കോട്ടയം; കേരളം കണ്ട ഏറ്റവും ജനകീയനായ നേതാവ് സാധാരണക്കാരില് സാധാരണക്കാരനായി ഉറങ്ങുന്ന കല്ലറയില് ഒരു വര്ഷമായി ആള്ക്കൂട്ടം ഒഴിഞ്ഞിട്ടില്ല. ഇപ്പോഴും നിലക്കാത്ത ജനപ്രവാഹം കാലം കൈകൂപ്പിയ ഉമ്മന്ചാണ്ടിക്കുള്ള നാടിന്റെ ആദരവാണ്. വേര്പാടിന്റെ വാര്ഷികമായതോടെ കല്ലറയിലേക്ക് എത്തുന്നവരുടെ എണ്ണവും വര്ധിച്ചു.
ഉമ്മന്ചാണ്ടി നടന്ന് തീര്ത്ത വഴികളിലൂടെ ഒരു നാട് മുഴുവന് ഇന്ന് ഒരിക്കല് കൂടി കുഞ്ഞൂഞ്ഞിനരികിലെത്തും. പുതുപ്പള്ളിയുടെ മണ്ണില് ഉറങ്ങുന്ന ഉമ്മന്ചാണ്ടി ഇന്ന് ഒരിക്കല് കൂടി ആള്ക്കൂട്ടത്തിനിടയിലാകും- പുതുപ്പള്ളി വീട്ടിലെ ഞായറാഴ്ചകള് പോലെ. ഉമ്മന്ചാണ്ടിയുടെ കരുണയും കരുതലും വെളിപ്പെടുത്തുന്ന സമാനതകളില്ലാത്ത കാഴ്ചകളായിരുന്നു പുതുപ്പള്ളി വീട്ടിലെ ഞായറാഴ്ചകള്.
ഞായറാഴ്ചകളില് പുതുപ്പള്ളിയിലെ തറവാട്ടുവീടിന്റെ മുറ്റത്ത് ഉമ്മന്ചാണ്ടിയെ കാണാനും ആവലാതികള് പങ്കുവയ്ക്കാനും എത്തിയിരുന്ന ആയിരങ്ങള് ഒരു വര്ഷമായി അദ്ദേഹത്തിന്റെ കബറിടത്തിലേക്കാണ് എത്തുന്നത്. 53 വര്ഷങ്ങളായി പുതുപ്പള്ളിക്ക് ഉണ്ടായിരുന്ന പതിവുകളെല്ലാം ഓര്മ്മയായ ഒരു വര്ഷമാണ് കടന്ന് പോയത്.
മുഖ്യമന്ത്രി ആയപ്പോഴും പ്രതിപക്ഷനേതാവായപ്പോഴും ഉമ്മന്ചാണ്ടി തെറ്റിക്കാത്ത ഒരു പതിവായിരുന്നു ഞായറാഴ്ചകളില് പുതുപ്പള്ളിയിലെ തറവാട്ടുമുറ്റത്ത് ജനങ്ങളെ കാണുകയെന്നത്. ലോകത്തിന്റെ ഏത് കോണിലായിരിക്കുമ്പോഴും സ്വന്തം മണ്ഡലമായ പുതുപ്പള്ളിയില് ഞായറാഴ്ച നടത്തുന്ന ജനസമ്പര്ക്ക പരിപാടി മുടക്കമില്ലാതെ നടത്തുന്ന കാര്യത്തില് അദ്ദേഹം ഏറെ നിര്ബന്ധം കാണിച്ചിരുന്നു.
ഉമ്മന്ചാണ്ടിക്ക് വന്നെത്താന് സാധിക്കാത്ത ഞായറാഴ്ചകളില് വിവരം അറിയാതെ പുതുപ്പള്ളിയിലെ വീട്ടില് എത്തുന്ന പാവപ്പെട്ടവര്ക്ക് ബുദ്ധിമുട്ട് ഉണ്ടാകാതിരിക്കാന് വേണ്ടി ക്രമീകരണങ്ങള് ഏര്പ്പെടുത്താനും അദ്ദേഹം പ്രത്യേകം ശ്രദ്ധിച്ചിരുന്നു. ലോകത്തിന്റെ ഏതു കോണിലായിരുന്നാലും ഞായറാഴ്ച രാവിലെ പുതുപ്പള്ളി പള്ളിയിലും വീട്ടിലും എത്തുന്ന കാര്യത്തില് കടുകിടെ വിട്ടുവീഴ്ചയ്ക്ക് അദ്ദേഹം തയാറായിട്ടുമില്ല.
വീട്ടുമുറ്റവും സമീപത്തെ ഇടവഴികളും നിറയുന്ന പരാതിക്കാര്ക്കിടയിലേക്ക് ഇറങ്ങിച്ചെന്ന് തന്നെ കാണാന് എത്തിയ മുഴുവന് പേരുടെയും ആവശ്യങ്ങള് നേരിട്ട് കേട്ട് പരിഹാരമുണ്ടാക്കിയ ശേഷം മാത്രമേ അദ്ദഹം മടങ്ങിയിരുന്നുള്ളൂ.
മുഖ്യമന്ത്രി ആയതോടെ ശനിയാഴ്ച രാത്രിയും ഞായറാഴ്ച രാവിലെയും വീട്ടിലെത്തുന്നവരുടെ തിരക്ക് റോഡിലേക്കും നീണ്ടു. ഇതോടെ വീട്ടിലെത്തുന്ന ആയിരങ്ങള്ക്കായി ശനിയാഴ്ച രാത്രികളില് തട്ടുകട വരെ ഇവിടെ തുടങ്ങിയതും ചരിത്രം.
