കാമുകി ഉപേക്ഷിച്ചതിന്റെ പേരില് ഫേസ്ബുക്കില് ലൈവ് വീഡിയോ ഓണാക്കി വെച്ച് യുവാവിന്റെ ആത്മഹത്യാശ്രമം. രാജസ്ഥാനില് നിന്നുള്ള യുവാവാണ് പ്രണയ നൈരാശ്യത്തെ തുടര്ന്ന് ആത്മഹത്യയ്ക്ക് ശ്രമിച്ചത്. സംഭവ ദിവസം അമിതമായി മദ്യപിച്ചിരുന്ന യുവാവ് ഫേസ്ബുക്ക് ലൈവിലൂടെ താന് മരിക്കാന് പോവുകയാണെന്ന് പറയുകയും തുടര്ന്ന് കഴുത്തില് കുരുക്ക് മുറുക്കുകയുമായിരുന്നു. എന്നാല്. ഇതിനിടെ വിവരം അറിഞ്ഞ് സ്ഥലത്തെത്തിയ പോലീസ് യുവാവിന്റെ രക്ഷകരായി.
നവംബര് 23 -ന് രാജസ്ഥാനിലെ ജയ്പൂരിലാണ് സംഭവം. യുവാവ് ഫേസ്ബുക്കില് ലൈവ് ഓണാക്കി താന് മരിക്കാന് പോവുകയാണെന്ന് പറഞ്ഞപ്പോള് ഇത് കണ്ടുകൊണ്ടിരുന്ന ഒരു സുഹൃത്താണ് സൈബര് സെല്ലിന് വിവരം കൈമാറിയത്. ഉടന്തന്നെ പോലീസ് ഉദ്യോഗസ്ഥര് സമൂഹ മാധ്യമ പ്രൊഫൈലിലൂടെ ഇയാളുടെ വിവരങ്ങള് ശേഖരിക്കുകയും സംഭവ സ്ഥലത്ത് എത്തി, ഇയാളെ രക്ഷപ്പെടുത്തുകയുമായിരുന്നു. ഇയാളുടെ 'ഫോണ് നമ്പറിന്റെ ലൊക്കേഷന് കണ്ടെത്തിയാണ് പോലീസ് സ്ഥലത്തെത്തിയത്. കൂടാതെ വീഡിയോയില് കണ്ട മുറി സൂക്ഷ്മമായി പരിശോധിച്ച് പോലീസ് ജയ്പൂരിലെ ശ്യാം നഗര് ഏരിയയിലെ മൂന്ന് ഹോട്ടലുകളുമായി ബന്ധപ്പെട്ട് കാര്യം തിരക്കുകയും ചെയ്തു. ഇതിന് പിന്നാലെ യുവാവ് ഉണ്ടായിരുന്ന ഹോട്ടലില് എത്തിയ പോലീസ് ഇയാളെ രക്ഷപ്പെടുത്തിയത്.
ആരോഗ്യ പരിശോധനയ്ക്കായി ഇയാളെ സവായ് മാന് സിംഗ് ആശുപത്രിയിലേക്ക് കൊണ്ടുപോയി. താന് ആത്മഹത്യ ചെയ്യുക എന്ന ഉദ്ദേശത്തോടെ ഒരു ദിവസത്തേക്ക് മാത്രമാണ് ഹോട്ടല് മുറി ബുക്ക് ചെയ്തതെന്ന് ഇയാള് പോലീസിനോട് സമ്മതിച്ചു, സംഭവത്തില് കൂടുതല് അന്വേഷണം നടത്തിവരികയാണ്. നിരവധി പേരാണ് സമൂഹ മാധ്യമങ്ങളിലൂടെ ഈ വീഡിയോ കണ്ടത്. ഓര്ക്കുക ആത്മഹത്യ ഒന്നിനും പരിഹാരമല്ല.
