ഗാലക്സി അണ്പാക്ക്ഡ് 2024 ഇവന്റില് സാംസങ്ങിന്റെ ആദ്യത്തെ റഗ്ഗ്ഡ് സ്മാര്ട്ട് വാച്ച് എന്ന പ്രത്യേകതയുമായി ഗാലക്സി വാച്ച് അള്ട്ര എത്തി. ഇതോടൊപ്പം എത്തിയ സ്മാര്ട്ട് റിങ്ങും ഏറെ ശ്രദ്ധ നേടി. നിരവധി ആരോഗ്യ നിരീക്ഷണ ഫീച്ചറുകള്, IP68 റേറ്റിംഗ്, 7 ദിവസത്തെ ബാറ്ററി ലൈഫ് തുടങ്ങിയ നിരവധി ഫീച്ചറുകളുമായിട്ടാണ് സ്മാര്ട്ട് റിങ് എത്തിയിരിക്കുന്നത്.
സാംസങ് ഗാലക്സി വാച്ച് 7ന്റെ പ്രത്യേകതകള് - ഗാലക്സി വാച്ച് 7-ന്റെ 40 എംഎം വേരിയന്റില് സഫയര് ക്രിസ്റ്റല് ഗ്ലാസ് ഡിസ്പ്ലേയുള്ള 1.3 ഇഞ്ച് സൂപ്പര് അമോലെഡ് ഓള്വെയ്സ് ഓണ്-ഡിസ്പ്ലേ ഉണ്ട്. 44 എംഎം മോഡലില് കഴിഞ്ഞ വര്ഷം പുറത്തിറക്കിയ സാംസങ് ഗാലക്സി വാച്ച് 6 ന്റേത് പോലെ 1.5 ഇഞ്ച് ഡിസ്പ്ലേയാണ് ഉള്ളത്. എക്സിനോസ് ഡബ്ല്യു 1000 ചിപ്സെറ്റാണ് ഗാലക്സി വാച്ച് 7ല് സജ്ജീകരിച്ചിരിക്കുന്നത്. ഇത് 2 ജിബി റാമും 32 ജിബി ഇന്റേണല് സ്റ്റോറേജും വാഗ്ദാനം ചെയ്യുന്നു, വെയര് ഒഎസ് 5-ല് ആണ് ഇതിന്റെ പ്രവര്ത്തനം. മെച്ചപ്പെട്ട ബയോആക്ടീവ് സെന്സര്, AGEs ഇന്ഡക്സ്, സ്ലീപ് അനാലിസിസിനായുള്ള വിപുലമായ AI അല്ഗോരിതം, എഫ്ഡിഎ അംഗീകൃത സ്ലീപ്പ് അപ്നിയ ഫീച്ചര് എന്നിവ സ്മാര്ട്ട് വാച്ചില് ഉള്പ്പെടുന്നു.
അപ്ഗ്രേഡു ചെയ്ത ഹാര്ട്ട് റേറ്റ് മോണിറ്ററിങ്, ഏട്രിയല് ഫൈബ്രിലേഷനെ സൂചിപ്പിക്കുന്ന ക്രമരഹിതമായ ഹാര്ട്ട് റേറ്റ് കണ്ടെത്താന് IHRN ഫീച്ചര്, ഇലക്ട്രോകാര്ഡിയോഗ്രാം (ഇസിജി), രക്തസമ്മര്ദ്ദം (ബിപി) നിരീക്ഷണ ഫീച്ചര് എന്നിവയും ഗാലക്സി വാച്ച് 7ല് ഉണ്ട്. 40എംഎം വേരിയന്റിന് 300എംഎഎച്ച് ബാറ്ററിയും 44എംഎം വേരിയന്റിന് 425എംഎഎച്ച് യൂണിറ്റും ഉണ്ട്. രണ്ട് വാച്ചുകളും ഫാസ്റ്റ് ചാര്ജിംഗിനെ പിന്തുണയ്ക്കുന്നു. 5ATM + IP68 റേറ്റിങ് ഈ സ്മാര്ട്ട് വാച്ച് വാഗ്ദാനം ചെയ്യുന്നു, ഇതില് LTE, ബ്ലൂടൂത്ത് 5.3, NFC, Wi-Fi 2.4+5GHz, GPS (L1+L5)/ Glonass/ Beidou/ Galileo എന്നിവയും ഉള്പ്പെടുന്നു. ഗാലക്സി വാച്ച് 7-ന്റെ 40 എംഎം വേരിയന്റ് ഗ്രീന്, ക്രീം നിറങ്ങളിലും 44 എംഎം വേരിയന്റ് സില്വര്, ഗ്രീന് നിറങ്ങളിലുമാണ് പുറത്തിറക്കിയിരിക്കുന്നത്.
