പ്രേമം എന്ന ഒറ്റ സിനിമയിലെ മലര് എന്ന കഥാപാത്രത്തിലൂടെ പ്രേക്ഷകമനസ്സ് കീഴടക്കിയ താരമാണ് സായ് പല്ലവി. മലയാളത്തില് മാത്രല്ല തെന്നിന്ത്യയിലെ മറ്റ് ഭാഷകളിലും പ്രേക്ഷകര്ക്ക് ഏറെ പ്രിയങ്കരിയായ താരമാണ് സായ് പല്ലവി. താരത്തിന്റെ അഭിനയമികവിനൊപ്പം തന്നെ നൃത്തച്ചുവടുകളും ആരാധകരുടെ ഹൃദയം കീഴടക്കുന്നതാണ്. സാധാരണയായി സായ് പല്ലവിയെ മേക്കപ്പിട്ട് കാണുന്നത് വെള്ളിത്തിരയില് മാത്രമാണ്. സ്വാഭാവിക പ്രകൃതത്തിലാണ് പൊതു വേദിയിലും സിനിമാ ചടങ്ങിലും ഒക്കെ താരമെത്തുക.
ഇപ്പോഴിതാ മുംബൈ വിമാനത്താവളത്തില് എത്തിയ നടിയുടെ വീഡിയോയാണ് സോഷ്യല് മീഡിയ കീഴടക്കുന്നത്. ഒരു മേക്കപ്പുമില്ലാതെ സാധാരണ ഒരു ചുരിദാറും ധരിച്ച് നിറഞ്ഞ ചിരിയോടെ മാധ്യമങ്ങള്ക്ക് മുമ്പില് ചിത്രങ്ങള്ക്ക് വേണ്ടി പോസ് ചെയ്യുകയാണ് താരം. യാതൊരു താരജാഡയുമില്ലാത്ത താരത്തിന്റെ ചിത്രങ്ങള് നിമിഷനേരം കൊണ്ട് വൈറലായി.
സായ് പല്ലവി നായികയായി എത്തി തിളങ്ങാനിരിക്കുന്ന ചിത്രമാണ് ചന്ദൂ മൊണ്ടേടി സംവിധാനം ചെയ്യുന്ന തണ്ടേല്. ഒരു യഥാര്ഥ സംഭവത്തിന്റെ കഥയാണ് ഈ സിനിമയുടെ പ്രമേയം എന്നാണ് റിപ്പോര്ട്ട്. ശ്രീകാകുളത്തില് നിന്നുള്ള മത്സ്യത്തൊഴിലാളികളുടെ യഥാര്ഥ കഥയാണ് തണ്ടലിന്റേത്. സ്വന്തം അവകാശങ്ങള്ക്കായി പോരാടുന്ന യുവതിയായ കഥാപാത്രമായിട്ടാണ് സായ് പല്ലവി തണ്ടേലില് എത്തുന്നത്. സിനിമയില് നായകനായി എത്തുന്നത് നാഗചൈതന്യയാണ്.
ശിവകാര്ത്തികേയൻ നായകനായി വേഷമിടുന്ന പുതിയ തമിഴ് ചിത്രത്തിലും സായ് പല്ലവി നായികയാകുന്നുണ്ട്. അമരൻ എന്ന പുതിയ ചിത്രത്തില് ശിവകാര്ത്തികേയൻ വേറിട്ട ലുക്കിലാണ് എത്തുന്നത് എന്നും റിപ്പോര്ട്ടുണ്ട്. കമല്ഹാസന്റെ രാജ് കമല് നിര്മിക്കുന്ന ചിത്രമായ ശിവകാര്ത്തികേയന്റെ അമരന്റെ പ്രധാനപ്പെട്ട ഒരു ലൊക്കേഷൻ കശ്മീരാണ്.
