മലയാള സിനിമാ സീരിയല് പ്രേക്ഷകര്ക്ക് സുപരിചിതയായ താരമാണ് സ്വാസിക വിജയ്. സീരിയലുകളിലൂടെയാണ് സ്വാസിക പ്രേക്ഷകര്ക്ക് പ്രിയങ്കരിയായതെങ്കിലും മികച്ച കഥാപാത്രങ്ങളിലൂടെ ബിഗ് സ്ക്രീനിലും തന്റേതായ ഒരു സ്ഥാനം ഉറപ്പിക്കാന് സ്വാസികയ്ക്ക് കഴിഞ്ഞു. നടനും മോഡലുമായ പ്രേം ജേക്കബിനൊയാണ് സ്വാസിക വിവാഹം ചെയ്തത്. ഒരുമിച്ച് സീരിയലില് അഭിനയിച്ചതിന് ശേഷമാണ് സീരിയല് താരങ്ങളായ പ്രേം ജേക്കബും സ്വാസിക വിജയിയും പ്രണയത്തിലായത്. വളരെ ആഘോഷപൂര്വ്വം നടത്തിയ പ്രീ വെഡ്ഡിംഗ് ചടങ്ങുകളും ബീച്ച് വെഡ്ഡിംഗുമൊക്കെയായിരുന്നു സ്വാസികയുടേത്. സോഷ്യല് മീഡയയില് സജീവമായ താരം തന്റെ യൂട്യൂബ് ചാനലിലൂടെയും എല്ലാ വിശേഷങ്ങളും ആരാധകരുമായി പങ്കിടാറുണ്ട്.
ഇപ്പോഴിതാ തങ്ങളുടെ എക്സ് പ്രണയബന്ധങ്ങളെക്കുറിച്ച് വിവാഹത്തിനു മുമ്പ് പരസ്പരം സംസാരിച്ചിട്ടുണ്ടെന്ന് തുറന്നു പറയുകയാണ് സ്വാസികയും പ്രേമും. സുഹൃത്തുക്കളായ സമയം മുതല് തങ്ങളിത് സംസാരിച്ചു തുടങ്ങിയിട്ടുണ്ടെന്നാണ് സ്വാസിക പറയുന്നത്. ‘‘സുഹൃത്തുക്കളായ സമയം മുതല് എല്ലാക്കാര്യങ്ങളും സംസാരിക്കുമായിരുന്നു. എന്നോട് ആര് 10 മിനിറ്റ് സംസാരിച്ചാലും ഞാന് എല്ലാക്കാര്യങ്ങളും തുറന്നു പറയും. ഞാന് അല്പ്പം ഓപ്പണാണ്. എന്റെ എക്സിന്റെ കഥകളൊക്കെ എല്ലാവര്ക്കുമറിയാം. അതുപോലെ തന്നെ ഒരു പുതിയ കൂട്ടുകാരനെ കിട്ടിയപ്പോള് പരാതികളും പരിഭവങ്ങളുമൊക്കെ തുറന്നു പറഞ്ഞു. എക്സ് റിലേഷന്ഷിപ്പിന്റെ കാര്യം എല്ലാം രണ്ടുപേരും പറഞ്ഞിട്ടുണ്ട്. അന്ന് കുഞ്ചുവുമായി വിവാഹം കഴിക്കുമോ എന്നൊന്നും അറിയില്ലല്ലോ. ഏതായാലും ഞാന് സംസാരിച്ചു തുടങ്ങിയപ്പോള് കുഞ്ചുവും പഴയ കാര്യങ്ങളൊക്കെ എന്നോട് തുറന്നു പറഞ്ഞു. ഞങ്ങള്ക്കിടയില് അങ്ങനെയൊരു രഹസ്യമൊന്നും വന്നിട്ടേയില്ല...’’ സ്വാസിക പറയുന്നു.
വിവാഹശേഷം താൻ കഴിച്ച പ്ലേറ്റ് കഴുകി വെയ്ക്കാൻ പോലും സ്വാസിക സമ്മതിക്കാറില്ലെന്നും ചില കാര്യങ്ങളില് സ്വാസിക ഇങ്ങനെയാണെന്നും പ്രേമും പറയുന്നുണ്ട്. ‘‘വിവാഹത്തിന് മുമ്പ് ഞാൻ കഴിച്ച പ്ലേറ്റ് ഞാൻ തന്നെയാണ് കഴുകി വെച്ചിരുന്നത്. ഇപ്പോള് സ്വാസിക അതിന് സമ്മതിക്കാറില്ല. ഞാനെങ്ങാനും പ്ലേറ്റ് കഴു കിവെക്കാൻ കൊണ്ടു പോയാല് സ്വാസിക ദേഷ്യപ്പെടും. നല്ല കാര്യം ചെയ്താലും ദേഷ്യമാണ്...’’ പ്രേം പറയുന്നു. അതിനുള്ള മറുപടി സ്വാസികയും പറയുന്നുണ്ട്.‘‘എനിക്ക് എന്റെ ഭർത്താവിന്റെ പ്ലേറ്റ് കഴുകാനും കാപ്പി കൊണ്ടു കൊടുക്കാനുമെല്ലാം ആഗ്രഹമുണ്ട്. അതെന്റെ അവകാശമാണ്. ആളുകളെ ട്രീറ്റ് ചെയ്യാൻ തനിക്കിഷ്ടമാണ്. പക്ഷെ എല്ലാ പണിയും ചെയ്യാൻ എനിക്ക് ഇഷ്ടമല്ല. തുണി അയേണ് ചെയ്യുന്നതൊന്നും എനിക്ക് ഇഷ്ടമല്ല. എനിക്ക് തുണി തേച്ച് ശീലമില്ല...’’ സ്വാസിക പറയുന്നു. പ്രണയിച്ച് നടന്നിരുന്ന കാലത്ത് സിനിമയുടെ പ്രമോഷനെന്ന് അമ്മയോട് കള്ളം പറഞ്ഞ് പ്രേമിനെ കാണാൻ മുംബൈയില് പോയ കഥകളും സ്വാസിക പറയുന്നുണ്ട്.
സ്വാസികയും പ്രേമും രണ്ട് മതത്തില്പ്പെട്ടവരായതു കൊണ്ട് തന്നെ ഇവരുടെ വിവാഹ ചടങ്ങുകള് പോലും വളരെ വ്യത്യസ്തമായിരുന്നു. ഏതെങ്കിലും ഒരു മതത്തിന്റെ ആചാര പ്രകാരമായിരുന്നില്ല ചടങ്ങുകള് നടന്നത്. സുഹൃത്തുക്കളുടെയും കുടുംബാംഗങ്ങളുടെയും സാന്നിധ്യത്തില് ബീച്ചില് വെച്ച് നടന്ന സ്വകാര്യ ചടങ്ങിലാണ് ഇരുവരും വിവാഹിതരായത്. വിവാഹത്തിന് പുടവ നല്കിയതിന് പിന്നാലെ സ്വാസിക വിജയ് പ്രേമിന്റെ കാല് തൊട്ട് തൊഴുതപ്പോള് തിരികെ പ്രേമും സ്വാസികയുടെ കാലില് തൊട്ടു വണങ്ങിയതിന്റെ ദൃശ്യങ്ങളൊക്കെ സോഷ്യല് മീഡിയയില് വൈറലായിരുന്നു.