ഗാലക്സി വാച്ച് അള്ട്ര - 1.5 ഇഞ്ച് സൂപ്പര് അമോലെഡ് ഓള്വെയ്സ് ഓണ് ഡിസ്പ്ലേ, 47 എംഎം വലുപ്പം, 3,000 നിറ്റ് പീക്ക് ബ്രൈറ്റ്നെസും ഇതിലുണ്ട്. വാച്ച് 7 ന് സമാനമായ ചിപ്സെറ്റും ഓപ്പറേറ്റിംഗ് സിസ്റ്റവും ഗാലക്സി വാച്ച് അള്ട്രാ വാഗ്ദാനം ചെയ്യുന്നു. എന്നാല് ബാറ്ററി വ്യത്യാസമുണ്ട്. അള്ട്രാ വേരിയന്റില് 590 എംഎഎച്ച് ബാറ്ററിയാണുള്ളത്. ഇത് സേവിംഗ് മോഡില് 100 മണിക്കൂര് വരെ പവര് വാഗ്ദാനം ചെയ്യുമെന്ന് അവകാശപ്പെടുന്നു. ഗാലക്സി വാച്ച് അള്ട്ര ഒരു ടൈറ്റാനിയം ഗ്രേഡ് 4 ഫ്രെയിം അവതരിപ്പിക്കുന്നു, ഇതിന് വാച്ച് 7-ന്റെ അതേ 10ATM + IP68 റേറ്റിംഗും MIL-STD-810H ഉം ഉണ്ട്. ഉയര്ന്ന മര്ദ്ദത്തിലുള്ള ജല പ്രവര്ത്തനങ്ങള്ക്കോ ഡൈവിംഗിനോ ഇത് അനുയോജ്യമല്ല. നിരവധി ആരോഗ്യ നിരീക്ഷണ ഫീച്ചറുകളും ഈ വാച്ചിലുണ്ട്. നീന്തല്, സൈക്ലിംഗ്, ഓട്ടം തുടങ്ങിയ വ്യായാമങ്ങള് ട്രാക്ക് ചെയ്യാന് ഉപയോക്താക്കളെ ഇത് അനുവദിക്കുന്നു.
ഗാലക്സി റിങ് - 24/7 ആരോഗ്യ നിരീക്ഷണ ഫീച്ചറുകളുമായിട്ടാണ് ഗാലക്സി റിങ് എത്തുന്നത്. ഉറക്ക പാറ്റേണുകള് മനസിലാക്കാനും ശീലങ്ങള് മെച്ചപ്പെടുത്താനും സഹായിക്കുന്നതിന് ശക്തമായ AI അല്ഗോരിതം ഉപയോഗിച്ച് വിപുലമായ സ്ലീപ് ട്രാക്കിങ് ഇത് വാഗ്ദാനം ചെയ്യുന്നു. സ്ലീപ്പ് സ്കോര്, കൂര്ക്കംവലി വിശകലനം, ഉറക്കത്തിനിടയിലെ ചലനം, ഉറക്കസമയം, ഹൃദയമിടിപ്പ്, ശ്വാസോച്ഛ്വാസ നിരക്ക് എന്നിവയെല്ലാം ഇത് വിശകലനം ചെയ്യുന്നു. എഐ ഫീച്ചറുകള് ഉള്ളതിനാല് വിശദമായ ആരോഗ്യ റിപ്പോര്ട്ടുകള് സൃഷ്ടിക്കാന് ഗാലക്സി റിങ് ഉപയോക്താക്കളെ സഹായിക്കുന്നു. ഹൃദയമിടിപ്പ് തുടര്ച്ചയായി നിരീക്ഷിക്കുന്ന ഹേര്ട്ട് റേറ്റ് മുന്നറിയിപ്പ്, തത്സമയ ഹൃദയമിടിപ്പ് ചെക്കിങ് തുടങ്ങി നിരവധി ഫീച്ചറുകള് ഇതിലുണ്ട്. ഗാലക്സി വാച്ച് അള്ട്രായ്ക്ക് സമാനമായി ടൈറ്റാനിയം ഗ്രേഡ് 5 ഫ്രെയിമോടുകൂടിയ 10 എടിഎം, IP68 റേറ്റിംഗുകള് ഇതിലുണ്ട്. ഇതിലെ ബാറ്ററി റേഞ്ച് 18mAh മുതല് 23.5mAh വരെയാണ്, ഒറ്റ ചാര്ജില് 7 ദിവസം വരെ ബാറ്ററി ലൈഫ് വാഗ്ദാനം ചെയ്യുമെന്ന് കമ്പനി അവകാശപ്പെടുന്നു. ടൈറ്റാനിയം സില്വര്, ടൈറ്റാനിയം ഗോള്ഡ്, ടൈറ്റാനിയം ബ്ലാക്ക് കളര് ഓപ്ഷനുകളില് സാംസങ് ഗാലക്സി റിങ് ലഭ്യമാകും.
സാംസങ് ഗാലക്സി വാച്ച് 7 രണ്ട് വേരിയന്റുകളുണ്ട്. 40 എംഎം, 44 എംഎം എന്നിവയാണ് അവ. ഇത് 299 ഡോളര് പ്രാരംഭ വിലയില എത്തുന്നു. വാച്ച് അള്ട്രാ 47 എംഎം വേരിയന്റിന്റെ വില 649 യുഎസ് ഡോളറാണ്. ഒമ്പത് വ്യത്യസ്ത വലുപ്പങ്ങളില് വരുന്ന ഗാലക്സി റിങ്ങിന്റെ ആരംഭ വില 399 ഡോളര് (ഏകദേശം 33,200 രൂപ) ആണ്.
