തെന്നിന്ത്യയുടെ ലേഡി സൂപ്പര്സ്റ്റാറായിരുന്ന ശ്രീദേവിയുടെ മകളും ബോളിവുഡില് തിളങ്ങി നില്ക്കുന്ന താരവുമായ ജാഹ്നവി കപൂറും തെലുങ്കിന്റെ സ്വന്തം ജൂനിയര് എന്ടിആറും ഒരുമിച്ചെത്തുന്ന കൊരട്ടാല ശിവയുടെ ദേവര പാർട്ട് 1 വരുന്നു എന്നറിഞ്ഞപ്പോള് മുതല് ആരാധകര് ആവേശത്തിലാണ്. വലിയ ബജറ്റില് രണ്ടു ഭാഗങ്ങളായാണ് ദേവര ഒരുങ്ങുന്നത്. സിനിമയിലെ ആദ്യ ഗാനത്തിനും പോസ്റ്ററുകള്ക്കും ഗ്ലിംപ്സ് വീഡിയോയ്ക്കും ട്രെന്ഡിംഗായതാണ്.
ഇപ്പോഴിതാ സിനിമയിലെ രണ്ടാമത്തെ ഗാനമായ ‘കണ്ണിണതൻ കാമനോട്ടം’ സോഷ്യല് മീഡിയയെ ചൂടു പിടിപ്പിക്കുകയാണ്. റൊമാന്റിക് മെലഡിയായ ഈ ഗാനത്തില് ജാഹ്നവിയും ജൂനിയര് എന്ടിആറും തമ്മിലുള്ള ഹോട്ട് പ്രണയരംഗങ്ങളാണുള്ളത്. സാരിയണിഞ്ഞ ജാഹ്നവിയ്ക്കൊപ്പമുള്ള എന്ടിആറിന്റെ പ്രണയം സോഷ്യല് മീഡിയ ചൂടാക്കുകയാണ്. ഇവര് ഒന്നിച്ചുള്ള കെമിസ്ട്രിക്ക് നിറഞ്ഞ കൈയടിയാണ് ആരാധകര് നല്കിയിരിക്കുന്നത്. ‘‘ഒടുവിൽ എന്റെ വീട്ടിലേക്കുള്ള വരവ് പോലെ തോന്നുന്നു...’’ എന്ന ക്യാപ്ഷനും നല്കിയാണ് ജാഹ്നവി ഈ ഗാനത്തിന്റെ വീഡിയോ പങ്കുവച്ചിരിക്കുന്നത്. ജാൻവിയുടെ ആദ്യ തെലുങ്ക് ചിത്രം കൂടിയാണ് ദേവര.
ഇതിനോടകം തന്നെ ഗാനത്തിന് മില്ല്യണ് വ്യൂസാണ് കിട്ടിയിരിക്കുന്നത്.
അനിരുദ്ധ് സംഗീതം നല്കുന്ന ഗാനത്തിന്റെ മലയാളം വരികള് എഴുതിയിരിക്കുന്നത് മങ്കൊമ്ബ് ഗോപാലകൃഷ്ണനാണ്. ശില്പ റാവുവാണ് ഈ ഗാനം ആലപിച്ചിരിക്കുന്നത്.സെപ്റ്റംബർ 27-നാണ് ചിത്രം തീയറ്ററുകളിലെത്തുക. കൊരട്ടാല ശിവയും എൻ.ടി.ആറും ജനതാ ഗാരേജിന് ശേഷം ഒരുമിക്കുന്ന ചിത്രത്തില് ബോളിവുഡ് താരമായ സെയ്ഫ് അലി ഖാനും പ്രധാന വേഷത്തില് എത്തുന്നുണ്ട്. യുവസുധ ആർട്ട്സും എൻടിആർ ആർട്സും ചേർന്ന് നിർമിക്കുന്ന ചിത്രം നന്ദമൂരി കല്യാണ് റാം ആണ് അവതരിപ്പിക്കുന്നത്. പ്രകാശ് രാജ്, ശ്രീകാന്ത് മേക്ക, ഷൈൻ ടോം ചാക്കോ, നരൈൻ തുടങ്ങി ഒട്ടനവധി അഭിനേതാക്കള് ചിത്രത്തിന്റെ ഭാഗമാകുന്നുണ്ട്. ബിഗ് ബജറ്റില് ഒരുങ്ങുന്ന ചിത്രം തെലുങ്ക്, തമിഴ്, കന്നഡ, ഹിന്ദി, മലയാളം ഭാഷകളിലായി പുറത്തിറങ്ങുമെന്ന് നിർമ്മാതാക്കള് അറിയിച്ചിരുന്നു.
