുറവുമില്ല. കടുത്ത അധിക്ഷേപങ്ങളാണ് താരത്തിനെതിരെ പലരും നടത്തുന്നത്. എന്നാല് ഇപ്പോഴിതാ ഇത്തരം വിമർശനങ്ങള്ക്ക് തന്റെ പുതിയ വീഡിയോയിലൂടെ മറുപടി നല്കുകയാണ് ജാസ്മിൻ. ഡിവൈഎഫ്ഐ കരുവാളൂർ വെസ്റ്റ് മേഖല കമ്മിറ്റിയുടെ നേതൃത്വത്തില് ജാസ്മിനെ ആദരിച്ച വീഡിയോ ആണ് താരം പങ്കിട്ടത്. ‘‘ഒരേ കാറ്റ് നമ്മുടെയെല്ലാം മേൽ വീശുന്നു... ദുരന്തത്തിന്റെയും അവസരത്തിന്റെയും മാറ്റത്തിന്റെയും കാറ്റ്... അതിനാല് കാറ്റിന്റെ വീശലില്ല, അതിലെ യാത്രക്കാരന്റെ സജ്ജീകരണമാണ് നമ്മുടെ ജീവിതത്തിന്റെ ദിശ നിർണ്ണയിക്കുന്നത്...’’ എന്ന ക്യാപ്ഷന് നല്കിയാണ് ജാസ്മിന് വീഡിയോ പങ്കുവച്ചത്.
അതേസമയം പുതിയ വീഡിയോയ്ക്ക് താഴെ നിരവധി പേരാണ് ജാസ്മിനെ പിന്തുണച്ചും വിമർശിച്ചും രംഗത്തെത്തിയത്. നിന്നെ തളർത്താൻ ശ്രമിച്ചവരുടെ മുന്നില് ഉയർന്നു കാണിച്ചു കൊടുക്ക്, കൊല്ലത്തിന്റെ അഭിമാനമാണ് ജാസ്മിൻ, ജാസ്മിനെ കാണുന്നത് തന്നെ പോസറ്റീവ് വൈബ് ആണ്, അതാണ് നമ്മുടെ പെണ്ണാണ്...’’എന്നാണ് അനുകൂലിച്ചു വരുന്ന കമന്റുകള്.
എന്നാല് എന്ത് ചെയ്തിട്ടാണ് ഡിവൈഎഫ്ഐ ജാസ്മിനെ ആദരിച്ചതെന്നാണ് ചിലരുടെ ചോദ്യം. ബിഗ് ബോസില് പോയി ജാസ്മിൻ എന്ത് സന്ദേശമാണ് നല്കിയതെന്നും കാമുകൻമാരെ ഇടയ്ക്കിടെ മാറ്റുന്നതാണോ വലിയ കാര്യം എന്നുമൊക്കെയാണ് പലരും കമന്റ് ചെയ്യുന്നത്. അതിനിടെ പരിപാടിയ്ക്കിടെ ജാസ്മിൻ കാലിൻമേല് കാല് കയറ്റി വെച്ചിരുന്നതും ചിലരെ ചൊടിപ്പിച്ചിട്ടുണ്ട്. ‘പ്രായം കൂടിയ ആള്ക്കാരുടെ മുന്നില് കാലും പൊക്കി ഇരിക്കുന്നത് അഹങ്കാരത്തിന്റെ ലക്ഷണം ആണ്.ഞാൻ എന്തോ വലിയ സംഭവമാണെന്ന തോന്നലാണ്...’ എന്നാണ് വിമര്ശക കമന്റുകള്. ഏതായാലും ഇത്തരം കമന്റുകളോടൊന്നും ജാസ്മിൻ ഇതുവരെ പ്രതികരിച്ചിട്ടില്ല.
തങ്ങള് സുഹൃത്തുക്കളാണെന്ന് ജാസ്മിനും ഗബ്രിയും ഷോയില് പറഞ്ഞിരുന്നു, പക്ഷേ ലൗ ട്രാക്ക് പിടിച്ച് ജനങ്ങളെ വിഡ്ഢികളാക്കുകയാണ് ഇരുവരുമെന്ന വിമര്ശനം ഉയര്ന്നു വന്നു. ഗബ്രിയുമായുള്ള ജാസ്മിന്റെ കൂട്ടുകെട്ടിനെതിരെ താരത്തിന്റെ കുടുംബമടക്കം രംഗത്തെത്തിയിരുന്നു. ജാസ്മിനെ ബിഗ് ബോസിലേക്ക് വിളിച്ച് ഗബ്രിയുമായുള്ള കൂട്ടുകെട്ട് ഒഴിവാക്കണമെന്ന് പിതാവ് സൂചന നല്കി. എന്നാല് അതുകൊണ്ടൊന്നും പിൻമാറാൻ താരം തയ്യാറായില്ല. ഗബ്രി-ജാസ്മിൻ കോമ്പോ പുറത്തും അകത്തും വലിയ ചർച്ചയായതോടെ ഇരുവരും തമ്മിലുള്ള ബന്ധത്തെ കുറിച്ച് അവതാരകനായ മോഹൻലാല് ചോദിച്ചിരുന്നു. പ്രാക്ടിക്കല് ആകാത്തതിനാല് ഞങ്ങള് പ്രണയം പിടിച്ചുവെച്ചിരിക്കുകയാണെന്ന് ഇരുവരും വിശദീകരണം നല്കി.
ഷോ പകുതിയായതോടെ ഗബ്രിയോടുള്ള തന്റെ ഉള്ളിലെ ഇഷ്ടം ജാസ്മിൻ തുറന്ന് സമ്മതിച്ചു. എന്നാല് താൻ ജാസ്മിനെ അങ്ങനെ കാണുന്നില്ലെന്നായിരുന്നു ഗബ്രിയുടെ മറുപടി. പ്രണയം തുറന്ന് പറഞ്ഞതോടെ ജാസ്മിന്റെ നിശ്ചയിച്ചിരുന്ന വിവാഹം മുടങ്ങി. താരവുമായി വിവാഹം ഉറപ്പിച്ചിരുന്ന അഫ്സല് അമീർ എന്ന യുവാവ് വിവാഹത്തില് നിന്നും പിൻമാറുകയായിരുന്നു.
