വെറുതെ കുറെ സിനിമകളിൽ അഭിനയിക്കുന്നതിനു പകരം വളരെ സെലക്ടീവായി സിനിമകള് തെരഞ്ഞെടുക്കുന്ന നടിമാരിലൊരാളാണ് തബു. തമിഴ്, ഹിന്ദി, മലയാളം തുടങ്ങി അഭിനയിച്ച ഭാഷകളിലെല്ലാം ശ്രദ്ധേയമായ കഥാപാത്രങ്ങളാണ് താരം അവതരിപ്പിച്ചിട്ടുണ്ട്.
സംവിധായകൻ പ്രിയദർശനൊപ്പം നിരവധി സിനിമകളില് തബു പ്രവർത്തിച്ചിട്ടുണ്ട്. ആ കഥാപാത്രങ്ങളെല്ലാം പ്രേക്ഷകർ നെഞ്ചിലേറ്റുകയും ചെയ്തിട്ടുണ്ട്.
ഇപ്പോഴിതാ വിരാസത് എന്ന പ്രിയദർശൻ ചിത്രത്തില് പ്രവർത്തിച്ചതിന്റെ അനുഭവം പങ്കുവയ്ക്കുകയാണ് തബു. ഷൂട്ടിംഗിനിടയിലെ രസകരമായ സംഭവമാണ് താരം പറഞ്ഞത്. "ആ കഥാപാത്രത്തിനായി പ്രിയൻ (പ്രിയദർശൻ) എനിക്ക് എണ്ണമയമുള്ള മുടിയും നാടൻ ലുക്കും വേണമെന്ന് പറഞ്ഞു.
മുടിയില് എണ്ണമയം തോന്നാൻ കുറച്ച് ജെല് എടുത്ത് തേക്കാൻ ഹെയർ സ്റ്റൈലിസ്റ്റ് പറഞ്ഞു. സെറ്റിലെത്തിയപ്പോള് ഞാൻ നിന്നോട് എണ്ണ തേക്കാൻ പറഞ്ഞതല്ലേ എന്ന് പ്രിയൻ ചോദിച്ചു. അതെ കുറച്ച് എണ്ണയുണ്ട്. നല്ല തിളക്കം വരുന്നുണ്ടെന്ന് ഞാൻ പറഞ്ഞു.
കുറച്ചു കഴിഞ്ഞപ്പോള് അദ്ദേഹം എന്റെ പിറകിലൂടെ ഒരു കുപ്പി വെളിച്ചെണ്ണയുമായി എത്തി. അത് മുഴുവൻ എന്റെ തലയിലേക്ക് ഒഴിച്ചു.
എണ്ണ തേക്കുക എന്നത് കൊണ്ട് താൻ ഇതാണ് ഉദ്ദേശിച്ചതെന്ന് പ്രിയൻ പറഞ്ഞു. എന്നാല് പിന്നീട് മേക്കപ്പ് ചെയ്യുമ്പോൾ എനിക്കത് വളരെ എളുപ്പമായി മാറി. എനിക്ക് ഹെയർസ്റ്റൈലിങ് ഒന്നും ചെയ്യേണ്ടി വന്നില്ല. അഞ്ചു മിനിറ്റിനുള്ളില് ഞാൻ റെഡിയാകുമായിരുന്നു. നീളമുള്ള മുടി എണ്ണ തേച്ച് മടഞ്ഞ് സെറ്റിലേക്ക് പോയാല് മതിയായിരുന്നു..." തബു പറയുന്നു .
തേവർ മകൻ എന്ന തമിഴ് ചിത്രത്തിന്റെ ഹിന്ദി റീമേക്കായിരുന്നു വിരാസത്. അനില് കപൂർ, തബു, പൂജ ബത്ര എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്. ഗെഹ്ന എന്ന ഗ്രാമീണ സ്ത്രീയുടെ വേഷത്തിലായിരുന്നു ചിത്രത്തില് തബു എത്തിയത്.
ഔരൊൻ മേ കഹാൻ ദം ഥാ എന്ന സിനിമയാണ് തബുവിന്റേതായി ഇനി റിലീസ് ചെയ്യാനുള്ളത്. ഈ മാസം അഞ്ചിന് ചിത്രം തിയറ്ററിലെത്തും. അജയ് ദേവ്ഗണ് നായകനാകുന്ന ചിത്രം സംവിധാനം ചെയ്തിരിക്കുന്നത് നീരജ് പാണ്ഡെയാണ്.
