ആരോഗ്യ സംബന്ധമായ പ്രശ്നങ്ങളാല് ദീര്ഘനാളുകള് കോമയിലേക്ക് വഴുതി വീണുപോകുന്ന നിരവധി ആളുകളുണ്ട്. എന്നാല് കോമയില് നിന്ന് ഉണര്ന്നുകഴിയുമ്പോള് പല കാര്യങ്ങളും ഇവര്ക്ക് ഓര്മയില്ലെന്നുവരും. എന്നാല് ഈ സര്ജന് കോമയില് നിന്നുണര്ന്നപ്പോള് വളരെ വിചിത്രമായ ഒരു കാര്യമാണ് പറഞ്ഞത്. താന് സ്വര്ഗം സന്ദര്ശിച്ച് തിരികെ വന്നിരിക്കുന്നു എന്നാണ് യുഎസിലെ വിര്ജീനിയയില് നിന്നുള്ള ബ്രെയിന് സര്ജനായ ഡോ. എബെന് അലക്സാണ്ടര് പറഞ്ഞത്. അത് മാത്രമല്ല സ്വര്ഗത്തില് പൊരിച്ച കോഴിയുടെ മണമുണ്ടായിരുന്നു എന്നും ഡോ. എബെന് അവകാശപ്പെട്ടു.
കോളി അണുബാധ മൂലമുണ്ടായ ഗുരുതരമായ ആരോഗ്യപ്രശ്നത്തെ തുടര്ന്നാണ് ഡോ. അലക്സാണ്ടര് ഗുരുതരാവസ്ഥയിലായത്. ഇത് തലച്ചോറിന് കാര്യമായ തകരാറുണ്ടാക്കി. ഒരാഴ്ചയോളം അദ്ദേഹം കോമയില് തുടര്ന്നു. എന്നാല് ഒരാഴ്ച കഴിഞ്ഞ ഉണര്ന്നപ്പോഴാണ് താന് സ്വര്ഗം സന്ദര്ശിച്ചുവെന്നും അവിടെ പൊരിച്ച കോഴിയുടെ മണമായിരുന്നു എന്നും ഡോക്ടര് പറയുന്നത്. മാത്രമല്ല അവിടെ നിറയെ മേഘങ്ങളുണ്ടായിരുന്നു എന്നും ആ മേഘങ്ങള് താന് കണ്ടു എന്നും ഡോക്ടര് പറയുന്നുണ്ട്.
തെളിഞ്ഞുകിടക്കുന്ന ഒരു ജലാശയത്തിലേക്ക് ഒരു വെള്ളച്ചാട്ടം വന്നുവീഴുന്നതും താന് കണ്ടു. അവിടെയെല്ലാം നിറയെ പച്ചപ്പുണ്ടായിരുന്നു. ആകാശത്ത് നിന്നും പാട്ടുകള് കേള്ക്കുന്നുണ്ടായിരുന്നു. താന് അപ്പോള് ഒരു പരവതാനിയില് പറക്കുകയായിരുന്നു എന്നും എല്ലാം പരസ്പരം ബന്ധപ്പെട്ട് കിടക്കുന്നതായിട്ടാണ് തനിക്ക് തോന്നുന്നത് എന്നും ഡോക്ടര് പറയുന്നു. ഒപ്പം അവിടെ സുന്ദരിയായ ഒരു സ്ത്രീയുണ്ടായിരുന്നു അവരാണ് തനിക്ക് അവിടെ വഴികാട്ടിയായത് എന്നും ഡോക്ടര് പറഞ്ഞു.
കോമയില് നിന്നും ഉണര്ന്ന് എട്ട് ആഴ്ചകള്ക്ക് ശേഷമാണ് അദ്ദേഹം അസുഖത്തില് നിന്നും പൂര്ണമായി മുക്തനായത്. അവിടെ നിന്നും നാല് മാസത്തിന് ശേഷം അദ്ദേഹത്തിന്റെ ഒരു ബന്ധു വിളിച്ച് ഡോക്ടര്ക്ക് അദ്ദേഹത്തിന് അറിയാത്ത ഒരു സഹോദരിയുണ്ട് എന്നും കുറച്ച് വര്ഷങ്ങള്ക്ക് മുമ്പ് മരിച്ചുപോയി എന്നും പറയുന്നത്. താന് സ്വര്ഗത്തില് വച്ചു കണ്ട സ്ത്രീ മരിച്ചുപോയ തന്റെ സഹോദരിയാണ് എന്നാണ് ഡോക്ടര് പറയുന്നത്.
