പ്രത്യേക ജോണറുകളിലുള്ള സിനിമകള് ചെയ്ത് പ്രേക്ഷകമനസ്സിലിടം നേടിയ സംവിധായകനാണ് അമല് നീരദ്. കുഞ്ചാക്കോ ബോബൻ, ഫഹദ് ഫാസില്, ജ്യോതിർമയി എന്നിവരെ കേന്ദ്രകഥാപാത്രങ്ങളാക്കി അമല് നീരദ് സംവിധാനം ചെയ്യുന്ന ഏറ്റവും പുതിയ സിനിമയാണ് ബോഗയ്ന്വില്ല. കഴിഞ്ഞ ദിവസമാണ് ഈ സിനിമയുടെ ലിറിക് വീഡിയോ പുറത്തു വന്നത്.
നിമിഷങ്ങള്ക്കുള്ളില് തന്നെ ഈ വീഡിയോ സോഷ്യല് മീഡിയയില് വൈറലായി മാറി. സിനിമയുടെ പോസ്റ്ററിലൂടെയും മറ്റും ഏറ്റവും കൂടുതല് ശ്രദ്ധിക്കപ്പെട്ടത് ജ്യോതിര്മയി തന്നെയാണ്. ലിറിക് വീഡിയോ പുറത്തിറങ്ങിയതിനു പിന്നാലെ ജ്യോതിർമയിയെ അഭിനന്ദിച്ചുകൊണ്ട് നിരവധി പേർ കമന്റ് ചെയ്തിരുന്നു.
ഇപ്പോഴിതാ ചിത്രത്തിന്റെ പോസ്റ്റർ പങ്കുവച്ചുകൊണ്ട് ജ്യോതിർമയിയെ അഭിനന്ദിച്ച് രംഗത്തെത്തിയിരിക്കുകയാണ് റിമ കല്ലിങ്കല്. ‘‘ജ്യോതിർമയിയുടെ അഭിനന്ദന പോസ്റ്റ്!! അതായത്.. അവൾ ശരിക്കും ഭക്ഷിച്ചു... എങ്ങനെ..’’ എന്നാണ് റിമ ജ്യോതിര്മയിയുടെ പോസ്റ്റര് പങ്കിട്ട് റിമ കുറിച്ചത്. എന്നാല് റിമയുടെ പോസ്റ്റിന് താഴെ ഒരാള് വിമർശനവുമായി എത്തി. ‘‘ആരാണ് ഇപ്പോള് നെപ്പോട്ടിസത്തെ പിന്തുണയ്ക്കുന്നത്, എപ്പോഴത്തേയും പോലെ കാപട്യവും ഇരട്ടത്താപ്പും..’’ എന്നാണ് ഒരാള് കുറിച്ചത്. അധികം താമസിയാതെ ഇതിന് റിമ കല്ലിങ്കല് ചുട്ടമറുപടിയുമായി എത്തി.
‘‘ഇതെങ്ങനെ നെപ്പോട്ടിസമാകും?’’ എന്നായിരുന്നു റിമയുടെ മറുചോദ്യം. ‘‘അവർ സംവിധായകന്റെ ഭാര്യയല്ലേ, നെപ്പോട്ടിസത്തിന്റെ അർത്ഥം ദയവായി പരിശോധിക്കൂ. അതോടൊപ്പം 2023 ല് പുറത്തിറങ്ങിയ നീലവെളിച്ചത്തിന്റെ സംവിധായകനും നായികയും ആരാണെന്നും പരിശോധിക്കൂ... അമല് നീരദിന്റെ ഭാര്യ ആയതിനാലാണ് ജ്യോതിർമയിയെ ഈ സിനിമയിലേക്ക് കാസ്റ്റ് ചെയ്തത്’’ എന്നാണ് ആ വ്യക്തി റിമയ്ക്ക് മറുപടി നല്കിയത്.
‘‘ ആരുടെയെങ്കിലും ഭാര്യ ആകുന്നതിന് മുമ്പ് ജ്യോതിർമയി ആരായിരുന്നുവെന്ന് പരിശോധിക്കുന്നത് നല്ലതായിരിക്കും...’’ എന്നായി റിമയുടെ മറുപടി.
ഒക്ടോബർ 17ന് റിലീസ് ചെയ്യുന്ന ബോഗയ്ന്വില്ല അമല് നീരദ് പ്രൊഡക്ഷൻസിന്റെയും ഉദയ പിക്ചേഴ്സിന്റെയും ബാനറില് ജ്യോതിർമയിയും കുഞ്ചാക്കോ ബോബനും ചേർന്നാണ് നിർമ്മിച്ചിരിക്കുന്നത്.
