തിരുവനന്തപുരം: സാമൂഹികമാധ്യമമായ ഫെയ്സ്ബുക്കില് 10 ലക്ഷം ഫോളോവേഴ്സിനെ സ്വന്തമാക്കി കേരള ബി.ജെ.പി. സംസ്ഥാനത്തെ രാഷ്ട്രീയ പാര്ട്ടികളില് ഇൗ നേട്ടം കൈവരിക്കുന്ന ആദ്യ പാര്ട്ടിയാണ് ബി.ജെ.പി.
സി.പി.എമ്മിന് 7.71 ലക്ഷം, കോണ്ഗ്രസ് 3.52 ലക്ഷം ഫോളോവേഴ്സ് ഉള്ളപ്പോഴാണ് 'ബി.ജെ.പി കേരളം' എന്ന ഫെയ്സ്ബുക്ക് പേജ് ഇൗ നേട്ടം കൈവരിച്ചത്. കേരളത്തിലെ പാര്ട്ടിയുടെ സമൂഹമാധ്യമ ഇടപെടലിനെ നേരത്തേ പ്രധാനമന്ത്രി നരേന്ദ്ര മോദിയും പാര്ട്ടി അധ്യക്ഷന് ജെ.പി. നഡ്ഡയും ഉള്പ്പെടെ അഭിനന്ദിച്ചിരുന്നു.
ആശയപ്രചാരണത്തിനായി സമൂഹമാധ്യമങ്ങളെ ഏറ്റവും മികച്ച രീതിയില് ഉപയോഗപ്പെടുത്തുന്ന പാര്ട്ടിയാണ് ബി.ജെ.പിയെന്ന് പാര്ട്ടിയുടെ ഐടി, സോഷ്യല് മീഡിയ സംസ്ഥാന കണ്വീനര് എസ്. ജയശങ്കര് പറഞ്ഞു.
'സാമൂഹിക മാധ്യമങ്ങളിലെ ട്രെന്റുകള് മനസിലാക്കിയും എ.ഐ പോലുള്ള പുതിയ മാറ്റങ്ങളെ ഉള്ക്കൊണ്ടുമാണ് പ്രവര്ത്തിക്കുന്നത്. 14 ജില്ലകളിലും ശക്തമായി പ്രവര്ത്തിക്കുന്ന സമൂഹമാധ്യമ സംവിധാനം ബി.ജെ.പിക്കുണ്ട്.'- ജയശങ്കര് പറഞ്ഞു.
