കുടുംബപ്രേക്ഷകര്ക്ക് പ്രിയപ്പെട്ട കുങ്കുമപ്പൂവ് എന്ന സീരിയിലൂടെ തുടങ്ങി പിന്നീട് ബിഗ് സ്ക്രീനിലൂടെ ഒരുപാട് പ്രേക്ഷകരെ നേടിയ അഭിനേത്രിയും നര്ത്തകിയുമാണ് ആശ ശരത്. വി എസ് കൃഷ്ണൻകുട്ടി നായരുടെയും കലാമണ്ഡലം സുമതിയുടെയും മകളായി പെരുംബാവൂരിൽ ജനിച്ച താരം 2014-ൽ മോഹൻലാൽ നായകനായ ദൃശ്യം എന്ന ചിത്രത്തിലൂടെയാണ് ഏറെ ശ്രദ്ധിക്കപ്പെട്ടത്. ചിത്രത്തിലെ അഭിനയത്തിന് മികച്ച സഹനടിക്കുള്ള ഫിലിം ഫെയർ അവാർഡ് ലഭിച്ച താരത്തിന് തുടർന്ന് നിരവധി സിനിമകളില് മികച്ച കഥാപാത്രങ്ങള് കിട്ടി.
കരിയര് പോലെ തന്നെ സ്വകാര്യ ജീവിതത്തിനും തുല്യ പ്രാധാന്യമാണ് ആശ ശരത് എപ്പോഴും നല്കാറുള്ളത്. ഭര്ത്താവ് ശരത്തിനും മക്കളായ ഉത്തര, കീർത്തന എന്നിവര്ക്കൊപ്പവും എപ്പോഴും ആശയുണ്ട്. തന്റെ ജീവിതത്തില് ഏറ്റവുമധികം പിന്തുണ നല്കിയിട്ടുള്ളത് ഭര്ത്താവ് ശരത്താണെന്ന് ആശ പലപ്പോഴും പറഞ്ഞിട്ടുണ്ട്.
ഇപ്പോഴിതാ തങ്ങളുടെ മുപ്പതാം വിവാഹവാര്ഷികത്തില് ഭര്ത്താവിനുള്ള ആശംസകളും എല്ലാവര്ക്കും നന്ദിയും കുറിക്കുകയാണ് ആശ ശരത്.
‘‘മനോഹരമായ വാർഷിക ആശംസകൾക്ക് എല്ലാവർക്കും നന്ദി... ഭർത്താവുമൊത്തുള്ള എന്റെ അത്ഭുതകരമായ 30 വർഷം... സ്നേഹത്തിന്റെയും ചിരിയുടെയും എണ്ണമറ്റ ഓർമ്മകളുടെയും ജീവിതകാലം പോലെ തോന്നുന്നു. എല്ലാ ഉയർച്ച താഴ്ചകളിലൂടെയും, ഞങ്ങൾ പരസ്പരം എപ്പോഴും ഉണ്ടായിരുന്നു - കൂടാതെ എല്ലാ സീസണിലും ഞങ്ങളോടൊപ്പം നിന്ന പ്രിയ സുഹൃത്തുക്കളുടെ പിന്തുണയ്ക്ക് ഞങ്ങൾ വളരെ നന്ദിയുള്ളവരാണ്. ഇനിയും സ്നേഹവും സൗഹൃദവും ഒക്കെയുള്ള ഒരുപാട് വർഷങ്ങൾ മുന്നിലുണ്ട്...’’ എന്ന ക്യാപ്ഷന് നല്കിയാണ് ഭര്ത്താവിനൊപ്പമുള്ള പ്രണയാതുരമായ ചിത്രം ആശ ശരത് പങ്കിട്ടിരിക്കുന്നത്.
