ഇന്ത്യൻ സംഗീത രംഗത്തെ നിത്യവിസ്മയങ്ങളായി പ്രേക്ഷക മനസിലുള്ള ഗായികമാരാണ് ലതാ മങ്കേഷ്കർ-ആശാ ഭോസ്ലേ സഹോദരിമാർ. ഏഴു പതിറ്റാണ്ടുകളായി ഇന്ത്യൻ സംഗീത ലോകത്തിനെ വിസ്മയിപ്പിക്കുന്ന നിത്യഹരിത ഗായിക ആശാ ഭോസ്ലേ എന്ന സംഗീത പ്രതിഭയ്ക്ക് ഇന്ന് 91-ാം പിറന്നാളാണ്. സംഗീത സരണിയില് തന്റേതായൊരു പാത വെട്ടിത്തെളിച്ച ആശ 20 ഭാഷകളിലായി 11,000 പാട്ടുകള് പാടി, ഗിന്നസ് വേള്ഡ് റെക്കോർഡിലും ഇടം പിടിച്ച ഗായികയാണ് ആശാ ഭോസ്ലേ.
ഇപ്പോഴിതാ പിറന്നാള് ദിനത്തില് മുത്തശ്ശിയ്ക്ക് ആശംസകള് നേരുകയാണ് കൊച്ചുമകള് സനായി ഭോസ്ലെ. "91 ലും മികച്ചത് തന്നെ... ബർത്തഡേ ഗേൾ..." എന്ന ക്യാപ്ഷൻ നൽകിയാണ് മുത്തശ്ശിയ്ക്കൊപ്പമുള്ള ചിത്രം സനായി പങ്കുവച്ചിരിക്കുന്നത്.
ഇതിഹാസ ഗായിക ആശ ഭോസ്ലെയുടെ മകനായ ആനന്ദ് ഭോസ്ലെയുടെയും അനുജയുടെയും മകളാണ് ഗായിക കൂടിയായ സനായി.
ആശ ഭോസ്ലെയ്ക്ക് ഒപ്പം ചില പൊതുവേദികളില് പ്രത്യക്ഷപ്പെട്ടതോടെയാണ് സനായി ശ്രദ്ധ നേടിയത്. സംഗീതരംഗത്ത് സജീവമായ സനായി, ആശ ഭോസ്ലെക്കൊപ്പം പല പരിപാടികളിലും പങ്കെടുത്തിട്ടുണ്ട്. സിനിമയിലും അരങ്ങേറ്റം കുറിക്കാൻ ഒരുങ്ങുകയാണ് സനായി ഭോസ്ലെ. സന്ദീപ് സിംഗ് ഒരുക്കുന്ന ദി പ്രൈഡ് ഓഫ് ഭാരത് - ഛത്രപതി ശിവാജി മഹാരാജ് എന്ന ചിത്രത്തില് ഛത്രപതി ശിവാജി മഹാരാജിന്റെ ഭാര്യ റാണി സായ് ഭോൻസാലെയുടെ വേഷമാണ് സനായി അവതരിപ്പിക്കുക.
