സിനിമാമേഖലയിലെ വഴക്കുകളും പ്രശ്നങ്ങളും ഇഷ്ടക്കേടുകളുമൊക്കെ വളരെപ്പെട്ടെന്നാണ് സോഷ്യല് മീഡിയയിലൂടെ ശ്രദ്ധിക്കപ്പെടുന്നത്. കഴിഞ്ഞ ദിവസം എം.ടി. വാസുദേവന് നായരുടെ ഒമ്പത് കഥകളെ ആസ്പദമാക്കി ഒരുങ്ങുന്ന ‘മനോരഥങ്ങള്’ എന്ന സീരീസിന്റെ ട്രെയ്ലർ ലോഞ്ചിനോടനുബന്ധിച്ച് നടന്ന സമ്മാനദാന ചടങ്ങില് ആസിഫ് അലിയെ ഹിന്ദുസ്ഥാനി സംഗീതജ്ഞൻ രമേശ് നാരായണ് അപമാനിച്ചു എന്ന തരത്തിലുള്ള വീഡിയോ പ്രചരിച്ചിരുന്നു. സീരീസിലെ ചിത്രങ്ങളില് ജയരാജ് സംവിധാനം ചെയ്ത ഹ്രസ്വചിത്രത്തിനു രമേശ് നാരായണ് സംഗീതം നല്കിയിട്ടുണ്ടായിരുന്നു, അതിനുള്ള മെമെന്റോ ആസിഫിന്റെ കൈയില് നിന്നാണ് രമേശ് വാങ്ങിയത്.
എന്നാല് ആസിഫിന്റെ കയ്യില് നിന്നും നീരസത്തോടെ മെമെന്റോ സ്വീകരിക്കുകയും, ശേഷം സംവിധായകൻ ജയരാജിനെ വിളിച്ച് വരുത്തി ആ മെമെന്റോ കയ്യില് വച്ച് കൊടുത്ത ശേഷം സ്വീകരിക്കുന്നതുമാണ് സോഷ്യല് മീഡിയയില് പ്രചരിച്ച വീഡിയോയിലുള്ളത്. വീഡിയോ വൈറലായതോടെ ആസിഫിനെ രമേശ് നാരായണ് അപമാനിച്ചു എന്ന തരത്തിലുള്ള കമന്റുകളും മറ്റും വന്നു.
ഇപ്പോഴിതാ ആ വിവാദത്തില് മറുപടി പറയുകയാണ് രമേശ് നാരായണ്. മെമെന്റോ നല്കി സീരീസിന്റെ ഭാഗമായി എല്ലാവരെയും ആദരിക്കുന്ന വേളയില് വേദിയിലേക്ക് ക്ഷണം ലഭിച്ചിരുന്നില്ല എന്നും, അതില് വിഷമം തോന്നിയെന്നുമാണ് രമേശ് നാരായണ് പറയുന്നത്.
‘‘മെമെന്റോ നല്കി സീരീസിന്റെ ഭാഗമായി എല്ലാവരെയും ആദരിക്കുന്ന വേളയില് വേദിയിലേക്ക് ക്ഷണം ലഭിച്ചിരുന്നില്ല. അതില് വിഷമം തോന്നിയിരുന്നു. തിരിച്ച് തിരുവനന്തപുരത്തേക്ക് വരേണ്ടിയിരുന്നതിനാല്, വർഷങ്ങളായി പരിചയമുള്ള എം.ടിയുടെ മകള് അശ്വതിയോട് എന്റെ വിഷമം അറിയിച്ചു. അവരാണ് തിടുക്കത്തില് എനിക്കും ഒരു മെമെന്റോ തരാൻ ഒരുക്കം കൂട്ടിയത്. അപ്പോഴും വേദിയില് കേട്ട പേര് സന്തോഷ് നാരായണൻ എന്നായിരുന്നു.
സന്തോഷ് നാരായണൻ എന്ന പേരാണ് അവിടെ അനൗണ്സ് ചെയ്തത്, അതിന് പിന്നാലെ ആസിഫ് വന്ന് മൊമന്റോ എന്നെ ഏല്പ്പിച്ച് പോയി. ആസിഫ് എനിക്കാണോ ഞാൻ ആസിഫിനാണോ മൊമന്റോ നല്കേണ്ടത് എന്ന് പോലും വ്യക്തമാകുന്നതിന് മുൻപേ, മെമെന്റോ എന്നെ ഏല്പ്പിച്ച ആസിഫ് ഒരു ആശംസ പോലും പറയാതെ പോയി. തുടർന്നാണ് ഞാൻ ജയരാജിനെ വിളിച്ചത്. ആസിഫിനെ ശ്രദ്ധിച്ചില്ലെന്നത് വാസ്തവമാണെങ്കിലും അപമാനിക്കുകയോ വിവേചനം കാണിക്കുകയോ ചെയ്തിട്ടില്ല. അതിനുശേഷം ഇന്ന് രാവിലെ അവിടെയുണ്ടായ സംഭവങ്ങളില് ക്ഷമചോദിച്ച് ജയരാജ് സന്ദേശം അയച്ചിരുന്നു. ഇതൊരു മൊമന്റോ മാത്രമല്ലേ, പുരസ്കാരമൊന്നുമല്ലല്ലോ ഏതെങ്കിലും ഒരു വ്യക്തി തരണമെന്ന് വാശിപടിക്കാൻ. വസ്തുത ഇതായിരിക്കെ കാര്യങ്ങള് മനസിലാക്കാതെയുള്ള സൈബർ ആക്രമണത്തില് വിഷമമുണ്ട്...’’ രമേശ് നാരായണ് പറഞ്ഞു. ഒരു സ്വകാര്യ ചാനലിന് നല്കിയ അഭിമുഖത്തിലാണ് രമേശ് നാരായണ് ഇതു പറഞ്ഞത്.
കമല് ഹാസൻ, മമ്മൂട്ടി, മോഹൻലാല് തുടങ്ങിയവർ ഭാഗമായ മനോരഥങ്ങള് സീരീസ് ഏറെക്കാലമായി മലയാളി പ്രേക്ഷകർ കാത്തിരിക്കുന്ന കലാസൃഷ്ടിയാണ്. സീരീസ് ഉടൻ ഒ.ടി.ടി. റിലീസ് ചെയ്യും എന്ന് പ്രതീക്ഷിക്കുന്നു.
