കോഴിക്കോട്: ഷിരൂരില് ദേശീയപാതയില് മണ്ണിടിച്ചില് അകപ്പെട്ടെന്ന് കരുതുന്ന മലയാളി ഡ്രൈവറെ കണ്ടെത്താന് കര്ണാടകാ സര്ക്കാരും ഇടപെടുന്നു. അര്ജുനെ കണ്ടെത്താന് അന്വേഷണത്തിന് കര്ണാടകാ മുഖ്യമന്ത്രി സിദ്ധരാമയ്യ നിര്ദേശം നല്കി. വിവരങ്ങള് എത്രയും പെട്ടെന്ന് നല്കാമെന്ന് പൊലീസ് മുഖ്യമന്ത്രിയെ അറിയിച്ചു. ഒടുവില് റിംഗ് ചെയ്ത നമ്പര് കര്ണാടക സൈബര് സെല്ലിന് കൈമാറിയിട്ടുണ്ട്.
അന്വേഷണത്തിന് കര്ണാടക ലോ ആന്ഡ് ഓര്ഡര് എഡിജിപി ആര് ഹിതേന്ദ്രയ്ക്കാണ് സിദ്ധരാമയ്യ നിര്ദേശം നല്കിയിരിക്കുന്നത്. രക്ഷാപ്രവര്ത്തനം വേഗത്തില് ആക്കാന് പൊലീസിനും അഗ്നിശമന സേനയ്ക്കും നിര്ദേശം നല്കിയിട്ടുണ്ടെന്നും സിദ്ധരാമയ്യയുടെ ഓഫീസ് അറിയിച്ചു.ജൂലൈ എട്ടിന് വീട്ടില് നിന്നും പോയ അര്ജുനെ പിന്നീട് കാണാതാകുകയായിരുന്നു.
തിങ്കളാഴ്ചയാണ് അവസാനമായി വിളിച്ച് സംസാരിച്ചത്. ചൊവ്വാഴ്ച മുതല് ഫോണില് കിട്ടുന്നില്ല. ഇന്ന് രാവിലെ എട്ടിന് വിളിച്ചപ്പോള് അര്ജുന്റെ ഫോണ് റിങ് ചെയ്തിരുന്നു. പിന്നീട് സ്വിച്ച് ഓഫായെന്നും കുടുംബാംഗങ്ങള് പറഞ്ഞു. ഇന്നലെ രാത്രി വരെ ലോറിയുടെ എഞ്ചിന് ഓണായിരുന്നുവെന്നാണ് ഭാരത് ബെന്സ് കമ്പനി വീട്ടുകാരെ അറിയിച്ചത്. എന്ഡിആര്എഫ്, പൊലീസ്, ഫയര്ഫോഴ്സ് എന്നിവയുടെ നേതൃത്വത്തിലാണ് ഷിരൂരില് രക്ഷാപ്രവര്ത്തനം നടത്തുന്നത്.
