ലഖ്നൗ; ലോക്സഭാ തിരഞ്ഞെടുപ്പ് തിരിച്ചടിക്ക് പിന്നാലെ യു പി ബിജെപിയില് ഉണ്ടായ പൊട്ടിത്തെറികളില് മുഖ്യമന്ത്രി യോഗി ആദ്യത്യനാഥിന് പിന്തുണ നല്കി പാര്ട്ടി കേന്ദ്ര നേതൃത്വം. യോഗി ജനകീയ മന്ത്രിയാണെന്നാണ് നേതൃത്വത്തിന്റെ വിലയിരുത്തല്. യു പി ലോക്സഭാ തിരഞ്ഞെടുപ്പ് തിരിച്ചടിക്ക് പിന്നാലെ നേതൃമാറ്റ ആവശ്യം സംസ്ഥാനത്ത് ശക്തമായിരിക്കെയാണ് മുതിര്ന്ന നേതാക്കള് നിലപാട് വ്യക്തമാക്കിയിരിക്കുന്നത്.
യോഗി ആദിത്യനാഥിന് ഒപ്പം നില്ക്കാനാണ് ബിജെപി ദേശീയ നേതൃത്വത്തിന്റെ തീരുമാനം. യോഗിക്ക് സംസ്ഥാനത്തുള്ള ജനകീയത കൂടി കണക്കിലെടുത്താണ് നീക്കം. യുപിയിലെ എംപിമാരും എംഎല്എമാരുമായി കൂടിക്കാഴ്ച നടത്തി തയ്യാറാക്കിയ ലോക്സഭ തിരഞ്ഞെടുപ്പ് അവലോകന റിപ്പോര്ട്ടുമായാണ് യോഗി ദില്ലിയില് എത്തിയത്. ഇത് ദേശീയ നേതൃത്വത്തിന് കൈമാറി.
യോഗി 2027 ലെ നിയമസഭ തിരഞ്ഞെടുപ്പിന്റെ ഒരുക്കങ്ങളും ആരംഭിച്ചു.ദേശീയ നേതൃത്വം ഇക്കാര്യങ്ങള് ചര്ച്ച ചെയ്യും. കഴിഞ്ഞ ദിവസം പ്രധാനമന്ത്രി അടക്കമുള്ള നേതാക്കളുമായി കൂടിക്കാഴ്ച്ച നടത്തിയ യു പി ബിജെപി അധ്യക്ഷന് ഭൂപേന്ദ്ര സിംഗ് ചൗധരി മുഖ്യമന്ത്രിയെനീക്കാനായി ആവശ്യപ്പെട്ടിരുന്നു.
