വെള്ളിത്തിരയിലെ താരങ്ങളെ കാണാനും അവരോട് സംസാരിക്കാനും പറ്റുമെങ്കിലൊരു സെല്ഫി എടുക്കാനും ആരാധകര്ക്ക് എന്നും ആവേശമാണ്. പ്രിയതാരങ്ങളെ കണ്ടുമുട്ടുന്ന പല ആരാധകരുടെയും അപൂര്വ്വമായ നിമിഷങ്ങള് സോഷ്യല് മീഡിയയിലൂടെ ആഘോഷമായി മാറാറുണ്ട്.
ഇപ്പോഴിതാ മലയാളികളുടെ സ്വകാര്യ അഹങ്കാരമായ മമ്മൂട്ടിയും ഒരു കുട്ടി ആരാധികയും തമ്മിലുള്ള സുന്ദര നിമിഷം ആഘോഷിക്കുകയാണ് സോഷ്യല് മീഡിയ. താരസംഘടനയായ അമ്മ സംഘടിപ്പിച്ച നൃത്ത ശില്പശാലയുടെ സമാപന സമ്മേളന വേദിയില് വച്ചാണ് സംഭവം. അവിടെ വച്ചാണ് ഒരു കുട്ടി ആരാധികയുടെ ആഗ്രഹം മമ്മൂട്ടി സാധിച്ചു കൊടുത്തത്. ‘‘ഇതൊരു നൃത്ത പരിശീലന ക്ലാസ് ആയിരുന്നു എന്നതുകൊണ്ടുതന്നെ എനിക്ക് വളരെ താല്പര്യവുമുണ്ട്...’’ എന്ന് ചിരിച്ചു കൊണ്ട് മമ്മൂട്ടി സംസാരിച്ചു. ശില്പശാലയില് പങ്കെടുത്തവര് പിന്നീട് സദസിനെ അഭിസംബോധന ചെയ്ത് സംസാരിച്ചപ്പോഴാണ് മമ്മൂട്ടിയുടെ കടുത്ത ആരാധികയായ പെണ്കുട്ടി മൈക്കിനടുത്തേക്ക് എത്തിയത്. ‘‘എല്ലാരെയും കണ്ടതില് സന്തോഷം. ഇനിയും വരണമെന്നുണ്ട്. ഇനിയും ആള്ക്കാരെ കാണണമെന്നുണ്ട്. ആ ചേച്ചി ഫാനായതു പോലെ എനിക്കും ആകണമെന്നുണ്ട്. മറ്റ് ചിലര് പറഞ്ഞതുപോലെ മമ്മൂട്ടിക്ക് കൈ കൊടുക്കുകയല്ല എനിക്ക് വേണ്ടത്. കെട്ടിപ്പിടിക്കണം എനിക്ക്...’’ കുട്ടി പറഞ്ഞു. ഇതുകേട്ട ഉടന് മമ്മൂട്ടി കുട്ടിയെ അരികിലേക്ക് വിളിക്കുകയായിരുന്നു. നിറഞ്ഞ ചിരിയോടെയും സന്തോഷത്തോടെയും മമ്മൂട്ടിയെ കുട്ടി ആരാധിക കെട്ടിപ്പിടിക്കുന്നുമുണ്ട്.
"കയ്യല്ല.. എനിക്ക് കെട്ടിപ്പിടിക്കണം.."
നിഷ്ക്കളങ്കത.. സ്നേഹം.. ❤️🙏🏻#Mammootty 👌👌👌 pic.twitter.com/ZmXQgGAz45— Nayanthara ❤️❤️❤️ (@Nayanthara369) August 12, 2024
അമ്മ അസോസിയേഷന് പുറത്തു വിട്ട ഈ ചടങ്ങിന്റെ വീഡിയോയില് നിന്ന് ഈ ഭാഗം മാത്രം അടര്ത്തിയെടുത്ത് സോഷ്യല് മീഡിയയില് കാര്യമായി പ്രചരിക്കുന്നുണ്ട്. ആരാധകര് ഏറെ ആഹ്ലാദത്തോടെയാണ് ഈ വീഡിയോ പങ്കുവെക്കുന്നത്. രണ്ട് ദിവസമായി അമ്മ കോംപ്ലക്സ് ഹാളില് സംഘടിപ്പിച്ച നൃത്ത ശില്പശാലയുടെ സമാപന ചടങ്ങില് അമ്മ അംഗങ്ങളും നടനും സംവിധായകനുമായ ബേസില് ജോസഫും എത്തിയിരുന്നു. ക്യാമ്പില് മമ്മൂട്ടിയും ബേസിലും ചേർന്ന് സർട്ടിഫിക്കറ്റുകള് സമ്മാനിച്ചു.
ചലച്ചിത്ര താരം സരയു കോര്ഡിനേറ്റ് ചെയ്ത നൃത്ത ശില്പശാലയില് രചന നാരായണൻകുട്ടിയുടെ നേതൃത്വത്തിലായിരുന്നു ക്ലാസ്. ആദ്യമായി അമ്മ സംഘടിപ്പിച്ച വർക്ക്ഷോപ്പില് ലഭിച്ച അപേക്ഷകരില് നിന്നും തെരഞ്ഞെടുത്ത 31 പേർ പങ്കെടുത്തു. പന്ത്രണ്ട് വയസ് മുതല് ഉള്ളവർ പങ്കെടുത്ത ഈ ക്യാമ്പില് ലണ്ടൻ, ബെംഗളൂരു, മുംബൈ എന്നിവിടങ്ങളില് നിന്നുള്ളവരുണ്ടായിരുന്നു. കലാ സിനിമാ സ്നേഹികളായ പൊതു ജനങ്ങളെ ചേർത്തു നിർത്തി താര സംഘടനയായ അമ്മ സംഘടിപ്പിച്ച ഈ നൃത്ത ശില്പശാല അമ്മ പ്രസിഡന്റ് മോഹൻലാല് ഉദ്ഘാടനം ചെയ്തിരുന്നു.
