ലണ്ടനിലെ ബക്കിംഗ്ഹാം കൊട്ടാരത്തിനും, സെന്റ് ജെയിംസ് കൊട്ടാരത്തിനും പുറത്ത് കുതിരപ്പുറത്തിരിക്കുന്ന കിംഗ്സ് ഗാര്ഡുകള് വിനോദ സഞ്ചാരികളുടെ മുഖ്യ ആകര്ഷണങ്ങളിലൊന്നാണ്. മിക്കവാറും ആളുകള് ഇവരുടെ അടുത്ത് നിന്നും ഫോട്ടോയും വീഡിയോയും എടുക്കാറുണ്ട്. എന്നാല്, കിംഗ്സ് ഗാര്ഡുകളുമായി നില്ക്കുന്ന കുതിരകളെ തൊടുന്നത് പൊതുവെ നിരോധിച്ചിട്ടുണ്ട്. പലയിടത്തും അത് എഴുതിവച്ചിട്ടുമുണ്ട്. എന്നാല്, മിക്കവരും ഇതൊന്നും പാലിക്കാറില്ല. അങ്ങനെ അടുത്ത് ചെല്ലുന്ന ആളുകളെ ഈ കുതിരകള് തൊഴിക്കാനും കടിക്കാനും ഒക്കെ ശ്രമിക്കുന്നതിന്റെ വീഡിയോകള് സോഷ്യല് മീഡിയയിലൂടെ പുറത്തുവരാറുണ്ട്. സമാനമായ ഒരു വീഡിയോയാണ് ഇതും.
ജൂലൈ 21 ഞായറാഴ്ചയായിരുന്നു സംഭവം. കുതിരയുടെ അടുത്ത് നിന്ന് ചിത്രം പകര്ത്തുകയായിരുന്നു സ്ത്രീ. എന്നാല്, കുതിര പെട്ടെന്ന് യുവതിയെ കടിക്കുകയായിരുന്നു. പിന്നാലെ, ഇവര് തലകറങ്ങി താഴേക്ക് ഇരിക്കുകയായിരുന്നു. ഇതിന്റെ ദൃശ്യങ്ങളാണ് ഇപ്പോള് സോഷ്യല് മീഡിയയില് പ്രചരിക്കുന്നത്. വീഡിയോയില്, നിരവധിപ്പേര് കുതിരയുടെ അടുത്ത് പോകുന്നതും ചിത്രങ്ങള് പകര്ത്തുന്നതും ഒക്കെ കാണാം. പലരും അതിനെ തൊടാനും ഒക്കെ ശ്രമിക്കുന്നുണ്ട്. പിന്നീടാണ് ഈ സ്ത്രീ വരുന്നത്.
മറ്റുള്ളവരെ പോലെ അവരും കുതിരയുടെ അടുത്ത് നിന്ന് ചിത്രം പകര്ത്താന് ശ്രമിക്കുന്നു. എന്നാല്, പെട്ടെന്ന് പ്രകോപിതനായ കുതിര സ്ത്രീയുടെ കയ്യില് കടിക്കുകയാണ്. അതോടെ ഭയന്ന സ്ത്രീ അവിടെ നിന്നും മാറി നില്ക്കുന്നത് കാണാം. ചുറ്റും ആള്ക്കാരും കൂടുന്നുണ്ട്. അവരുടെ കൂടെയുണ്ടായിരുന്ന പുരുഷന് അവരുടെ കൈ തുടച്ചു കൊടുക്കുന്നതും ഒക്കെ കാണുന്നുണ്ട്. എന്നാല്, അധികം വൈകാതെ സ്ത്രീ നിലത്തേക്കിരിക്കുന്നതുമാണ് വീഡിയോയില് കാണാന് സാധിക്കുന്നത്. വളരെ പെട്ടെന്നാണ് വീഡിയോ ശ്രദ്ധിക്കപ്പെട്ടത്. കുതിരയുടെ ഇത്രയടുത്ത് പോകാതിരിക്കുന്നതാണ് നല്ലത് എന്നാണ് പലരും അഭിപ്രായപ്പെട്ടത്.
