കണ്ണൂര്; നിപ രോഗം സംശയിച്ച് കണ്ണൂരില് ചികിത്സയില് കഴിഞ്ഞിരുന്ന രണ്ട് പേര്ക്കും നിപയില്ലെന്ന് പരിശോധനഫലം.രണ്ടുപേരും കണ്ണൂര് പരിയാരം മെഡിക്കല് കോളജിലാണ് ചികിത്സയില് കഴിഞ്ഞിരുന്നത്. കോഴിക്കോട് മെഡിക്കല് കോളജില് നടന്ന പരിശോധനയില് രണ്ടുപേരുടെയും സാമ്പളുകള് നെഗറ്റീവ് ആയതോടെ ആശങ്കകള് നീങ്ങി.
മാലൂര് പഞ്ചായത്തിലെ പിതാവിനെയും മകനെയുമാണ് കണ്ണൂര് ഗവ. മെഡിക്കല് കോളജ് ആശുപത്രിയില് വെള്ളിയാഴ്ച പ്രവേശിപ്പിച്ചത്. പനിയും ഛര്ദിയും അനുഭവപ്പെട്ടതിനെ തുടര്ന്ന് മട്ടന്നൂരിലെ സ്വകാര്യ ആശുപത്രിയില് ചികിത്സ തേടിയപ്പോഴാണ് നിപ ലക്ഷണങ്ങള് കണ്ടെത്തിയത്. തുടര്ന്ന് മെഡിക്കല് കോളജ് ആശുപത്രിയില് പ്രവേശിപ്പിക്കുകയായിരുന്നു.
മെഡിക്കല് കോളജ് ആശുപത്രി ബ്ലോക്കില് അഞ്ചാം നിലയില് പ്രത്യേകം തയാറാക്കിയ ഐസൊലേഷന് വാര്ഡിലാണ് ഇവര് കഴിയുന്നത്. ഇവിടെ പ്രത്യേക മെഡിക്കല് സംഘമാണ് രോഗികളെ പരിചരിക്കുന്നത്.
