അടുത്തിടെയായി മലയാളത്തിലും തമിഴിലുമായി നിരവധി പ്രേക്ഷകപ്രീതിയാർജ്ജിച്ച ചിത്രങ്ങളാണ് വീണ്ടും പ്രദർശനത്തിനു എത്തുന്നുണ്ട്. ഒരു കാലത്ത് തള്ളി പറഞ്ഞ സിനിമകൾ വർഷങ്ങൾക്ക് ശേഷം വീണ്ടും മുന്നിൽ എത്തുമ്പോൾ നിറഞ്ഞ കൈയടിയോടെയാണ് പ്രേക്ഷകർ സ്വീകരിക്കുന്നത്. കഴിഞ്ഞ ദിവസം റിലീസ് ചെയ്ത ദേവദൂതൻ എന്ന മോഹൻലാൽ സിനിമയ്ക്ക് വലിയൊരു സ്വീകാര്യതയാണ് കിട്ടിയത്.
അതിനു പിന്നാലെ മലയാള സിനിമയിലെ എക്കാലത്തെയും മികച്ച ക്ലാസിക് ചിത്രങ്ങളില് ഒന്നായ 'മണിച്ചിത്രത്താഴ്' വീണ്ടും തിയേറ്ററുകളില് റിലീസിന് ഒരുങ്ങുകയാണ്. ഓഗസ്റ്റ് 17-നാണ് ചിത്രം തീയറ്ററുകളില് എത്തുന്നത്.
ഇപ്പോഴിതാ സിനിമയുടെ പുതിയ ക്യാരക്ടർ പോസ്റ്റർ പങ്കിട്ട് സന്തോഷം പങ്കിടുകയാണ് കുതിരവട്ടം പപ്പുവിന്റെ മകനും അഭിനേതാവുമായ ബിനു പപ്പു. കുതിരവട്ടം പപ്പു അവതരിപ്പിച്ച കാട്ടുപറമ്പന്റെ പോസ്റ്ററാണ് ബിനു പപ്പു പങ്കിട്ടത്.
പോസ്റ്ററിനൊപ്പം പങ്കിട്ട ഹൃദ്യമായ കുറിപ്പും വൈറല് ആകുകയാണ്. "അച്ഛൻ മരിച്ച് 24 വർഷങ്ങൾക്കു ശേഷം അച്ഛൻ അഭിനയിച്ച ഒരു സിനിമ വീണ്ടും റിലീസ് ചെയ്യുമ്പോൾ അതിന്റെ ക്യാരക്ടർ പോസ്റ്റർ ഷെയർ ചെയ്യാൻ പറ്റുന്നു എന്നത് എന്നെ സംബന്ധിച്ച് ഒരുപാട് അഭിമാനവും, സന്തോഷവും നൽകുന്ന കാര്യമാണ്...
സിനിമയുടെ സൗന്ദര്യവും, ശക്തിയും അതിലുപരി മാന്ത്രികതയും ഇതാണ്, കാലങ്ങൾക്ക് മുന്നേ നമ്മളെ ചിരിപ്പിക്കുകയും, ചിന്തിപ്പിക്കുകയും, കണ്ണ് നിറയിക്കുകയും ചെയ്ത് മറഞ്ഞു പോയ അച്ഛനെപ്പോലെ തന്നെയുള്ള മറ്റു കലാകാരന്മാർ എല്ലാവരും ഓരോ ദിവസവും നമുക്ക് മുന്നിൽ വന്നു കൊണ്ടേയിരിക്കും...
കലാകാരൻമാർക്ക് മരണമില്ല... ഓരോ ദിവസവും ഓരോ കഥാപാത്രങ്ങളായി, ചിരിപ്പിച്ചും, ചിന്തിപ്പിച്ചും സിനിമ അവരെ ഓർമപ്പെടുത്തി കൊണ്ടേയിരിക്കും..." എന്നാണ് ബിനു പപ്പു കുറിച്ചത്.
