ന്യൂഡല്ഹി: പാരീസ് ഒളിമ്പിക്സില് മെഡല്നേട്ടം നടത്തിയ ഇന്ത്യന് ഹോക്കിയുടെ ഗോള്കീപ്പര് പി.ആര്. ശ്രീജേഷ് അടക്കമുള്ള ഒളിമ്പിക് താരങ്ങള് ഇന്ത്യയില് മടങ്ങിയെത്തി. ന്യൂഡല്ഹി വിമാനത്താവളത്തില് ശ്രീജേഷ് അടക്കമുള്ള താരങ്ങള്ക്ക് വന് സ്വീകരണമാണ് നല്കിയത്. നിരവധി സംസ്ഥാനങ്ങളില് നിന്നുള്ളവര് അടക്കം നൂറുകണക്കിന് പേരാണ് ഇന്ത്യന് താരങ്ങളെ സ്വീകരിക്കാനെത്തിയത്.
ശ്രീജേഷ് അടക്കം ഹോക്കിടീമിലെ അഞ്ചു താരങ്ങളാണ് ഇന്ന് ജന്മനാട്ടില് തിരിച്ചെത്തിയത്. പാരീസ് ഒളിമ്പിക്സില് ഇന്ത്യന് ഹോക്കി ടീം രണ്ടാം വെങ്കലമെഡലാണ് നേടിയത്. നാലു വര്ഷം മുമ്പ് ടോക്കിയോയില് വെങ്കലം നേടിയ ടീം ഇത്തവണയും നേട്ടം ആവര്ത്തിച്ചു. നാളെയാണ് ടീമിന് ഔദ്യോഗിക സ്വീകരണം നല്കുന്നത്്. ഈ ഒളിമ്പിക്സോടെ ശ്രീജേഷ് ഇന്ത്യന് ടീമില് നിന്നും വിരമിക്കല് പ്രഖ്യാപിച്ചിരുന്നു.
ഇത്തവണ ഇന്ത്യയ്ക്ക് ആറ് മെഡല് നേടാനായിട്ടുണ്ടെങ്കിലും സ്വര്ണ്ണം നേടാനായിട്ടില്ല. കഴിഞ്ഞ ടോക്കിയോ ഒളിമ്പിക്സിനെ അപേക്ഷിച്ച് ഒരു മെഡല് കുറവാണ് താനും. രണ്ടു മെഡലുകളില് പങ്കാളിയായ ഷൂട്ടിംഗ് താരം മനുഭാക്കര് രണ്ടു വെങ്കലം നേടിയപ്പോള് തുടര്ച്ചയായി രണ്ടാം ഒളിമ്പിക്സിലും മെഡല് നേടിയ ഹോക്കിയും ജാവലിന്താരം നീരജ് ചോപ്രയും രണ്ടാം തവണയും മെഡലിന് അര്ഹമായി. ഹോക്കി ടീം ടോക്കിയോയ്ക്ക് പിന്നാലെ പാരീസിലും വെങ്കലമണിഞ്ഞപ്പോള് ടോക്കിയോയില് സ്വര്ണ്ണമണിഞ്ഞ നീരജ് പാരീസില് വെള്ളിയില് തൃപ്തിപ്പെട്ടു.
