തെലുങ്ക് സൂപ്പര്താരം നാഗാര്ജുനയുടെ വീട്ടില് വീണ്ടും കല്യാണമേളങ്ങള് ഒരുങ്ങുകയാണ്. മൂത്ത മകന് നാഗചൈതന്യയും ശോഭിത ധൂളിപാലയും തമ്മിലുള്ള വിവാഹനിശ്ചയം ആഘോഷമായി നടന്നതിനു പിന്നാലെ നാഗാർജുനയുടെയും അമല അക്കിനേനിയുടെയും ഇളയമകനും നടനുമായ അഖില് അക്കിനേനിയും വിവാഹിതനാവുന്നു. മുപ്പതുകാരനായ അഖില് അക്കിനേനി സഹനടിയുമായി പ്രണയത്തിലാണെന്നും വിവാഹ ജീവിതത്തിലേക്ക് കടക്കാനൊരുങ്ങുന്നു എന്നും റിപ്പോർട്ടുകളുണ്ടായിരുന്നു.
ഇപ്പോഴിതാ കേട്ടതെല്ലാം സത്യമാണെന്ന് തന്റെ സോഷ്യല് മീഡിയ പോസ്റ്റിലൂടെ പങ്കിടുകയാണ് അഖില്. സൈനബുമായി താൻ പ്രണയത്തിലാണെന്നും വിവാഹനിശ്ചയം കഴിഞ്ഞുവെന്നുമാണ് ഇൻസ്റ്റഗ്രാം പോസ്റ്റില് അഖില് കുറിച്ചത്. ‘‘എന്നിലെ എന്നെ എന്നെന്നേക്കുമായി കണ്ടെത്തി...ഞാനും സൈനബ് റാവദ്ജിയും സന്തോഷത്തോടെ വിവാഹ നിശ്ചയം കഴിഞ്ഞുവെന്ന് അറിയിക്കുന്നതിൽ സന്തോഷമുണ്ട്...’’ എന്നാണ് സൈനബുമായിട്ടുള്ള പ്രണയചിത്രങ്ങള് പങ്കിട്ട് അഖില് കുറിച്ചത്.
2016ല് ശ്രിയ റെഡ്ഡിയുമായി അഖിലിന്റെ വിവാഹനിശ്ചയം കഴിഞ്ഞിരുന്നു. എന്നാല് പിന്നീട് ഇരുവരും വിവാഹത്തില് നിന്നും പിന്മാറി.
അഖിലിന്റെ സഹോദരനും നടനുമായ നാഗ ചൈതന്യ- ശോഭിത ധൂലിപാല വിവാഹം ഡിസംബർ നാലിന് ഹൈദരാബാദിലെ അന്നപൂർണ സ്റ്റുഡിയോയില് വച്ചിട്ടാണ്.
